رجعت من جديد .. فهل من مرحب

بسم الله الرحمن الرحيم
السلام عليكم ورحمة الله وبركاته
خواتي وأخواني بمنتديات عروس .. أنا رجعت لكم من جديد .. أتمنى ترحبون فيني مثل ماتسوون كل مره انقطع وأرد فيها
هالمره أنا راجعه لكم بعد انقطاع دام حوالي ست أشهر لو ماكان أكثر .. اللي مثلكم محد يقاطعه ابد .. ولكن لكل منا ظروفه
أنا رجعت لكم بعدما قررت الخروج من حزني وألمي لفراق عمي رحمه الله عليه .. وأسكنه فسيح جناته ..
هالحكايه صار لها فتره .. ولكن ماقدرت اطلع من هالحاله إلى يومنا هذا ممكن مر على الموضوع حوالي ست شهور مثل ماقلت
ولو للحظه مو قادره استوعب اللي صار وكأني فقدت روحي بعدما فقدته لا الضحك ولا الوناسه ولا سعه الصدر اللي كنت فيها
بقى منها شي .. كل يوم يمر يذكرني فيه اكثر من الأول كل لحظه تذبحني وأنا اتذكر صوته و كلامه ست شهور ما طلعت فيهم
برا البيت إلا للمستشفى أو للصلاه في رمضان بالمسجد .. حياتي صارت أكثر من ممله رغم أنه مايسكن معنا بنفس البيت ..
لكن الظاهر إنه كان يسكن بداخلي .. أحس ان حزني عليه كسرني ماقمت افكر في شي في هالدنيا ولا اهتم بأي شي
انا اعرف ان الحداد على الميت والحزن عليه اكثر من ثلاث ايام لوماكان زوج حرام .. لكن ماقدرت .. احس اني فقدت كل طعم
وكل لون للحياه ماقامت تفرق معاي .. حتى صحتي وحتى اهتمامي بكل جديد .. كل مافي هالعالم ماقام يعني لي أي شي
كنت وانا اتصفح عروس يجلس معي يقول صدق انك مصرقعه .. واحيانا يقول تافهه .. هايفه .. قمت اشتاق حتى لها الكلام
منه بس اهو وين ..وانا وين .. غيابه ترك في قلبي اكثر من جرح .. لاني ماتصورت يجي يوم واشوفه فكيف اشوفه
في ثلاث اسابيع يصارع الموت ..وبعدها اشوفه ميت .. كنت اغالط نفسي واكذب نفسي .. ومع مرور اول عيد بدونه
صدقوني ماكان عيد .. كان اول من يدق باب بيتنا يعايدنا .. يوم يلاقيني نايمه .. يتفنن في تعذيبي لحد ما اقعد من نومي ..
اول الصدمات كانت مرضه والثانيه .. اللي كانت القاضيه بالنسبه لي هي وفاته .. اللي هي بالنسبه لي جرح يتجدد مع كل يوم
يمر ما اشوفه .. ولا اسمع حسه .. كان اكثر واحد بالدنيا يدق على موبايلي .. حتى اكثر من صديقاتي .. واللي زاد من سوء حالتي
اني ما قدرت ازوره قبل يدخل الغيبوبه .. لاني يومها كنت مسافره بالأول كنت احس ان المسأله عاديه ..ماحاولت اقطع سفرتي .. لأني ما توقعت انها
بتنتهي بالموت .. الموت نهايه كل حي انا عارفه ..
كنت ازوره وهو بالغيبوبه مدري لو كان يحس فيني ..
اللهم اجرني في مصيبتي ياارحم الراحمين .. وثبتنا على طاعتك ..
مو قادره اكتب اكثر مما كتبت
انا حاولت ارجع عشان اطلع نفسي من حالتي اللي انا فيها وهذا كان قراري اولاً وقرار اخواتي بالبيت
اتمنى اني ما اقطعكم مره ثانيه .. اتمنى تساعدوني اطلع من هالحاله .. ولكم جزيل شكري