كيف هي علاقتك مع زوجة أخو زوجك؟؟؟

تسلمين عالموضوع


بس حبيت أدش وأشارك لأن زوجة أخو زوجي هي أختي هههههههههههههههههه
والحمد لله أخوات ومتفاهمات صار لنا أكثر من 8 سنين ولا بعد ساكنين ويا بعض
شفتي كيف !!!! اللهم لا حسد

يعطيك العافية ام عبدالله

ماشفت الموضوع في الركن من قبل
ومتأكدة انه موضوع مهم

لي عودة مع المشاركة بس حبيت أكون من أوائل اللي يردون على موضوعك

الحمدلله العلاقه بينا حلوه ومافي غيوم في الجو ابدا وان شاء الله م يكون في غيوم للابد

انا اول ما دخلت العايله لاحظت انه نظراتها لي مب حلوه..يعني كنت احسها تغار مني وايد وتعاديني بس حسيت انه هذا كله لانها خايفه اني الغي وجودها في البيت خصوصا انه هل ريلي انغصبو عليها يعني اخو ريلي حبها وتزوجها غصب بس انا برضاهم هم اللي اختاروني لولدهم

عن نفسي انسانه ولله الحمد اخاف الله في كل شي وما احب اعادي الناس..وهي بالعشره لاحظت هالشي وشافت اني طيبه وايد معاها واني صادقه في هالشي..لدرجه انه عمتي لو سافرت وردت معاها هدايا..اقول لازم حرمت اخو ريلي تختار اللي تبيه اول شي وعقب انا اختار خصوصا انها اكبر مني بوايد ولها مكانتها واحترامها ..والحين صارت نفس العسل معاي..الحين جنا خوات اللهم لا حسد...الله يديم المحبه ان شاء الله

مشكووووووره اختي على هالموضوع المهم والحلو

السلام عليكم و رحمه الله و بركاته
انا الحمدالله اول ما دخلت من بينهم و هم اصلن اهل انا شوي غريبه من بينهم
مع هذا ما حسسوني اني غريبه وحرمت اخوه اللي ساكنه وياي عسل لو شو تبا بسويلها
و هيه ما تقصر معاي حتى لما تنزل السوق تقولي تعالي شوفي شو شريته
و يوم اسألها هذا من وين ما تقصر تخبرني

بس لو سألتيني عن حريم خواني بقولج تحت العادي وشوي بيوصل لدرجه التجمد ههههههههه

أم المهند ماشاء الله، اللهم لاحسد، الله يديمها عليكم ....

آنه صارت لي قصة ومن يومها قمت آحاسب ألف مرة،، هي معاي بالدوام بس علاقتنا عادية يعني يوم تشفني بالمصعد ومعانا ناس كأني بس أعرفها من الدوام.. آنه بالمرة مافيني شي عليها بالعكس وايد أكبر مني وأحترمها بس وايد تصير أشياء..
أحسها وايد شايفة نفسها على أهل زوجي وطبعا ماتكون بالزيارات أو غيره، وآنه كم مرة من تزوجت سويت عزيمة لأهل زوجي، لازم تعتذر وماتحضر معاهم..

والسالفة الرئيسية، أول ماتزوجت كانوا ناس جايين يخطبون أخت زوجي، المهم كان وايد كبير عليها خاطب كم مرة ومنفصل، بعد ماطلعوا الناس راحت أتصلت بزوجها قالت له أن آنه تكلمت على بيتهم وأني آنه الي خليت زوجي يغير رايه عن الخطبة، مع أن زوجي كان رافض من البداية بدون ماقول له شي... وأتصل زوجها يقول لزوجي لو آقول لك شنو قالت زوجتك جان طلقتها... ومن يومها ابتعدت عنها بس سوالف عامة، والحمدلله بعد هالسالفة أهله عرفوا أصلي وأن معدني طيب...

رومي .. ننتظر عودتك.

مدللة.. الله يديم المحبة إن شاء الله..

Jami.. الحمدلله أن علاقتك معاها زينة والله يسهل الأمور مع حريم أخوانك..

