مغامرة لولوة و هجورة --- رواية ولادتي مب قصة

السلام عليكم ورحمة الله وبركاته

طبعا كل حد يشوف اسمي يكح من الغبرة عشان من زمان ما دشيت .. بس شو اسوي الغايب حجته معه

طبعا مثل ما الكل متوقع هاي قصة قبل النوم فعشان جيه طفوا الانوار و حطوا موسيقى هادية ... استغفر الله بدال ما تذكرون ادعية النوم تسمعون لي قران الشيطان ----------> جنه اليوم في وحدة بتتكفخ تكفيخ :pain:


بنات من اللحين اقول اللي يخافون من الطلق الصناعي يشلون قشهم و يعطونا مقفاهم و الشردة نص المريلة .. حشى من طلق ولادة طلق حرب هذي


يالله دشي بالموضوع مللتي فينا .. ان شاء الله ان شاء الله



طبعا اللي كان متابع ازمة ولادتي .. اني انا وايد اتأخرت نقعت اسبوعين و نص و كنت ناوية اكمل المارثون بس شو صار الله يسلمكم .. قبل العيد بيومين فليل سرت أفحص الفحص الروتيني و التخطيط و غيره .. و انجلعت عيني و سرت عند ماتيفا بويلكير بدل الوصل ... طبعا انا ما راجعت عندها من السابع صرطنا لنا هزبتين قبل الفحص و بعد الفحص اكلنا غوزي هزبة بلقمة وحدة .. حشى وحش

شو قالت .. ماشي ماي حول الجنين و أول ما يبدا الطلق الطبيعي الياهل بيموت :eek2:

فال الله و لا فالها .. طبعا انا اتروعت بس مسوية عمري متامسكة .. المهم قالت لي بنسوي تخطيط للجنين .. و اعوذ بالله من الممرضة... اللحين لما انسوي خطيط ما ياخذ دقيقة عشان يحطون حزام التخطيط اتصدقون هاذي خذت ربع ساعة و لا بعد بتكمل انا اتمللت و قلت لها خلاص ما ابغي و رحت لماتيفا جان اتقولي هاذي احسن ممرضة عندنا .... منو عطاها شهادة التمريض .. الله أعلم ... شهادة غش :down:

المهم عطتني موعد طلق صناعي بعد ما اتخلص اجازة العيد لأن محد بالمستشفى يولد !!!!!!!!!! ... و هاذي يبين ميزة الوصل .. انه لو اجازة دوم حد موجود :ok:

يعني انا اعتبر بمقاييس المستشفى حالة طارئة و هم أجلوا الموضوع عشان اجازة .. يبغون يتكشتون الظاهر بالعيد و يتمشون بسوق نايف و الكرامة

المهم طلعن من عندهم و على طول الوصل .. قالت لي الدكتورة شي ماي بس مب وايد يعني اذا بتولدين ما فيها شي عادي و ما بيصير بالياهل شي ان شاء الله .... المهم انا رفعت راية الاستسلام و دخلت للصناعي .. و كانت ليلة العيد .. ولما يت الدكتورة تكشف لي الفحص الداخلي قالت لي 2 سم .. و لا فاد معاي مشي و لا اعشاب و لا شي ..يادوب الحلبة اثرت شوي بس ... و على الفكرة ما يعور ابدا و لا اتحسين فيه .. و السر انج تتطالعين عيون الدكتورة و اتكلمينها قوليلها شوي شوي و زيدي الجل .. بيخلص الفحص و لا عندج خبر ... حطت لي التحميلة الاولى بالليل الساعة 1 .. و ما صار شي .. لا ويع و لا شي و ابغي ارقد ..ما قدرت كل ما غفلت عيوني اللي حذالي تصرخ انش متروعة جني ابغي انقذ حد .. و على هاي الحالة لين الساعة 4 الفجر .. بعد ودووها عني عشان ارقد .. عقب ما طلع الفجر حضرتهم .. المهم الساعة 7 التحميلة الثانية .. لما حطوها طاحت الأولى ما ذابت حتى الدكتورة استغربت ... المهم على العشرة يت الساحرة العودة مالهم ديب .. المهم لا فحصت بطني و لا الرحم و لا شي .. قالت لي البيبي كبير و الحوض ضيق و عملية قيصرية الساعة 2 الظهر !! ........... لــــــــــحـــظــــة شـــــــــــــــوي ..شو صاير الدنيا ..شو الموضوع :qaq:

طبعا هي تكره الشخص اللي يناقشها و استضعفتني عشاني بروحي و محد وياي و كانت اتقولي اصلان انتي مستحيل اتربين طبيعي .. و القيصرية على 2 الظهر .. و حتى لو تمشين و تتنططين ما بتربين طبيعي ... الله لا يعودها ان شاء الله .. اسلوبها وقح و اتروع اللي ما يتروع ... المهم كالعادة انا مسوية عمري عادي و لا جنه صاير شي ..

