اهل زوجي و تجربتي معاهم ...

السلام عليكم ورحمة الله وبركاته


هذا الموضوع بكتبه عشان حلا قطر و اي وحدة تحاتي كيف بتكون حياتها مع اهل زوجها

اول ما انخطبت في ناس قالوا ان اهل ريلي طيبين بس يحبون يتحكمون في كل شي كل شي و عادي باجر يتحكمون في حياتج

اول شي ما شليت الموضوع و اعتبرته اكبر مشاكلي تجاهلت هالشي

في العرس لاحظت شوي محاولاتهم في التدخل
اختاروا الدخله و قالوا اسمعيها اذا تعجبج .. كان ممكن ما اسمعها و اقول عناد عسب ما يتحكمون ما اباها .. و شفت ضيق من وجه خواتي مثل ما يقولون لسان حالهم يقول حتى في هذه بيدخلون ؟؟؟

مع هذا سمعتها وعجبتني وقلت لهم اوكي
من الناحيه الايجابية ريحوني من الصدعه واني ادور دخله حلوة وغير عن الكل ...واهم شي اني كنت مقتنعه منها مب بس مجامله فيهم

بعدها قرروا يدورون على دي جي لانهم خافوا اني احط موسيقى وانا عندي عادي موسيقى في العرس
وهم لا ..انا قلت اللي ما اباه وهم اللي يبونه ووصلنا لاتفاق

لان عنديي قاعده هذا اخوهم الصغير والاخير يبون يفرحون مثل ما انا ابا افرح ..

صح عرسي كان بسيط بس حلو والكل كان يرقص لدرجه اني بغيت ارقص هههههههههههه

احيانا تستوي مواقف بس ما ازعل منها او اتضايق احاول اتجنبها يعني ما اخلي الافكار السلبيه اتمم معايه

يعني كم مرة عمتي نازعتني .. انا اقول هيه حرمة كبيرة عادي
مثل امي امي احيانا تهزء فيني هههههههه يات على عمتي بزعل منها

حرمه اخوه وعيالها لو انا تضايقت منهم وتأففت منهم واقولهم لا تدخلون عندي وانازعهم اكيد امهم بتكرهني

اقرب طريق لقلب اي مرأة عيالها ..لانهم اغلى شي عندها اذا حبيتيهم وحبوج بتحبج امهم ...وعامليها بالحسنه

والهدايا بين الفترة والثانيه تشل اي شي في الخاطر وتقرب القلوب


نسيت اقول ان اكثر شي يضايقني الحينه هو انتقاداتهم تجاه بنتي
يعني لبسها مب عاجبنهم .. اكلها .. رضاعتها .. حتى لما تتعب و تمرض يبون يعرفون قبل ما اوديها المستشفى ...

بس انا بين الفترة و الثانيه اطلع حرتي و اشتكي لزوجي و هو يقولي هذه بنتج انتي و انتي اللي تعرفين شو تحتاج
و قررت اني اتجاهل اي شي و اسوي اللي يعجبني انا ..

واسمحولي اكتب بسرعه ابا اطلع يوم الخميس ما ابا اخيس والكل طالع الا انا ههههههه