للعرايس كلهم......شنهي تجهيزاتكم لديكورات واكسسورات غرفة النوم؟

هلا حبيبتي و انا مثلج محتاره بهالشي
بس اول شي الاساسيات اللي هي

لون فرشية الارض و الستار + غرفة النوم يعني الأثاث و كفرات السرير
الاهم انه يكون متناسق و انا محتاره وايد لاني فحجرتي ثرايا فما اعرف شو اللي يليق عليه

يعني اضاءة الغرفه مب ابيض ( تيوب ليت ) هذا يليق عليه كل شي

اما بالنسبه للاكسسوارات مخدات الزينه تكون بألوان مختلفه و هاديه
أبجورااات بأشكال حلوه ..... أدوات الزينه وايده في السوق و المحلات انتي روحي و شوفي

مثلا انا احب الدباديب وايد اقدر ازين فيهم الغرفه بعد و سجاده حق الارضيه بس تكون بسيطه و حلوه و حجمها معقول وسط لا تيبين شي دفش و خاصة اذا كانت الغرفه غامجه ييبي فيها اشياء تفتح و العكس صحيح

زهووور صناعيه و يكون حجمها معقول بعد بس لا تترسين الغرفه خلي الغرفه هاديه

و تقدرين تييبين مندوس صغير تحطين فيه اغراض من داخل بس عادي تخلينه كزينه سكريه و حطي فوقه مرفأ فيه قرآن و الله منظره حلووو وايد بس لا تنسين تقرين القرآن دايما

و ان شاء الله ربي يوفقج

و انا بعد محتاجه بعض الاشياء يليت يساعدونا بهالشي

و السموحه

هلا والله باسيرة العيون...مشكوره حبيبتي على مشاركتج...بس انا للحين ماعرف لاحجم ولا اضاءة غرفتي لانها للحين في علم الغيب :) بس ابي اخطط لها من الحين على الاقل تكون عندي فكره واضحه عنها عشان لما انزل السوق واشوف شىء مناسب اخذه لها.

مدري فيه بنات يرجحون فكرة الكرستالات كاكسسوارات زينه...او زينة الكرسماس اللي ممكن تحصلينها في دبنهامز ...انا شفتها وايد راقيه وحلوه وفيها حركات غريبة بس ابي افكار اكثر!

يعني مثلا غالبا لون غرفة النوم كاثاث بيكون البني المحروق "الداكن" بس لون الجدران او ورق الحائط والارضية والملحف "الكفر" للحين ماخترته ولا حددته مع اني كلاسيكية بطبعي واهو بعد كلاسيكي ويحب الالوان التقليدية مثل البيج والبني...بس انا ابي يكون فيها لمسات غير تقليدية وحبيت اخذ من افكار البنات :)

على فكره ...انا احب تكون الغرفه فاضيه..بمعنى انها ماتكون مزحومه وايد بالاغراض......واذا بحط اككسوار بيون شىء ناعم وبسيط عشان ما ياخذ مساحه !

بس محتاجه افكاااااااار !

تدرين يا اسيرة العيون؟...حلو لما يكون الكفر مال السرير طقم مع الستاره وااااااااايد حلو بس اهنيه ماعتقد تتوفر هالخاصية بمحلات الكفرات...بس اشوفها حلوه بمواقع الفرات الامريكية :(

مشاء الله 12 وحده قرت الموضوع ولا احد علق غير أسيرة العيون :pain:

بنات وينكم يالله عطونا افكااااااااااااار:mad2:

الحلم الهادئ اذا الستاره نفس الكفر بتتقيدين بالكفر وايد
بعطيج فكره مثلا اذا سرير الغرفه فيه اعمده كبيره وديزانه مثل العرييش تقدرين تتفننين وتنزلين من فوق ورود واغصان خضرا او زينة كريسمس تطلع الغرفه فخمه
من ناحية الحائط اذا تبين ورق جدران مهم ان البيت ما يكون قريب من البحر لانه مع الرطوبه يتبطل وينتفخ
احلى شي الحين التعتيق والترخيم
هذا اللي عندي اياه الحين
ولي عوده مره ثانيه ان شاء الله

هلا الغاليه

انا مثلج احب الاشياء الكلاسيكيه حتى ريلي يعني نبا الحجره هاديه وااااايد


مافيه غير انج تروحين السوق و هناك تعرفين شو تاخذين بس انتي تقولين لون الغرفه و الجدار و الاضاءه في علم الغيب و بجي صعب انج تفكرين يعني حاولي انج تفكرين بالاساسيات قبل الاشياء الثانويه

المهم بالنسبه للكسسوارات ييبي شمووووع باشكال حلوه للزينه و فيه منه اكرستالات و حلو يوم تضوينه يعطي لمعه بالكرستالات عجيبه و بتحصلينه بدبنهايمز ....