و هي طلعت من الباب من صوب و الا وانا داقة على امي تلفون و الدموع اربع اربع " امي انا ما ابغي قيصري " و اصيح لها و هيه اتحاول اتهديني و اتقولي كل الناس سوو قيصري و ما فيهم شي لا اتخافين .. و سكرت عنها و لين ما يتني و هالكلام الساعة 10 من صباح العيد .. و دقيت على ريلي وحليلة كانت ليلتين قبلها مب راقد كلها وياي و على مرت خاله عشان هيه بعد كانت وياي الليلة اللي قبلها و صبح العيد بعدين راحت اتريح شوي بس انا دقيت عليها اخبرها الموضوع .. جان لتقولي لا اتخافين و الانسان لازم يتقبل بعض الأمور و يفوض امره لله سبحانه ..

وصدق عقب ما سكرت عنها و فكرت في كلامها .. اقتنعت و هديت نفسيا الحمدالله

.. المهم ياني دكتور التخدير .. شكله فرنسي و كان يكلمني الانجليزي .. و يسالني عن بعض الامور للتخدير عشان يحدد شو اللي يناسبني .. و لما عرف اني انا عندي كسرين بالرقبة و بعدهم ما التأموا كامل قالي ما شي حل غير ابرة الظهر .. و انا عيوني جنها بيض مسلوق و اطالعه و الدموع مسوية احافير بالخد .. المهم فجأة جان اسمعه يقولي " يا بابا لا اتخافي .. لا تبكي " الظاهر كسرت بخاطره .. وقالي انه يشتغل بالتخدير من 20 سنة و هو سوا لحرمته بالولادتين .. بس حالتين صار عندهم صداع خلال 20 سنة و الباجي الحمدالله ما صار فيهم شي

و انا اطالعه جني باكله بعيوني .. و اقول من وين طلع العربي هذا .. المهم راح و انا تميت بروحي لين ما يا ريلي و سرت اتمشى و لا جنه صاير شي ... و بعدين يت الدكتورة روضة .. صح قبل ما اتعيبني بس ما ادري كيف الله يسر و كانت اتسولف و اتهدي .. و لما قلت لها ليش اتسون لي قيصري و اتقولون لي البيبي كبير و طول اشهر الحمل اتقولون لي البيبي صغير حجمه .. جان اتبط عيونها و اتقول منو قالج قيصري .. اصلان انتي طبيعي و لادتج و البيبي حجمه زين .طبعا هيه فحصت بطني مب مثل عيوز النحس القبلية ...

شفتو كل حد يقول شي و الوحدة اتضيع بالطوشة .. المهم قالت لي بس مدام رئيسة الفريق كتبت قيصري احنا ما نقدر انسوي شي ...... لازم قيصري

اتخيلوا بس .. المهم يت امي و خالتي و مرت خاله و سوو عصابة ثلاثية و طاحوا فيهم .. طبعا دكتورة ديب الدبة محد جانو طاحو فيها .. و روضة كانت موجودة و اتقول لهم خلاص احنا بنعطيها فرصة للطبيعي .. وصلت ساعة الحقيقة .. الساعة 2 .. يت عاد روضة و فحصت ..شو حصلت ...................


نفس الشي ما شي تغير 2 سم ,,, وقالت ببطل الماي عشان نتأكد ..المهم بطلت الماي الصراحة يعور شوي بس مب وايد .. و الحمدالله نزل الماي صافي ..

تـــــــــــحـذيـــر

بتبدا اللحين سالفة الصناعي .. فللي اتخاف عندها مجال للشردة اللحين .. و اذا بتكمل على مسؤوليتها الخاصة ...

