لتغيير الجو... شاركينا.. متى فاجئتك الدورة لأول مرة؟ وكيف تصرفت؟

عزيزتي جمانه

موضوع حلو على الأقل إحنا البنات نروم نرد عليه

متى فاجئتك الدورة الشهرية لأول مرة بحياتك؟

أذكر سنة 1994 و كنت بصف أول إعدادي

وكيف كان شعورك حينها؟

خايفه ما عرفت شو هذا لأنه الوالده ما قال لي و لا فاتحتني في الموضوع على بالي طايحه

اين كنتِ ؟ وكيف تصرفت؟

كنت راده من المدرسه و إستغربت من إلي شفته و حبست نفسي في الغرفه لحد ما يا وقت الرقاد و خبرت إختي و كنت أصيح ما أعرف شو فيني


هل كانت لديك الخلفية الكافية عن الموضوع؟

في المدرسه عطونا خلفيه بسيطه لكن في البيت و لا شئ يعني كان شئ غريب

من تكفل بتعليمك كيفية التعامل معها؟ وهل هناك نصائح مفيدة تقولينها لنا؟

إختي علمتني و حطيت الفوطه الصحيه غلط كانت معاناه و قلت إلها ما تخبر الوالده على بالي شئ عيب


ماذا كان نوع الفوط الصحية التي تستخدمين؟ وهل غيّرت الى نوع آخر فيما بعد؟ ولماذا؟

أذكر كنت أستخدم أولويز بعدها غيرت لأني ما إرتحت بالمره و كانت الوالده إلي شاريه لي و لا عبرتها مستحيه منها و لما إختي عطتني الفوط و علمتني صح خشيتهم في الكبت و كل إشوي أقرا التعلميات أضني حفظتهم

هلا هلا هلا

و الله حبيبتي ذكرتيني فيما مضى

أول مره يتني الدوره و أنا عمري 14 سنه
و كان في رمضان و كنت قاعده أشوف برنامج مسابقات في التلفزيون
و لما دخلت و انتوا بكرامه الحمام شفت ملابسي الداخليه متوسخه
انصدمت:eek2:
خفت:ss:
تيبست مكاني:pain:
مليون شي دار في بالي:think:
بس عقبها طلعت و خبرت أختي الي أكبر مني و كانت في هذا اليوم فاطره
فعطتني فوطه صحيه(أولويز) الي لين اليوم أستخدمها
و كانت تاكل شوكولا فكلت وياها
لأن صيامي اخترب
و ثاني يوم لقيت نفسي مفضوحه عند العايله الكريمه:gum:
ما تم حد ما درى
و طبعا أختي علمتني كيف أتطهر من عقب الدوره
و قالتلي شو أشرب عشان العوار


هذي كل الحكايه
و توته توته خلصت الحتوته

هههههههههه ضحكتني جملتج يغلب عليه التوتر والترقب سواء لمن ترغب بالحمل او الولادة
صدقتي والله انا عندي كم منتدى وهاجرتهم لمنتدى عروس وقسم الحمل و الولاده خاصة .. الله يكرمنا انشلله وننتقل لقسم الطفل ههههههه



متى فاجئتك الدورة الشهرية لأول مرة بحياتك؟
كنت في اول اعدادي وكان عندنا مدرس خصوصي يدرسنا انا واخوي .. وانا قاعده معاه حسيت برطوبه بس ما اهتميت للموضوع ....
اول ما رحت الغرفه جيت بابدل ثيابي واشوف الدم :eek2: حسيت بصدمه مع اني اعرف الدوره واعرف عنها كل شي وامي مفهمتني


وكيف كان شعورك حينها؟
اول ما شفت الدم شعوريا قمت اركض من باب الحمام لين باب الغرفه هههههههههههه مادري ليش والله بس الحين اتذكر شكلي اموت من الضحك ليش كنت اركض ههههههه


هل كانت لديك الخلفية الكافية عن الموضوع؟
ايه الحمدلله .... بس المشكله ما عرفت احط الكوتكس .. كنت احط مكان اللزقه اللي ورا ... قدام ههههههههه



ماذا كان نوع الفوط الصحية التي تستخدمين؟ وهل غيّرت الى نوع آخر فيما بعد؟ ولماذا؟م
من بلوغي ولين الحين استخدم فام لان الوالده الله يحفظها تستخدمه ... وايد مريحه وقطنيه ..




