الحمل الثاني..

السلام عليكم ورحمة الله وبركاته

يمكن اللي قرأ العنوان يفكر ان فكرة هالموضوع نفس فكرة موضوعي السابق " اللي عندهم طفلين او اكثر " ..

بس انا هني حبيت احط تصوري لحملي الثاني .. وارجوا من البنات اللي حملوا لثاني مرة او ثالث مرة يخبرونا عن تجربتهم ..

انا لما اتذكر حملي بولدي " حسين " اتذكر التعب والمعاناة اللي عانتيها طول فترة اشهر الحمل .. الا اني اتذكر بعد الذكريات الحلوة اللي صارت معاي في هالفترة ..
وطبعا هالذكريات لما اركز عليها كانت كلها بسبب ان الحمل هو الحمل الاول لي .. يعني انا كنت على راحتي ، لما توحمت بداية الحمل وتميت رامية نفسي وكل نايمة ما ادري لا عن زوج ولا عن بيت كنت لوحدي " زوجي كان يراعي لي " ، اما الحمل الثاني فراح يكون بالعكس .. يعني حتى لو تعبت ورميت نفسي راح يكون عند ولد لازم اعطيه حقه واهتم فيه ..
الشي الثاني وهي بعد الوحم .. يعني انا في حملي السابق تم الوحم وياي للشهر الخامس ويوم خف الوحم بدا بطني يكبر واحس بالثقل والتعب ، وبدت مواعيد المستشفى .. ومواعيد المستشفى هي الاهم ، يعني انا في حملي السابق كنا نروح انا وزوجي وكنا نستمتع بالاطمئنان على البيبي وكان ياخدني بعد الموعد نروح لكفتيريا قريبة من المستشفى ونتريق " نفطر " هناك وكان هالروتين كل موعد تقريبا ومثل ما قلت لكم كان مشوار المستشفى من المشاوير اللي احبها فترة الحمل وطبعا ما كان ورانا احد .. بس لو بحمل المرة الثاني بيكون وراي ولدي وين بوديه اذا بروح المستشفى واذا وديته معاي ممكن يضايقني او يحرجني بحركته وشطانته المستمرة ..
وعلى نهاية الحمل وزيادة التعب بدت مشاوير شراء اغراض البيبي .. هالمرة بعد بتكون متعبه لان معانا طفل يضايقنا في السوق ..

واهم شي .. ان انا في ولادتي هالمرة تميت 3 ايام في المستشفى وزوجي كان يظل طول اليوم معاي ويرجع بالليل .. بس في الحمل الثاني بظل احاتي ولدي وافكر فيه واذا جبناه المستشفى ممكن يعمل ربشة وكذا ...
وهالحال نفسه بعد الولاده .. بعد ولادتي بحسون تميت تعبانه لمدة اسبوع تقريبا " لان صادني نزيف في الولادة " ، وطبعا السهر كان مدوخني .. وكنت انتظر متى ولدي ينام عشان انام وفي اي وقت من اليوم .. بس في الحمل الثاني بتعب مع اثنين .. واذا نام الصغير بيكون الكبير صاحي ولازم انومه وكذا ..
واكيد تعرفون ان التعب مع واحد غير عن التعب مع اثنين ..
وما يحتاج اتكلم عن الغيرة بعدين .. يعني انا احس ان ولدي من النوع الغيووووور .. يعني اتصور لو جبنا بيبي ثاني ممكن يأذيه او يسوي فيه شي لان اخذ مكانه ..

انا الحين حطيت تصوري لحملي الثاني .. واللي اكتشفت من خلاله ان ما في احلى من تجربة الحمل الاولى بكل المقاييس ..

فهل انا تصوري صحيح .. والا تشوفون اني بالغت شوي ؟؟؟

والبنات اللي جربوا يا ريت يحكولنا عن تجاربهم ....


ارجوا ان فكرة الموضوع ما تكون مكررة ..


تحياتي