المهم حطو الطلق الصناعي اللي بالوريد مب التحميلة .. بس على قولت فوانيس عيوج ما اتشوف النور .ههههههههه

عن جد تألمت و كان فظيع فظيع و فوق هذا ماشي طلق اتخيلو..يعني الم تحت البطن ما يتوقف مب مثل الطلق الطبيعي بين الطلقة و الثانية شوي نفس و يكون البطن كامل .. و زادوا الكمية و الالم يزداد و ماشي طلق ابدا و انا خلاص مب رايمه اتحمل و ساكته و صابرة لين الساعة 4 يت طلقة وحدة .. بس والله الطبيعي وايد وايد اخف من الصناعي ووقت الطلق الم بس محتمل تنتهي الطلقة يرجع الم اسفل البطن يعني مول ماشي راحة .. ولما فحصتني شو طلع 3 سم بس .. و زادو الصناعي اخر شي ما اتحملت .. قلت خلاص مب قادرة وايد تعبانه .. بعدين دخلوا ريلي وحليله .. مع انه ممنوع الرياييل يدخلون بس محد كان موجود الا وحده كانت تتريا اهلها ياخذونها .. يلس وياي و انا تعبانه مب قادرة اتحمل بعدين سار للصلاة .. و يزيدون الكمية و الطلق مب راضي ينتظم .. قلت خلاص انا ابغي ابرة الظهر ما اروم اتحمل اكثر عن جذيه .. بعدين يت دكتورة امل الملا بعد هاي ما كانت اتعيبني بس سبحان الله كيف ربي يسر اموري ذاك اليوم سبحان الله .. جان اتقولي بنعطيج ابرة الظهر لأنج وايد تعبانة وتتألمين و الرحم مب راضي يفتح الا 3 سم ..و بعد هذا التعب كله احتمال القيصري وارد

المهم قالوا لي لازم تحميلة التنظيف .... والله بنات خرعتوني على الفاضي .. من كثر ما سمعت قصص البنات اتحرى يحطون لنا جهاز مع وايرات و كهرباء و عفسة .. طلع الموضوع علبة محلول صغيرة فيها مخروط و انتهى لموضوع بس الوحدة تاخذ نفس لما يحطونه مع الاسترخاء .. و دقايق على الحمام و بس .. و لا جنه صار شي
المهم ودوني غرفة الولادة رقم 6 و الله الله على المنظر شير و طبيعة و عصافير و ابراج الامارت و غروب الشمس .. مشهد رومانسي لولا ويع الولادة حتى كلهم تمو يتأملون المشهد الحلو ..بعدين يا نفس الدكتور مال الولادة و رمسني بالانجليزي ما جني كاشفتنه ..طبعا خففو كمية الطلق الصناعي عشان اروم اتحرك شوي و اهدا

المهم طمني و قالي لا اتخافين و انا بحط لج غطاء اخضر و بغطيج و بيكون الغطاء حار بس لا اتخافين .. المهم طبعا انا من ابرة تحليل الدم اتروع و احيانا اصيح بهالعمر جني ياهل .. فكيف عيل ابرة الظهر المهم و هو يحطي الابرة حسيت بقشعريرة بجسمي و خيفانة اتحرك ..اخاف يصير لي شي .. و دقايق و قالي خلاص انبطحي .. كل شي تمام

عاد انا اتحرى خلاص بيختفي الالم و بربي مثل شربة الماي .... بعدين هم ما صدقوا حطوا ابرة الظهر جان يرفعون كمية الطلق .. بعدين الساعة 7 صار 5 سم و انتظم الطلق بس لما اتيي الطلقة احس ظهري بينفصل من جسمي و لما اتروح و لا جنه فيه شي .. الحمدالله افتكيت من الم بين الطلق.. وعلى الساعة 9 و نص صار 7 سم و انا احسن خلاص مب رايمه اصبر اكثر .. و على 10 احس صدري شي و بطني و ظهري شي ثاني بينفصلون عن بعض .. و انا اقولهم مب قادرة اتحمل خلاص مب رايمه .. و لما فحصتني الممرضة قالت خلاص 9 سم ولادة .. و لما يت الدكتورة عبير قالت 9 سم بس الياهل فوق ما نزل بعيد لازم انتي اتنزليه روحج .. المهم كان وياي ريلي و امي و مرت خاله ...

على اول طلقة غمضت عيني و فتحتها اشوف فرد من العصابة ناقص .. وين امي .. امي شردت هههههههههههه ........ الظاهر الامهات ما يتحملون يشوفون بناتهم يولدون ..

المهم تمت لزفر لين ما نزل الياهل بعدين شو صار .....وقف الطلق .....يتمصخر وياي الظاهر ..... اتخيلوا بين الراس و الطلق وقف و هم يقولون لي يالله طلعي الياهل اقولهم ما فيني ويعه بس انا كنت اشد من نفسي بس مب قادرة الطلق وقف ... جنه نلعب وياه بالسكة

و اخر شي شو صار يابو الملقط و سحبوها طلعت زرقا بكبرها حتى ويهها ازرق.. انا عاد يبست من الزيغة و ما صاحت الا صوت المزغود خفيف يالله ينسمع على الساعة 10:37 ..و خذوها برع الحجرة بعدين يابوها صغنونة فديتها و مستغربة من العالم تتطالع حواليها و ساكتة و الكل مستانس عليها و مستغربين من سكوتها ..