ما عندي إلى الآن...

بس أنتظرها بفارغ الصبر... المفروض إن حماي يخطبون له هذي الفتره... وأبغى يصير عندي زوجة حمى بس إلى الآن ما فيه...

أنا حاليا زوجة كبيرهم... وأتمنى إن زوجة حماي تكون بنفس عمري تقريبا. مع إني أخاف بعض الأحيان إن تكون مرة حماي عليها حركات بس لا إن شاء الله نصير أصدقاء...

بس عجبني الموضوع ولو كان عندي زوجة حمى كان أتوقع إني راح أحط موضوع مشابه...

مشكوره أختي رانيه....

ياهلا يا قمر، إن شاء الله تكون زوجة حماك امرأة عاقلة متفهمة ماتحب المظاهر والنفاق....

السلام عليكم ورحمة الله وبركاته
اما عني فانا مرتاحه من اخت زوجي هي بحالها هب من النوع اللي اتدخل معايا بنقاشات بالعكس هاديه والحمدالله طول وقتها تقرا بكتب دينيه او بالمطبخ او بالزيارات يعني لا عوار راس ولا دوخة

red-door ياهلا ومرحبا بك ، أنت تكلمتي عن أخت زوجك الله يديم العلاقة الطيبة بينكم، آنه كنت أتكلم عن زوجة أخو الزوج، عادة تكون العلاقة متوترة ويتنافسون علشان كل وحدة تكون عند أم الزوج أحسن واللأفضل في الكنات كلهم وأحيانا تنقل كلام عن الأخرى علشان تقلل من مكانتها بينهم وتكون هي بس بالمرتبة فوق...

انا عن نفسي احسها تغاااااااااااااااااااااااار مني

وممكن تنقل الكلام لاهل زوجي لو كذب

واحس انها سبب في تفريق زوجي عن اخوه صار ما يحبه واذا شافني ما يسلم علي

واللع اعلم بس هذا الواضح

وصار لي موقف اول ماتزوجت بعدها خففت العلاقة جدا

ومشكورة ياقلبي على هالموضوع العسل

على فكرة توي اليوم احش فيها بالدوام

مشكورين علي الموضوع الحلو
الصراحه انا عندي ثلاث وكلهم اهل من بعضهم بس انا الي من بره غريبه منهم
طبعا ثنتين موتهم ولا انا لاشافوني كانهم شايفين عزرائيل يغااارون مني ليش ما ادري
معني اعاملهم معاماة الاخت لختها بس اهم اعوذ بالله ليدرجة ان وحده منهم سافرت وشريت لهم كل وحده جلابيه
وحده منهم تخيلو شسوت لبستها خدامتها ليمه درت اني جايتهم وليدرجه اوصلت فيها انها تبي تفرق بيني وبين
زوجي ياناس ليش جذيه والله اني ما سويت فيهم شي والدليل ان وحده منهم تموت علي وتحذرني منهم لانهم يتكلمون جدامها
بعرف ليش الوحده تغار من الثانيه معنها ما عليها قاصر اعيال ومال وزوج ليش
هذا الي ابي اعرفه والمشكله الاكبر والي ملحظينها فيها انها تقلدني في كل شي يعني لبست الدبلها لبست رضعت ولدي من صدري رضعت ولدها ليش يا ناس جذيييه والله يعيني
بس في شعار اقول حق كل وحده نفسي تاخذه
طنش تعش تنتعش

مشكوووووووووورة اختي رانيا البحرينية على هالموضوع والله في كلام ودي اقوله

وكان الله في عونج والله يبعدها ويبعد شرها عنج يارب:)

بل !!!! الله يعينج عصفورة الجنة والله عقولهم صغيرة اش الحركات لكن اللي يشوف اللي عندي يحمد ربه...


