الرجو منكن المشوره يااخواتي.. :(

السلام عليكم ورحمة الله وبركاته ..

اخواتي الفاضلات اسعد الله اوقاتكم بالخير والسعاده ان شالله ..

هاذي اول مشاركه لي ولكن ماتمنع اني متابعه للمواضيع هنا بشكل جيد
وماشالله كلها مفيده ..

بصراحه عندي مشكله مضايقتني كثير وحابه افضفض عسى ان القى منكم اللي يريح لو بكلمه بسيطه ..

انا متملكه من تقريبا 3 شهور وكم اسبوع من شخص كل الصفات المطلوبه بالرجل موجوده ولله الحمد وانا مرتاحه كثير بالامر ولكن بدت امور تضايقني منه بموضوع معين حاولت اوضح وتكلمت من قبل معاه فيه بس من غير فايده يرجع لعادته

والسالفه هي انه زوجي بدأ يتكلم عن العلاقة الخاصة بين الزوجين بشكل مفرط ماانكر بالاول ماكان فيه مشكله للتوضيح يعني الوحده تكون على خلفيه بالامور المحببه لزوجها وتفكيره من هالناحيه بس مو بالشكل الكثير زي كذا مااكذب عليكم صارت اغلب سواليفه كلها بالمواضيع هاذي ومهما احاول اغير الموضوع او افتح موضوع مهم يخصنا بسرعه ينهيه
زواجنا بالصيف وماادري للان اسلوبه وتفكيره بامور تخصنا بحياتنا كيف يفكر فيها ودي اعرف امور كثيره مهما احاول اوضح له انه مو كل الحياه علاقه خاصة ماانكر انها شئ اساسي خاصه للمتزوجين حديثا بس مو معقوله طول الوقت كذا !!! من جد احس اوقات كثيره ماودي ارد عليه او اتكلم معاه من كلامه واسلوبه اللي بعض الاحيان احس بقرف !!
الا الان انا ماسكه نفسي واخذ معاه بالاسلوب اللي ممكن اوصله المعلومه ماابي اخسره بالعكس عندي استعداد لكل شئ بحياتنا من امور تسعده بس الحين ابي اقرب منه اكثر وباسلوبه هاذا احس انه مايبيني الا للشئ هااذا ويحز بخاطري افكر بكذا ويحزني كثير ..

وش اسوي اخاف بعدين لما يتشبع من هالموضوع يسير عادي معاي ويكون ممل ورتيب مهما اسوي له .. الحمدلله انا على قدر من الوعي بكيفيه لفت الانتباه من كل النواحي والامور هاذي ماشالله موجوده هنا لكل من تحب تتعلم لتفيد حياتها الزوجيه ,, بس الحياه مو كلها كذا وانا اطمح لحياه جميله مو رتيبه ..

بس المشكله ان زوجي مو فاهم هالامر مهما اوضح له مافي فايده اذا بان علي ان متضايقه ووصلت حدي يزعل ويقفل من دون مراعاه لمشاعري يعني مايتكلم الا بكذا ولا مايتكلم وشلون اجل نتناقش لامور بتجمعنا بعدين .. معقوله كل الرجال كذا بالملكه مااتوقع ...؟؟

والحل وش اسوي مااحب الحركه هاذي ياانا انصاع له واتماشى لكلامه وينبسط من دون مايكون لي رأي او مراعاه لشعوري .. او انه يقفل ويطنشني ....

اسفه كثير ان طولت بس من جد من كثر ما انا متضايقه ومرفوع ضغطي قلت افضفض عند اخواتي على الاقل بيتفهموني .. مجرد الكلام يريح بغض النظر عن عدم وجود الحلول..

اتمنى فهمتوني والمعاناه اللي انا فيها ..