اشكرج اختي على طرحج للموضوع رجعتينا لــــ ورا

شكرا اخواتي على التجاوب...

بانتظار البقية...

يالله همتكم.. اذا رجعت وشفت الموضوع راح تحت بزعل :(

ماسة دبي...

شكرا الغالية على كونج اول من ترد علي...

وذكرتيني بحالي.. كنت اقرأ التعليمات 100 مرة.. لما حفظتهم مثلج :D

هلا ام خالد...


اي والله ذكريات تضحك .. كانت بوقتها شيء مررررعب !

احلى شيء انج مباشرة عقب ما فطرتي قعدتي تاكلين كاكاو..

بس حلوة الفضيحة اللي سوتها فيج اختج
وما قلت لنا ، شنو اللي شربتيه عن العوار وصج خفف عليج؟

:D

مجنونة قطر

:o :o :o

ايييييه حياج عندي بركن التربية والطفل.. واذا الركن ما شالج.. عيوننا تشيلج... :D <<< اصبغ من الحين


ومشكورة عمري عالمشاركة

هههههههههههههه ذكرتوني يا خواتي باللذي مضى
اتذكر لما شرفتني الحلوة كنت في اول اعدادي وكان شهر رمضان وتقريبا كان بقى على اذان المغرب عشر دقايق
كنت قاعده اساعد امي اسوي السلطه بعدين حسيت برطوبه ولما رحت الحمام وشفت الدم حولت حسيت كأنه احد صب علي ماي بارد مع اني كنت عارفه عنها كل شي وكان في ذاك الوقت ربعي كلهم شرفتنهم من جدي كان عنديخبرة عنها بس مع هذا زعلت وااااجد لما شرفتني وحتى لما قلت الى امي قلت اليها اوانا منقهرة:mad2: بس الوالده ماقصرت وهدت اعصابي
اما عن الفوطة الصحيه امي ما قصرت علمتني عدل شلون يستخدمونها واما عن نوعيتها فاني للحين على طوول اغير في النوعيه على حسب الجو اغير الفوطع وعلى حسب المزاج

مساء الفل

متى فاجئتك الدورة الشهرية لأول مرة بحياتك؟
كان في يوم 27/7/1995 الصبح

كنا رايحين سفرة ترفيهية للحبانية << مدينة سياحية كانت قرب بغداد


وكيف كان شعورك حينها؟
لما قعدت من نومي شفت روحي ما انحسد!!!!!!!!!!

ضليت بالحمام يجي نص ساعة.. الى ان ماما سالتني شبيج؟؟

قلتلها الي فيني.. وهي طمتني.. وقبلتني ايضا.. وعطتني من فوطها - ما اذكر شسمها-

بس القهر ان احنا لما رحنا للبحيرة.. الكل دخل بالماي الا انا.. ومتت من القهر ساعتها


هل كانت لديك الخلفية الكافية عن الموضوع؟
نوعا ما.. كنت ندردش بالمدرسة عن الموضوع.. وبالبيت كانت ماما.. تلمح مو اكثر عن الموضوع


تحياتي لكي.. وامنياتي بالتوفيق

وادعوووووولي.. ربي يسهل زواجي وبتزوج سريع وادخل لقسم الطفل وانا حامل << بليييييييييييييييييييييييييييييز

تحيه وبعد....

أجل انا قصتي شوي مختلفه....

