يا ريتني ما سألت السؤال هذا ؟؟

اليوم على التلفون كلمت وحده رفيجه الوالده ،، الله يذكرها بالخير ،،
ويساعدها على ما بلاها ،،

الوحده هذه ام لثلاث اطفال ،، او خلني اقول انهم كبار الحين ،، بنتين وشاب

وكلهم في الجامعات ،،

مشكله الام هذه ،، انها بنت حموله ،، ( ادري بتتعجبون لما اقول انها مشكله )

لانها بالفعل بالفعل مشكله بالنسبه لها ،،

اسمها ....... ينتهي بإسم كبير جدا في البلد ،،

تقول انها ،، تزوجت واهي تبلغ من العمر 36 سنه ،،

يعني بعد مو بس طافها القطار ،، تقدرون تقولون انها يأست من الزواج

محد كان راضي يتقدم لها ،، لان اخوانها واهلها كلهم ،، ما شاء الله عليهم مناصب كبيره في البلد
واهي ما فيها شي من الجمال يغري احد من اهلهم انه يتقدم لخطبتها

وكانت مشغوله بالتحصيل الدراسي ،،

او خلنا نقول على قولتها ،،

يا غنوش ،، من الفضاوه سويت ماجستير ودكتوراه ،، عشان الناس لا تسألني انا للحين ليش مو متزوجه !!

شقول ؟؟
عنست ؟؟
شقول ؟؟
كل ما ييني واحد يرفضونه اخواني ،، لاني بنت عز ،، واهوا طماع على قولتهم او داخل على طمع ؟؟

مني ليما وقفت مره في وجه الكل ،، وقالت كلمه ( لا )

وتزوجت غصب عن الكل ،، اهلها كلهم حطتهم قدام الامر الواقع ،،

وخذت الشخص الوحيد اللي صج تقدم لها ،، واكثر من مره ينطرد من بيتهم ،،

وهم ما يأس ،، حاول وحاول ،، مني ليما تزوجها ،،

كان هذا سنه الثمانين ...

بدون

اللي تزوجته بدون ،،،

حاصل على ثانويه عامه


وكان عنده جواز سفر حاله حال الاغلبيه في تلك السنه ،،

ولا هو عسكري ،، ولا هو بالداخليه

يشتغل في احدى وزارات الدوله ،،،

وتزوجته في احدى الدول العربيه ،،

وغصب عن اهلها ،، وعن الكل ،، تم اثبات الزواج في المحاكم الكويتيه

ورزقت منه بالشباب اللي انا قلت لكم عنهم بنتين وشاب ،، بعمر الزهور ،، كلهم في الجامعات الحين ،،،

بس لمتى !!!


كان اول تصرف اخوانها ،،،

طرد زوجها من الوزاره
حرمانه من الجنسيه وحتى من دخول ملف الجنسيه
محاربتها وطردها من البيت
الاستيلاء على اموال المرحوم ( الوالد )
الاستيلاء على جميع مدخرات الوالد في الخارج و حتى الاستثمارات الخاصه فيه
حتى البيت خذوه منها وطلعوها من البيت
محاوله بكل طريقه انهم يعرقلون كل شي خاص بالزوج ،،

انسحب الجواز ،،
العيال ما عندهم الا ورقه تقول معامله كويتيه تنتهي عند بلوغهم سن 18 سنه ،،،

وكبروا العيال ،،

ويبون يروحون الجامعه ؟؟

ويا الله على الجامعه

جامعه الكويت ؟؟

مستحيل

معامله الكويتي راحت ما يقدرون ،،،،

جنسيه ما يصير ،، ابوهم خلوه يثبت نفسه !!

صارعت وحاولت اكثر واكثر

بنت سجلتها في جامعه الخليج ،، وبنت سجلتها في جامعه في الاردن وسجلت اخوها معاها عشان لا تتم البنت بروحها ،،

ما قدرت الا على مصاريف بنت واحده ،، يعني الراتب جم 1000 فيه ؟؟

بس المشكله ؟؟

بعد الكورس الاول في الجامعه ،، لما ردوا الكويت بالصيف ،، اسحبوا منهم الجوازات !!

الجوازات راحت ،،

ومستقبلهم راح معاها ؟؟

تركض الحرمه تبي جوازات عيالها ،، ما في ؟؟

البنت والشاب وقفووا القيد ،، لهم الحين كورس كامل موقفين القيد ،،

ولا حياه لمن تنادي ،،

تروح لاخوانها ساعدوني بمكالمه تلفونيه تقدرون تشيلون الحمل هذا كله من على ظهري

محد راضي ،، مكالمه تلفونيه حق الوزير فلاني او حق الوكيل فلاني ،،

ما في ،،

تطلقي ،، انتي اخذتي ريلج وحنا ما نبيه ،، (( اهم من البدايه يبونها تتطلق ))

وصج ،، تطلقت الحرمه شهر 8 اللي طاف ،،

وخلصت العده ،، وقالت لخوانها ساعدوني ؟؟

قالوا لها انتي توج تتطلقين عشان حنا قلنا لج ،، لا ما في

راحت حق الجنسية والجوازات ،، طلعوا جناسي حق عيالي

انا كويتيه وزوجي بدون وعيالي بدون وطلقني ،، ما لي غير ارضي ديرتي ،،

ما لي احد غيركم ،،

لا ما يصير ،، مو كل شي بسهوله ما تقدرين ،،،

الحين ....

- الام تطلقت ؟
- العيال ناطرين رحمه الجواز ؟
- والام تركض بوزارات الدوله ؟
- والاخوان ناكرين حلال الام وما معترفين فيه ؟ ولا يبون يساعدونها ،،؟


كان هذا رد رفيجه الوالده ،، لما سألتها،،، انتي كبيره بالسن شلون تطلبين الطلاق من ريلج وتتطلقين ،، ما خفتي من كلام الناس !!

ويا ريتني ما سألت السؤال هذا