و قلت لج ابجووورات بعد تكون شيييك ....

بس انتي ما تبين اشياء تقليديه و هاي فيها صعوبه شوي بالتفكير بالنسبه لي ....

خليني افكر باشيااء تقليديه و برد عليج ان شاء الله

هلا عمري قطر :).....ايه والله معاج حق الستاره بتقيدني بالكفر ...واااااي صج بقطن بكفر واحد جذيه !! لالالالا غيرت رايي :pain: اصلا مافيه ستاير وكفرات اطقم اهنيه ...يعني ماله داعي افكر فيها من الاساس:smile:

تدرين؟ انا اصلا بمووووووووت واخذلي سرير باعمده لان فعلا وايد روعه وممكن اسوي فيه العجايب...شيفونات نازله او تورمشغول...او اغصان صناعيه...او ثرووات مخمليه...شفت واحد في ذاون من زمان بس مدري للحين هناك والا لا...بس مخططه اخذلي واحد جذيه!

لالالا اهو السكن مب عند البحر...على حد علمي...ومدري اصلا هل بحط ورق جدران او بسوي لها ديكور خاص...للحين ماستقرينا على السكن عشان جذيه مابي افكر بالجدران في الوقت الحالي.

اللي افكر فيه اهو الاكسسووارات واللمسات اللي ممكن اضيفها بالغرفه واللي احس انها ممكن تغير من شكل الغرفه 180 درجه :) والا شرايكم؟

اسيرة العيون...حلوه فكرة الشموع...تذكرت عندكم محل في وافي سنتر كله انتيكات نسيت اسمه واااااااااي اغراضه تهبل وفخم فخم فخم..اذا رحت باخذ لي منه عنده مخدات او كرسين وطاوله احطهم على زاويه...لانه جدا كلاسيكي وفخم :)

انا مفكره بدال الابجورات احط عامود اناره بشكل مميز وغريب...مثل اللي في هوم سنتر اشكالهم حلوه وغريبة واضائتهم نااااعمه وهاديه

مشكوره يابنات على مشاركتكم وانتظر المزيييييييييد :)

اممممممم بصراحة انا ما راح اشوف تنسيق البيت الا لما اروح عقب الهدية
هو ذوقه حلو بس اذا ما عجبني شي باعدله عقب

عن غرفتي فيها 3 يدران مستطيله عاديه الا اليدار الرابع واللي يطل على الشارع كله زجاج من فوق لتحت يعني عندي منظر المدينه يجنن وعنده البلكونه بعد
والصراحه انا احبها تكون فاااااااضيه تقريبا وهاااااااااااااديه
ماحب اترس الغرفه اثاث ولا احب اترسها زينه مع ان غرفتي كبييييييره وااااايد بس مادري ليش احب ان الغرف دايما تكون فااضيه وعشان جذا اخترت لي اثاث لونه فاااتح واكره شي عندي البني احسه كئييييب وايد
عندي زاويه داخله شوي على داخل اذا كنت ابغي احط فيها كبت صغير يعني وهنا بحط مرايه كبيييره شكلها رووعه خاصه ان حولها اطار برونزي مذهب حلووو يناسب لون غرفتي الفاتح واكيد بحط ابجورات مذهبه تناسب اضاءه الثريات اللي في الغرفه ولون الكفر ابغيه بعد بيج على بطيخي وذهبي من هالالوان وان شاء الله عاد احصل شي مشغول فيه الدانتيل لاني احبه وااايد واحسه كلاسيك
واهم شي اني اترس الشبريه مخدات صغيره ولانها سيراميك اكيد بفرش فيها زوليه صغيره لونها بعد فاتح على لون الغرفه وافكر اخذ اكسسورات من الكرستال والشمووع للتسريحه وخام حلووو فيه شغل يلمع احطه بطريقه حلووه على الغنفه وستاره ملعوب فيها بالشيفونات تكون بعد باللون البيج الذهبي تقريبا وبس مابغي اكثر من جذا
مادري ليش احب الغرف الفاضيه احسها تشرح النفس اكثر :)

امل مفقووووووود.......مشاء الله عليج باين ان ذوقج وااايد حلو :) ..خليتيني اتخيلها معاج...عساج تتهنين فيها...عجبني تنسيقج وافكارج

في انتظار افكار البنات:)

كلاسيك....انشاء الله تطلع مثل ماتتمنينها تكون :)

بالنسبة لغرفتي سويت كل الجدران لون واحد وردي اللي على بيج والجدار الرابع لونه خمري وهوا اللي عليه السرير ...

