مخللات مخللات مخللات

اولا مخلل اللفت
بصوا مافيش مقادير مسألة تقديرية

اللفت تغسليه كويس ويستحسن تنقعيه نص ساعة فمية علشان ينزل اى شوائب فيه
وبعدين تقطعيه (بقطعة بسكينة مشرشرة موجودة فكل حته اللى هى برضه بتقطع الجزر)
وبعدين هتجيبى ميه تغليها وتسبيها لما تبرد
وتحطى اللفت فبرطمان (ممكن تحطى معاه واحدة بنجر تديله لون حلو محمر واحدة بس كفاية اوى)
وتحسبى كل لتر مية عليه 2 ملعقة اكل ملح لحد ما يتغطى اللفت اللى فالبرطمان
اصبرى عليه شوية لانه مش بيتخلل بسرعة طبعا هتلاحظى احمرار لونة ممكن تدوقيه كل فتره

الفلفل المخلل
يتغسل كويس ويتحط فبرطمان التخليل ويتحط معاه معلقتين ملح لكل لتر ماء +ملعقة واحدة خل
مافيش اسهل من كدا والله اجنن

مخلل الجزر
طبعا بنخلل الجزر الاصفر
يتغسل كويس ويتقطع بالسكينة المشرشرة
ويتحط له ملعقتين ونص ملح لكل لتر ماء ويترك حتى يتخلل

الخيار المخلل
يتغسل الخيار وتحط فبرطمان التخليل ويتحط عليه ملعقتين ملح لكل لتر ماء وملعقة خل العنبوبعض فصوص الثوم و قرنين شطة

مخلل الباذنجان الاسود

اولا هتغسليه وتقطعى الحتة اللى فوق الخضرة وتغسيله
ممكن تسلقيه نص سلق فماء وملح
او انك تقليه فزيت غزير بس قبل القلى تكونى فتحته فتحة صغيرة من الجنب
واحشيه بقى بالثوم والماح والشطه الحمرا او الفلفل الاحمروحبة خل

اللمون المسلوق
تختارى اللمون صغير الحجم اخضر اللون.
يسلق نص سلق ويوضع فماء بدون ملح
تغيرى الماء على الليمون لمدة اربع ايام
يوضع اليمون فى برطمان التخليل مع بعض قرون الشطة الخضرا ويوضع معلقتين ونص ملح لكل لتر ماء ويغلق جيدا لحد ما يتخلل

الزيتون الاخضر
تغسلى الزيتون كويس وتغطيه بماء ملعقة ملح لكل لتر ماء وتترك لمدة 10 ايام

يغسل الزيتون مرة تانية وتتخلصى من المحلول الملحى السابق وتعملى واحد تانى معلقتين ونص ملح لكل لتر ماء وعصير لمون
اضغطى على الزتون بايدك علشان تتاكدى انه اتغطى كله وحطى قشر اللمون فوق الزيتون
يغطى البرطمان ويوضع فمكان دافئ

الزيتون المفدغ
دقى الزيتون بايد الهون وده اسمه التفديغ وقطعى عليه لمون كتير و كمان قرون شطة كل دا فطبق كبير و حطى عليهم ملح كويس وكل يوم تقلبيهم لمدة عشر ايام
يصفى الزيتون من السائل اللى هينتج و حطى معاه قليل من الكرفس وابشرى عليه جزرة و دقى عشر فصوص ثوم وقلبيهم كويس وعبيهم فالبرطمان و حطيهم فمحلول ملحى معلقتين ملح لكل لتر ماء (مش هياخد كتير) غطيه بمعلقتين خل و معلقتين زيت ويغلق ويستعمل مباشرة
الزيتون الاخضر المحشى
يغسل الزيتون و ينزع النوى بالاله المخصصة لذلك
ينقع فى ماء بارد بدون ملح ويغير الماء يوميا لمدة 3 ايام
يقشر الجزر ويقطع صغيرا بما يتناسب مع المكان المفرغ فالزيتون ويغسل كرفس ويقطع صغير وفلفل حار
يحشى الزيتون بالجزر ويغطى بالكرفس ويوضع فبرطمان ويوضع بين الطبقات كرفس وفلفل ثوم ويغطى بمحلول ملحى 3 ملاعق ملح لكل لتر ماء وعصير لمون وخل العنب وتوضع طبقة من الكرفس والفلفل والثوم على الوش ويغطى بالزيت ويغلق باحكام