أنا الدوره تأخرت عني ما جتني الا بثالث اعدادي

طبعا امي كان ضايق صدرها وخالاتي كلهم يبغونها تجيني

في شهر رمضان المبارك راحت امي للعمره وكلمتني بعد المغرب تسال عن اخواتي وعني وقالت لي دعيت ان الدوره تجيك....

والله العظيم اني قفلت التلفون ورحت الحمااااااااااااام والقى الدم ....

وكنت خايفه امي مسافره علمت اختي الي اصغر مني بسنتين وماعلمت اامي الا ثاني يوم....

طبعا من الفرحه امي عزمتني على العشا برى انا واختي وابوي واخزيييييييييياه

والشغاله اي احد يدق على بيتنا من خالاتي وعماتي

تقول خلااااااااااااص الحين فلااااااانه صير حرمه

فضحوني عند الله وخلقه

كنت استخدم اولويييز بس الحين استخدم برايفت

وااااو الموضوع روعه..

انا اول مره جاتني كنت بالصف الاول الاعدادي وكان بالصيف وكان الوقت العصر الساعه 4 كنا نتجهز بنروح الملاهي مع بيت خالتي وقبل مانطلع حسيت برطوبه فظيعه ورحت الحمام ولقيتها الاخت مشرفه ماخفت نهائيا لان امي وخواتي قايلين لي وانا اصغر وحده ودايم اسمع خواتي يتكلمون عنها الا جات الا راحت وكان ودي تجيني علشان احس اني مثلهم كبيره ..وطلعت وقلت حق امي وفرحت وحبتني وعطتني اولويز لين الحين استخدمه ...وبس

ذكرتيني فيها مابغيت افتك منها و من همها


اول مره يتني الدوره كنت بأول اعدادي و راجعه من المدرسه المغرب و حسيت بألم في بطني قلت حق امي قالت لي يمكن بتنزل عليك الدوره

و فعلا نزلت الدوره ذاك اليوم و كنت استعمل حزتها فام بس الحين غيرته الى اولويز وناويه بعد اغيره مستقبلا الى برايفت

شنو كان شعوري؟
كان همي الوحيد ان المره الجايه لما بتييني الدوره شلون بعرف ... كنت خايفه اكون في المدرسه و اتوسخ
فقالت لي امي لاتخافين مره الجايه اذا بتيي بتحسين بطنك يعورك
فقلت في خاطري ( وللحين ما انسى درجه الغباء اللي كنت فيها ) قلت لامي اشوى بيعورني بطني عشان اعرف انها بتنزل و اخذ احتياطي ... مادريت اني بندم على هالامنيه الغبيه و لو اتوسخ ارحم لي من الويل اللي تذوقني اياه كل شهر

موضوع رائع اختي جمانه يزاج الله خير...غيرتي من روتين القسم..


متى فاجئتك الدورة الشهرية لأول مرة بحياتك؟
**كنت بسير صف اول اعدادي وكنت بيت يدي العب..

وكيف كان شعورك حينها؟
كنت زايغه واصييييح بعد...

اين كنتِ ؟ وكيف تصرفت؟
كنت بيت يدي..وسيده عند امي اصيح وما صدقتني بعد

هل كانت لديك الخلفية الكافية عن الموضوع؟
**الصراحه لا ومااعرف شو السالفه..

من تكفل بتعليمك كيفية التعامل معها؟ وهل هناك نصائح مفيدة تقولينها لنا؟
**عمتي..ونصحتني اشرب كل حار وقت الدوره وابتعد عن الغازات والبارد..وهاي نصيحتي لكم..

ماذا كان نوع الفوط الصحية التي تستخدمين؟ وهل غيّرت الى نوع آخر فيما بعد؟ ولماذا؟
**كنت استخدم فام وغيرت الى كوتكس لانها تمتص اكثر..

