هل له أضرار على الطفل؟

عيالي لبسو هاللبس من اول يوم بعد الولادة....

وماصار فيهم شي واحمد لله...

بس عندنا عادات .. ان الطفل اول اربعين يوم... مايلبسونه غير (ثياب العافية)..

وهي عبارة عن جلابيات .. قطن خفيف.. تكون طقم مع المهاد والفراش .. واشياءوايد..

وحتى هاللبس من القطن... مصنوع مخصوص اجسم الطفل...

والله يباركلج في البيبي مالج..

معلومة اول مرة اسمع عنها

قصدج يعني انه الريل مسكرة من تحت ؟؟

والله مادري انا ولدي ما لبسته جي وايد لأنه مولود في الصيف .. بس عادي امي دوم تلبس خواني قبل جي

انا الحينه شارتنه لبنتي عسب البرد يوم تنام
و احيانا ترفع ريولها و تتكشف و تمرض

قلت البسها جذي
و محد عجبه اني ملبستنها جي
لا اخته ولا امه و حتى اخوه

و انا مليت من الانتقادات صراحه قمت احس اني اسوأ ام

الصراحه حق الليل انا اشوف انج تلبسين الياهل اوفاروول وايد احسن انا حتى فالصيف البس ولدي ... لانه صيف ولا شتى الحجرة تكون بارده ...

اما اذا فيه حمى ما البسه لانه ما تخلي الحرارة تطلع ...

ومن كمن يوم رحت خذتلة اوفارولات بس غليظه شوي حق الشتا سواءا حق الطلعه او البيت

ويكون عليهم مرتب واريح من الجلابيات يوم تشيلينهم الجلابيه ترتفع وتلعوز وشكله قبيح

السلام عليكم و رحمة الله و بركاته

و الله يا jami من الولادة لحد 6 شهور و أنا ألبّس بنتي منهم...

بالعكس...يدفوها و يغطوها...و بشرتها تظل طرية و ندية من الداخل...

و الحين أدور لها منهم على مقاسها...علشان لما تبدأ تحبي ركبها ما تسود...

مش فاهمة إيش مشكلتهم يعني ؟!

والله آنه من أول يوم ولدت ولدي ولحد الحين ألبسه، مافي ضرر بالعكس يدفى وخصوصا في الشتاء لما يكون الجو بارد مايتغطون و رجلهم تبرد ، فهذا النوع يأدي الغرض..

بالعكس اختي ...

انا افضل هذا اللبس على سواه في شهوره الاولى,,...

لانهم مثل ما تعرفين يعانون الغازات ووجود هذا اللبس الشبك يخلي منطقة البطن حرة يخليهم يرتاحون اكثر...

بالنسبة لمنطقة الرجل.. المغلقة طبعا..

يمكن اعتراض اهلج لأنه لما يرفس الياهل .. كونها مغلقة تعيق حركته..
او مثل ما قالوا الاخوات لو كان مريض ما يطلع الحرارة من جسمه ..

لازم تختارين حجم اكبر من عمره عشان حتى لو كبر يكون فيه مجال حق ريله ومساحة...
واجده لبس مثالي في وقت الشتاء..

بالعكس هذا اللبس يبين الطفل صدق انه طفولي وعسول،،،،،،،،،،،،مافي اي مشكلة اصلا....انا ولدي لحينه البسه عاللبس وخاصة بالبرد

والله خواتي انتقاداتهم ما دخلت مخلي
يعني يقولون مب زين فليل شو فرق الليل عن النهار و بنتي متى ما بغت حطت راسها و نامت
اونه يأثر على الخلايا ؟؟؟
الناس يقمطون عيالهم و يلحفونهم و يغطونهم عدل ما يأثر و هذا اللبس يأثر

انا هذا الللبس يعجبني وايد .. خاصه ان بنتي تبرد اطرافها بسرعه و هيه ماخذه هذه الصفا منى يعني الناس يمكن حرانين بس الاطراف بااااااارده .. و انا قلت البسها خاصه فليل لانها ما تقدر تتنفس باليل من البروده


بس لما شفت رده فعلهم والله شوي و بصيح .. خاصه نظرات عمتي معصبه و زعلانه
كأني بذبح البنت ولا مقصرة عليها
و الله قمت أحس بعدم الثقه في نفسي و اني اسوأ ام و اني مقصرة في حق بنيت و اي شي اسويه ما يعجبهم
والله تعبت و انا ساكته .. احس بيي يوم و بنفجر