السرير بأعمده واخترت الكفر لون عودي داخل فيه شويه قماش القطيفة والكفر كامل يعني 12 قطعه بالستارة والمخدرات .....الخ

واخترت احط على التسريحه سلال لونها بيج زي الغرفه يعني فيها الأمشاط والمكياج ......

وطبعا ما نستغني عن الشموع ........بس باقي الابجورات لانه اللون الابيض يضايق في الغرفة

لحظة صمت :) حلو..........ايش بتسوين بالاعمده؟ يعني بتحطين عليها تور او شيفون او حركه؟ والا بتخلينها عادي؟

انا عن نفسي يابنات ماحب احط مكياجي وامشاطي على التسريحه...احب اخبيهم في الادراج...ماحب الزحمه على التسريحه...يعني ممكن احط شىء بسيط مثل العطور الاكثر استخداما...وعلبة العود او الدخون اليومي مع كم شمعه او شىء من هالقبيل...بس مكياجي وكريماتي واغراض الشعر بخليهم داخل لان احس منظرهم بيسوي زحمه وبيخرب شكل الغرفه ...مجرد راي !

افكر اسوي لي ركن بسيط...كرسيين وطاولة ..يعني يمكن احتاجهم بعدين...طبعا هالفكره بتتحكم فيها مساحة الغرفه اذا كانت كبيرة بس

يالله بنات وينكم وين افكاركم؟

بالنسبه لي قريبتي عطتني نصيحه ثمينه وايد مع اني للحين مب عروس
بس قالت انها طلبت من زوجها اهممممممممم شي غرفة النوم صبغها يكون بيج ليش؟؟
لانه يناسب كللل الالوان
الحين طبعا صار لها سنه متزوجه وجربت وقالت فعلا هذا احسن قرار اتخذته

مره خلت الغرفه كلها حمره غيرت اشيا بسيطه وحطت شموع حمرى واكسسوارات وورد وصارت الغرفه حمرى
ومره نفس الشي شرت مفرش وردي وشموع ورديه وحركات ورديه وصارت الغرفه كلها ورديه
ونفس الشي مع اللون الازرق
يعني تقدرين تغيرين لون غرفتج مع اكسسوارات بسيطه
وما بتحتارين لان بتلقين وايد اشيا تناسب الوانها وبكل مكان

دلوعه قطريه كتبتي اللي كنت بقوله لهم
فعلا احلى شي الصبغ البيج والارضيه بيج سواء كانت موكيت او بورسلان او رخام مع اني ما احب الا الموكيت لاني اعاني بسبب الرخام ايام الشتا واااااااااااااايد احسه انه يمرضني
والاحلى ما يكون بيج ساده يكون ترخيم وحركات رسم خفيف نفس الطابوق وفي افكار وايد بتشوفونها في سوبر ديزاين
يطلع وووووووووووايد راقي لغرفة العروس وبنفس الوقت تقدر دوم تجدد بغرفتها وبأقل التكاليف لمجرد انها تغير مفارش السرير وتغير الوان الاكسسوارات وبس تصير غرفتها جديده ميه ميه لوول
وبالتوفيق ان شاء الله

دلوعتنا :) والله اقتراح حلو وفكره جميلة جدا ...مشكوره يالغاليه لان فعلا هالفكره ذهبية!

عمري قطر...ايه والله انا بعد احب الموكيت اكثر مدري احسه ادفا....لان البورسلان والرخام يغبر بسرعه وبااااااااارد :(...واي شىء يطيح عليه ينكسر :pain:

مشكوره حبيبتي على الاضافه

خواتي

دلوعه قطريه و

عمري قطر

انتوا ذكرتوا كل شي يعني الارضيه مع لون الجدار

اذا اخذنا لون الارضيه بيج و الجدار بيج


شو لون الستار بيكون ؟؟

و الستار مهم بعد لتأثيث الحجره و انا عندي مشكله تنسيق الالوان
ياليت تفيدونا بارك الله فيكم ...