انا عندي زوجات اخوان زوجي ثنتين :(

وحدة منهم بالبداية اسبغت علي بالحب اشكال والوان وبعدين قامت قلبتها غيرة وحسد وزعل من دون سالفة و تسوي لي وحدة اب وحدة وووو غير المرة اللي كنت راح اين ليمن حاولت تطلع ريلي لعاب وانه كان يقدر ياخذ اي وحدة غيري وتكلم عنه جدامي وتحاول تسوء صورته جدامي مع ته بالعكس ريال دين الحمدلله يخاف ربه عارف واجباته يخجل من من النسوان ودوم يدعوني للصلاة وقراءة القرآن يعني ريال جذي بوي اللي تقوله !!!اش هالعيارة والجمبزة على قولة ابوي(هاي بطنها حايسها :) ) وازيدكم من الشعر بيت تتصل تسأل ريلها جدام عيوني عن زوجي!!!!!!!!!!

وين الحية!!!!!!

عقب ما ريلي خذاني دشتها الغيرة وابتدت تقارن بين ريلها وريلي وقامت دوم تمدح ريلها جدامي مع اني ما اتكلم عن ريلي جدامها ولا امدحه او اييب سيرته في شي.

وهاي غير البلاوي الثانية اللي ماذكرتها عنها.

والثانية من بعيد الى بعيد علاقتي فيها وساعات احسها تبي تعرف لاقتي مع زوجي شلون صايرة كم مرة يتصل فيني واشوفها تحاول تسمع شنو يقول لي او اقول له..

والله يكون بالعون ويصبرنه ان شاء الله .

جوري 2 ، الله يكون بعونا ، آنه مريت بهالشي بعد السالفة الي حصلت، حسيت أن أخو زوجي مايكلمني عدل او يسلم الا من طرف خشمه، ياله هالأيام آحس في أحسن...

عصفورة الجنة، الله يكون بعونك على هالمعركة حشه كأنكم بحرب، حسد لهالدرجة .. تصدقين آنه بين ولدي وبنتها 7 شهور، كانت تموت قهر إذا يمسكونه وكانت تقول حق زوجها أهلك يحبون ولدهم أكثر من بنتي، خافي الله هذول أطفال حد إيحط باله منهم...

حبيبة ريلها، هاذي يا حبيبتي شكلها تبي تفرق بينك وبين زوجك مب عارفة، أبتعدي عنها وتركيها الي ماتخاف ربها...

زوجة حماي لا تهش ولا تنش يعنى قلبها نظيف ومش حقودة ولا حسودة حتى انا ساعات احتر واحسدها بصراحه على برودها دائما مبتسمة ما تشتكى نفسي مو من النوع اللي ترد نفسي مظلومة حتى دوم زوجي يقول لي جان زين انتى نفسها اخوى مستانس معاها تعرفون ليش لأنها طرمة تشوف وما تسمع وما تتكلم وبحالها بس انا ما اقدر اسكت ...... بس الله يعينى على باقي زوجات اخونه بقوا 3 ما تزوجوا الله يستر ......

حاولت اتقرب منها بس احس انها ما تبي تكون قريبه مني .. مع العلم اني آنه القديمه وهي الجديده .. قلت كيفها تسوي اللي يريحها

نودو، الحمدلله أن الله عطاج وحدة جذي، أن تبعد قصري طولة لسانج وصيري مثلها تسلمين... بس آعرفج من صغيرة وأنت كله مايعجبج العجب... آنه باقي لي 2 بعد ، ننتظر يعرسون ونشوف الحال معاهم..

ندى الدوحة، كان الله بالعون، مادري ليش يسون بيننا حساسيات ،مع أني ماكرها وبالعكس أحبها وأحترمها بس أحيانا أحس فيها تغار مني، هي يوم تزوجت 36 سنة وأنا 25 سنة وماحملت الا قبل زواجي بكم شهر، والله كنت دوم أدعي أن الله يعطيها قبل ماأتزوج وأحمل علشان ما ينكسر خاطرها (جفتوا شلون أفكر فيها)...

اللي يشوف بلاوي الناس تهون عليه بلوته

هذا كل اللي اقدر اقوله ولي عودة اكيد

ننتظر عودتك يارومي....