طبعا ما حطوحا بحضني و لا قالولي رضيعيها و لا شي مالت عليهم .. ويا وقت الخياطة ..اتصدقون وقت الخياطة اطول من الولادة نفسها ,,,, و كانت 3 قصات داخلية و وحدة خارجية ووحدة من الخلف لأنه شكو ان صار لي نزيف داخلي ..و الدكتورة نفسها قالت لو وحدة غيري جان بتبهدلج بالخياطة .. بس الحمدالله انا تخصصي خياطة تجميلية ... والحمدالله رب العالمين

المهم انا حسيت انه بنتي مب طبيعية و اقول للدكتورمال الاطفال شكله هندي انه فيها شي و هو بس اللي يقوله ما فيها شي كل شي تمام و طلع برع .. ريلي ساله مره ثانية اتخيلوا شو قاله " هو زين ومافيه شي " .. جان يساله ريلي ..ليش هو ولد و لا بنيه .. اتخيلوا الدكتور شو قال ""ما أدري أنا ما فحصت" ...اتخيلوا بس بالله عليكم هذا كلام يدش العقل.. و لما راح انا ما اتطمنت قلت للممرضة لازم اتنادين الدكتور مرة ثانية .. و هيه لاحظت انه تنفسها غريب .. و لما يا الدكتور دخلوها العناية 4 ايام و الحمدالله طلعت .. بس ما حطوها على صدري و لا شي .. عشان جيه ما فيني حليب وايد و الدكتور قالي بنتج ما تنمو ما يكفيها حليبج لازم تبدأين بالصناعي ... شو ما صحت صياح ..لين اليوم لما اعطيها الصناعي اتيني صيحة .. كله منهم المفروض يهتمون و يخلوني ارضعها .. و انا اشدراني كنت تعبانة و لا يا على بالي الرضاعة و ريلي قالهم بس الممرضة طنشت .. و انا ما انتبت له .. و للحين ندمانة اني ما رضعيتها اول ما انولدت .. مب قادرة اسامح نفسي .. خصوصا لما اتصيح تبا ترضع و انا لين ما اخلص المرضعة ياخذ وقت ,..يتقطع قلبي عليها

طبعا انا اتأخرت بقصة الولادة لأني ما كنت قادرة ايلس او اتحرك اسبوعين و كنت وايد اتألم من الخياطة .. طبعا انا ما كان ينزل مني شي بس قطرات .. انا قلت يمكن عشان وايد نزفت بعد الولادة مباشرة .. بعد اسبوعين شو نزل من .. اتخيلوا نزلت مني كرة كبر نص قبضة اليد .. كرة ممن الشاش ........ اتخيلوا انه الدكتورة نست اتشيل الشاش بعد ما خلصت الخياطة ..بعد ما طاحت كرة الشاش طاحت وراها قطعة وحده من الدم بس .. و بعدين كله قطرات عقبها بديت ايلس و امشي و اتحرك .. الله يسامحهم .. عشان جيه انتبهوا .. لازم اتذكرونهم انه يشيلون قطعة الشاش ..وانا تميت 6 ايام و الدكاترة يفحصنوني يعني ما لاحظو حضرتهم و لا سالوني مع انه اربيعتي اتقولي كل يوم يسالونها عن النزيف و كل يوم تنزل منها قطع

و الله يستر

المهم احب اقولكم هجورتي الحمدالله اللحين زينة و انا ما اتوقعت الامومة جيه و لا اتوقعت انه فيه فرحة بالدنيا مثل فرحة الام بالياهل طبعا هذا عقب ما تنسى الولادة شوي .. بس سبحان الله الم الولادة ينتسي .. يعني انا ما اذكر كيف كان.. اذكر الاحداث بس . واقول كله يهون عشانها

و ربي يرزقكم ان شاء الله

بسج هذربتي علينا وايد .. راسنا عورنا منج .. خلاص خلاص خلصنا .. و توتة وتوتة خلصت الحتوتة

و سلام خاص لجمانة لأنها كل حين تسألني عن ولادتي .. ها جمانة انشاء ما عورنا راسج انا و هجورة 
:cool2:





.