أكيد مشكلتى اغرب المشاكل ..ارجو المساعده

السلام عليكم ورحمة الله وبركاته

كيفكم اخواتى الحبيبات
برغم انى قريت كتير عن مشاكل بعضكم وقولت حل او رد لبعضهم الا انى فى مشكله تعبانى الى اقصى درجه ممكن تتخيلوها
اعتذر عن طول المقدمه وادخل فى الموضوع
انا بحب شاب من حوالى 3سنين وهو كمان بيحبنى او بمعنى اصح بيقول انه بيحبنى وبعض تصرفاته تؤكد كلامه والبعض لا ...المهم الشاب عنده مشكله الحب الاول يعنى كان بيحب بنت قريبته ولكن البنت دى اتجوزت من شخص تانى والكلام دا فى مرحله الثانوى ومن بعدها وهو كارهه الجواز ...حاولت افهمه واقف جنبه فى حل المشكله دى بحياده بصرف النظر عن كونى بحبه واحيانا يستجيب لكن بعد فتره بيرجع تانى لنفس تفكيره حتى انى حاولت اقربه من بنات اخرى وامدحله فيهم وادفعه للارتباط بواحده منهم لكن كنت بفشل برغم ان الموقف دا كان شديد الصعوبه عليا كنت بقول يعنى لو فيا شىء مش عاجبه ممكن يختار غيرى ....لكن لا بيختار غيرى ولا بيرتبط بيا
ومش عارفه هو متقعد من اى نقطه بالظبط يعنى مش متأكده هو رافض الجواز بجد ولا عنده مشاكل اخرى هو دايما بيقول ان عنده مشاكل بس مش بقدر اوصلها كمان الموضوع حساس ماقدرش اتكلم فيه كتير ماحبش انه يعتقد انى بجرى وراه وكمان كنت بتمنى انه اذا ارتبط بيا يكون لاقتناعه بيا مش عشان انا اللى بدفعه للارتباط بيا(حبه كرامه يعنىهههههه)
طبعا الكل حيقولى انى غلطانه وانه بيتهرب منى
الجزء الاول انا متأكده منه والجزء التانى اعتقد لا
طبعا انا غلطانه يعنى وحاولت كتير اقاوم الغلط دا وابعد عنه بكل الطرق وبدعى ربى دايما اما يبعدنى عنه لو مافيش نصيبك معاه او يهديه ليا حاولت اكلمه كتير فى اننا غلطانين ولازم نبعد عن بعض ولكن بعد فتره مش بنقدر اللى بينا مش مسأله حب وبس هو تفاهم اكتر من الحب هو اكتر انسان بيحسنى ويفهمنى وهو كمان بيقول عنى كدا يعنى الموضوع احتياج كل واحد مننا للتانى اكتر من الحب انا حاولت ابعد بجد عملت معاه كام خناقه وغلطت فيها اوى عشان يزعل منى ومايكلمنيش تانى وبرضه بعد فتره بنتصالح وهو خد قرار البعد قبل كدا وبرضه رجعلى تانى وانا اقسمت لربى انى مش حرجعله تانى وحاولت بصدق لكن للاسف برضه ما قدرتش صدقونى دايما بفكر فى طرق البعد وبجرب كل فكره تجيلى لكن دايما بفشل حتى انى حاولت ارتبط بغيره واقبل اى شخص بيتقدم ليا لكن ماكنتش بقدر اكمل
وبحس انى مش قارده ارتبط بغيره وبقدر اتصور اى شخص بيتقدم ليا جوزى ابدا
وجوا نفسى عندى قناعه انى مش حقدر انساه ومش عاوزه طبعا اخون اى شخص ارتبط بيه ولو حتى بالتفكير فى شخص اخر ....عشان كدا مش حقدر ارتبط انا كمان
انا لو كان عليا سبب البعد الوحيد عنه هو خوفى من ربى ومن الذنوب اللى بحصدها ...ولو كان عليه هو مافيهوش اى سبب يخلينى ابعد عنه
وانا قولتله مره ممكن نتجوز وتكون علاقتنا زى ماهى دلوقتى نسمع بعض ونتكلم ونحل مشاكل بعض ونونس بعض ........الخ وفى نفس الوقت مايكنش بينا علاقه زوجيه (وانتوا فاهمنى صح) عشان يعنى اقوله انى جنبه مهما كان عنده من المشاكل وانى حتحملها ايا ان كانت وحصبر وقولتله انى هدفى الوحيد انى اسمتر معاه ولكن بدون معصيه وذنوب
نسيت اقولكوا انى عمرى تجاوز الخمسه وعشرين يعنى مش مراهقه والكل يقول عنى ان تفكيرى كبير ومش حب جديد عشان اقول انى لسه فى زهوة بداية الحب
على فكره احنا ما اتقابلناش غير مره واحده ولفتره قصيره اوى وهو انسان كويس ومحترم وصفاته حلوه كتير ....واغلب الكلام بينا حكاوى ومشاركه لحياه الاخر بفرحها وحزنها

نسيت اقول كمان حاجه ان بدايه علاقاتى بيه اصلا كان طلب من بالجواز منى ...لكن قالى اصبرى عليا عشان عندى شويه مشاكل ....وانا ماكنش فى بالى انى ممكن اتحط فى الموقف دا ولا احبه كدا من ورا اهلى كان فكرى انها مجرد وقت وحيجيلى وحددنا كلامنا وقولنا انه مجرد تواصل بسيط لحد ما يعدى مشاكله لكن العلاقه تعمقت وبعد فتره قالى انه مش قادر على الارتباط ...وسألته عن السبب وقولتله حقف جنبك فى اى مشكله وحاولت اعرف السبب الحقيقى لكن ما عرفتش فقولت يبقى هو رافضنى انا ....فبعدت عنه 3شهور وبعتلى كتير انه عاوز يكلمنى وانا كنت فعلا بتقطع فى الوقت دا وكنت تعبانه جدا ولجئت لله جدا فى الصلاه والقيام وحاولت اصبر لكن حصلت صدفه كانت السبب فى رجعونا ..وهى انى عرفت انه تعبان وفى المستشفى من شخص قريبه والشخص دا اصلا ماكنش يعرف انى بعرف قريبه دا ( الشخص اللى بحبه يعنى) وطبعا لما عرفت انه تعبان اتجننت وحاولت اكلمه وللاسف اتشديت له تانى....وقالى انه فعلا كان ناوى الارتباط لكن مش قادر عليه...واحيانا احس انه بيدينى امل زى انه يقولى انا بتمناكى ام اولادى وغيره وغيره لكن ما الحقش افرح الا ويرجع يقولى انا عمرى ما حتجوز والكلام دا ما تتصورش بيجرحنى ازاى

انا عارفه ان سبب اللى انا فيه دا ان اول طريق كان غلط وهو انى سمعت لوعده بالجواز بدون علم اهلى وكلمته وما انتظرتش لما يدخل من الباب لكن كانت نيتى مش انى حتكلم معاه كتير كدا كنا متفقين زى ما قولتلكوا انه مجرد تواصل عشان نعرف اننا فاكرين بعض لحد ما يقدر يدق بابى

انا عارفه الكل حيقولى ابعدى انا موافقه بس قولولى ازاى؟؟؟؟؟؟؟؟؟؟؟؟

انا بتقطع بجد لا سعيده بعلاقتنا ولا عارفه انهيها

ارجوكم ساعدونى

اسفه جدا على الاطاله واتمنى انى الاقى الحل