لو طلبك شخص يقول كذا !! توافقين ولا ترفضين؟

بسم الله الرحمن الرحيم

السلام عليكم ورحمه الله وبركاته

عزيزاتي خواتي جيت لكم بسالفة رفيجتي .. متقدم لها شخص ومحتااارة بين الرفض والموافقة

اولاً الشخص الي متقدم لها كان مجرد زميل لها بالجامعة
تخرج صار له سنتين وهي بعدها في الجامعة تدرس
يعني الي كان بينهم سلام عليكم السلام فقط لا اكثر ولا اقل .. زمالة عادية جداً

بعد السنتين تفاجأت البنت - رفيجتي - انه متصل فيها يطلبها للزواج
هي انصدمت .. شلون هذا الانسان طالبنها !! يعني لم يبدي لها يوم اعجاب او نظرات تلمح بشئ او او يعني ما شيئ خاااااالص
طلب منها انها تفكر .. ووعدته انها بتفكر


طبعاً الشخص طلب منه انه يحضر لبيت البنت عشان مقابلة .. على اساس انه يتعرف على اخوها الكبير وعمها .. وهذه مقابلة هامة ربما نظرة الزميل تختلف وتصير ممكن تتقبلة كزوج

كل الي دار في المقابلة .. انها ما تكلمت إلا فقط عن دراستها وعملها - لانها اساساً ما كانت تفكر بالزواج على الرغم من خطابها الكثر الله اكبر - وهو تكلم وقال لها : اني ما ابيش تطبخين ولا تكنسين ولا تغسلين ولا تمدين يدش بشئ في البيت .. ابيش زوجة ابيك كمرأة تحن علي وتحفظني بحضوري وغيابي وما عندي مطلب ثاني ، ومستعد اشوف لك بعد ما تتخرجين اي شغلة انتى حابتها وكل الي اطمح اليه انش تكونين سعيدة، وطبعا راح نسكن في شقة لوحدنا مستقلين عشان تاخذين راحتش في مكان لش لحالش

طبعا هالشخص بخير ويشتغل شغلة محترمة ومن عائلة محترمة ومعروفة

صار لها نص شهر وهي تفكر مو عارفة تتخذ قرار!!

وخصوصاً بعد ما باح لها باسراره .. والي من اهمها انه كان بيتزوج وحدة من قبل .. بس كانت جداً سيئة الخلق وتسبه وتسب اهله وتتبله عليه .. فأنهى الموضوع معاها ومع اسرتها انها ما تنفع له وابوة رفض هالبنت بشكل قاطع .. ثم شاف بنت ثانية في مكان عملها وتقدم لها بس ما صار نصيب وما تم الموضوع، لانهم الاثنين حاملين لمرض وراثي ونفصلوا.

طبعاً الاولى حباها .. وفي الوقت الحالي نساها تماما ولكنه متألم من تصرفاتها معاه وشلون كان يعزها ويقدرها وهي تهينة وتخدعة مع غير .. وهذا الكلام قاله لرفيجتى


رفيجتى بصراحه بنت ملتزمة .. الله يشهد انها ما تعرف لا تخون ولا تشذب ولا تخادع احد.. والأهم من هذا كله انه تنظر في كل الامور لربها ومن هذا المنطلق تتصرف


كلامه عن البنتين ازعجها جداً .. وصرت اشوفها حزينة ودائماً تقول لي: "بعد ما كنت حاسة اني بفرح حاسه حالي تعيسة" .. خايفة لا حُبه الاولى ينبض في يوم او انه يفكر في غيرها بيوم ثاني .. او انه من السهل يتركها ويروح لوحدة ثانية!!! على الرغم من انه قال لها انا اقدر اسكت وما اقولش اني كانت لي تجربتين سابقتين .. لكنى حابب ابدأ معاش كل شي بالصراحه والوضوح


وهي فوق كل هذا تسأل .. هل بقى في قلبه مكان يحبها ؟؟؟


* ملاحظات :

- مع ان اهل البنت حالياً يسؤلون عن الشخص هذا، وكل الي سمعوه خير يصلي بالمسجد حتى صلاة الفجر يطلع يصليها جماعة بالمسجد .. يعرف ربه يحضر للناس ويوجبهم .. طيب .. وعائلتة محترمه ولهم صيت في البلد.. خفيف دم اهم شيئ عنده الانسان ما يهتم بالمادة.. مواضب على شغله ويحب شغله حتى الاجازات عنده فايضة. هذا ما سمعناه عنه

- عمر رفيجتى 22 وهو 25
- مجال عملهم واحد

اتمنى منكم المسااااعدة الله يخليكم ووفقكم


اختكم
الشيخة