انا عاد لو عرفتوا قصتي بتضحكون عليه لين باكر

انا بحكم ان مالي غير اخت وحده وتزوجت وهي صغيره 15 سنه وانا 12 سنه كانت هي النوع الي وااااايد كتومه وعاد انا هبله وما تنلام لما ماتامني على اسرارها لاني ولدو والمهم اني كنت مكفيه وموفيه بالمعلومات والقرايه عن الموضوع وانتظر هاليوم بفارغ الصبر بس تاخرت وايد كنت في اول ثانوي لما يتني تخيلو يعني خلاص ياست وبديت اصيح واقول اكيد انا من المفروض اكون ولد مو بنت عيل ليش ما بينت فيني اي ملامح للبنات لهالسن

المهم لما يتني كنت فوق السطوح اتحركش في يهال الفريج وانا منخشه ( قلتلكم ولد ماصدقتوا)
المهم اني لما شفت الي شفته صحت صحت صحت ماعرف ليش وسرت غرفتي وتميت فيها لين ثاني يوم

وعلى فكره كانت عندي سده في كبتي تنقفل ولها مفتاحين واحد عندي والثاني عند اختي حبيبتي
وهي كل مره اتي بيتنا تتاكد من السده تعرفون شوفيها (العده اختي كانت مجهزه كللللللللللللل شي عشان ما تبهدل مثلها )

وطبعا في الوقت المناسب فتحت السده واستخدمت العده بس تدرون اني لين احينه وانا عمري 28 سنه عمري ما فاتحت امي بالموضوع

وااااااااايد حياويه والله واختي كل فتره اتيب لي كميه من الفوط واتحطهم في كبتي بدون ماتقولي شي ولا انا اقول لها شي تعرفني واااااااااااااااااايد استحي

انا كانت سالفتي سالفه...

اول مره يتني الدوره كان عمري 12 سنه.. انا طبعا من الامارات بس كنا معزوميين لعرس في عمان(انا واثنين من خواتي وابوي واثنين من بنات خالتي).. بالذات في صحار.. في اليوم الثاني يوم بغيت اسبح.. شفت شي احمر والله اني مت من الخوف وقلت شو هاااا لاني ما كنت اعرف وايد عن الموضوع .. اصلا انا ما كنت ادري انه هو عباره عن دم... قعدت اصيح في الحمام وماعرفت شو اسوي.. تميت انادي اختي.. فلانه فلانه تعالي.. يوم يت قلتلها والله شفت جي جي عندي.. عطتني فوطه صحيه.. واستخدمته.. لين رجعت البلاد وخبرت امي.. وتمت فيني اول مره 10 ايام...

ههههههههههههههههه حلو الموضوع ذكرتينا بايام زماااااااااااااااااان

انا جات عندي متأخري نفس بنت كيوت يعني على ثالث اعدادي

وكنت شبه مصدومه من الموضوع

كنت حاسة بحزن كبيرررررررررر وجلست بروحي وما اتكلم مع احد اليوم بطوله

وكانت عندي خلفية كبيرة عن الموضوع من امي وخالتي

وكنت استخدم أولويز وللحين استخدمه

تسلمين حياتي على الموضوع وفعلا غيرتي الجو

كنت أحس باكتئاب شوي لما ادخله ههههههههههههههه

حلو موضوعج يا وخيتي


متى فاجئتك الدورة الشهرية لأول مرة بحياتك؟
كان عمري 13 سنه و كنت بالطياره مسافره المانيا

وكيف كان شعورك حينها؟
تفاجاه وما عرفت كيف اخبر امي عشان هي كانت يالسه يم الوالد وانا يالسه يم عمي

اين كنتِ ؟ وكيف تصرفت؟

من حسن حظي في الطياره كان في فوط حطيت وحده و سكت ما تكلمت لين ما وصلنا المانيا وانا ناسيه اخبر امي

هل كانت لديك الخلفية الكافية عن الموضوع؟

نعم لانه صديقاتي كلهم بلغن قبلي بكم شهر و انا كنت المتاخره بينهم فما قصرو تعرفون سوالف مراهقات متخرعات على الانوثه

من تكفل بتعليمك كيفية التعامل معها؟ وهل هناك نصائح مفيدة تقولينها لنا؟

مثل ما قلت انا كنت مهياه نفسيا بس ما كنت اعرف كيف اتعامل معاها عدل عدل
بعدين الوالده فهمتني شوي و الربع ما قصرو

ماذا كان نوع الفوط الصحية التي تستخدمين؟ وهل غيّرت الى نوع آخر فيما بعد؟ ولماذا؟
قبل كنت استعمل فاين
و بعدين حولت لكوتكس و الحين استعمل كوتكس الترا لانه صدق مريح

الموضوع حلو

و فعلا يغير جو


و يرجعني شخصيا 12 سنه لورا




كنت في صف سادس


بتاريخ 1\4


كنت رادة من حفلة عيد مبلاد


و رحت الحمام


و شفت البلوة إللي أنا فيها


ركضت لأمي الله يحفظها و معاي الهاف :)


و عطيتها إياه من الحوسة إللي فيني


ما كان عندي فكرة وايد عن الدورة و ما حد علمني غير شوي في المدرسة


و أول فوطة استخدمتها كانت أولويز


و الحين كل مرة أييب شي

ههههههههههههههههههه يا زين سوالفكم

كان عمري 12 سنه و كان نهااااار رمضان و الصراحه هسترت .. قمت اضحك ههههههههههه حسيت باحساس عبيط مادري شلون اوصفه !! كنت مستغربه و بنفس الوقت مو هامني الموضوع يعني شنو دورة ؟ انا حرمة من زمان <<<< الثقه مقطعه بعضها
بنفس الوقت بديت افكر بالتكليف شلون كل شي راح احاسب عليه هههههههههههههه شايله هم ذنوبي

كنت بالبيت و أول ما شفتها رحت تعبثت بخزانة الحمام ادور شي احطه لكن ما لقيت و من ناحية الخلفية اكييييييييد .. الله يعافي قعدات رفيجاتي اللي ما عندهم سالفة غير هالممنوعات بالاضافه ان عندي اختين اكبر مني فشبعانه من هالمواضيع

لما قريت سوالفكم مت من الضحك و الله انا نفسكم حفظت التعليمات عدل كل ما ادخل اغير اقرا شنو مكتوب هههههههه
اذكر رحت لأمي بعدها بشوي و دخلت عليها المطبخ و كانت اتسوي الفطور و اتمشى عندها و اتبوسم .. انزين تكلمي قولي شي الصراحه ماعرفت افتح الموضوع مــو من الحيا لا بس لأني مو ضامنه ردة فعل امي
المهم نشفت ريجها و غصب اوصلت المعلومه و افرحت وايد و باستني و بعدين راحت اتطلعلي فوط و اتعلمني و انا اقولها يا يمه اعرف و الله اعرف و راحت طلعلتي نوع قديم اعتقد فام بس انا ما دخل مزاجي و قلتلها ابي اولويز من اللي عند اختي خخخخخخخخخخ

المهم دخلت الحمام تكرمون و حطيتها و اهي عليها 3 اماكن لزق بالنص و الجناحين لكن انا ثبت الجناحين و ما انتبهت للي بالنص بس الحمدلله عدت على خير

ما اقولكم شلون بعدها الكل يطالعني و يبتسم بالبيت !! خير عسى ماشر
خواتي يطالعوني و يضحكون !!!
حتى يوم زرنا بيت يدتي الكل يضحك بويهي !!!

طبعا عرفت ان فضيحتي بأت بقلاقل .. هالخبر انتشر على كبر العايله بالطول و العرض

قبل كنت استخدم اولويز العادي السميك و بعدين حولت الى اولويز الترا بس الحين انا مستقره على برايفت و اهو احسن نوع انصحكم فيه

:)