قلت اسألأكم يمكن انا غبيه ما افهم و هم يعرفون كل شي و بغيت اعرف في شو هو يضر لدرجه اني قلت بسأل طبيب عن هالمعلومة

السلام عليكم ورحمة الله وبركاته
عزيزتي جامي
الله يباركلك في ولدك ويجعله قره عيني والديه
أما بالنسبه للأفرول فأنا سألتلك دكتوره وقالتلي هذا أنسب شي للبيبي ل 6شهور لأنه يغطي الجسم كامل وبما أن البروده تدخل أولا من اسفل القدم فأصبح من الضروري أن تلبسيه الأفرول وإن ألبسيتيه شيء قصير فألبسيه جوارب لمنع تسرب البروده .
والله يعينك على تربيته

مشكووووووووووووورة أم عمر على هالمعلومة

و امس كنت مضايقه ة قلت حق ريلي محد عاجبنه اللبس قالي مب هيه بنتج لبسيها اللي يعجبج انتي

كلام ريلج صح...

انتي امها وادرى بطبيعة جسمها.. اذا حرانه او بردانه...


وفي بعض الصراويل اللي ريولها مسكرة... ممكن تلبسينها تحت الجلابيات.. اذا حابة تلبسينها...

والشتاء جاي...

الله يعينج ويوفقج...

[align=center]هلا اختي

شوفي اختي هاالبس مناسب وايد للاطفال من يوم ينولدون لين سن سنه وهاذي من تجارب خواتي
وبالعكس الشتا ياي والجو بيكون بارد فهذا البس مناسب ويدفيء
علي الفكره هالبس يناسب وايد فترة النوم
اختي حوالي خلال اليوم تلبسينها لبس عادي وبالليل هاالبس عشان يدفيها
ولا تقولون انا ام مب مثاليه لكن دايم في ناس تحب تبين انها فاهمه انا عندي نفس المشكله
بس الي احسه في مصلحة ولدي اسويه اتبعي احساسج الامومي وشوفي وين مصلحة بنتج
وتسلمين
الاخت مرموم شحالج وشحال عروستنا مريم حبيت اقولج ان البس هاذا متوفر في مذركير لكل الاعمار روحي وشوفي انا من فتره كنت هناك واشتريت لولدي عشان الشتا
هاذا وايد حلو فيه عبارت احب امب واحب ابي

انا لبست اعيالي الثلاثه والحمدلله ما صار لهم اي شيء

وبالعكس هاللبس جدا مناسب للطفل وما عليج من الخرابيط والكلام الزايد

يعني كل هالكلام اللي تسمعينه اعتقادات.

مشكورات خواتي والله ...
و انا شاريه حق بنتي من زمان كل القياسات من 0_3 و من 6 _9و من 9_12
و يوم لبستها اول مرة محد عجبه بس انا كنت بيت امي محد كان يقولي شي
و من 3_6 ما شريت لها كان صيف و كله البسها شورتات ..
بس الحينه برد و اليوم خذتها المستشفى و حطولها اكسجين و عطوها بخاخ لمده اسبوع
مع اني ما اشغل المكيف مباشرة عليها
بس اعرف طبيعه جسمها مثلي بسرعه نبرد ... و هيه الحينه مريضه ..
قلت اول ما يزيد البرد بلبسها و ما سهمني من حد ...


شكرا مرة ثانيه أم عزيز
و ورده حزينه ..
و النوري ..
على الاقل حسيت ان حد واقف معاي .. الكل كان ضدي من خواته و اهله .. الا وحدة من اهله وقفتي معاي .. بس حسيت اني وايد مقصرة على بنتي ...

[بالعكس اختي ...

انا افضل هذا اللبس على سواه في شهوره الاولى,,...

لانهم مثل ما تعرفين يعانون الغازات ووجود هذا اللبس الشبك يخلي منطقة البطن حرة يخليهم يرتاحون اكثر...

بالنسبة لمنطقة الرجل.. المغلقة طبعا..

يمكن اعتراض اهلج لأنه لما يرفس الياهل .. كونها مغلقة تعيق حركته..
او مثل ما قالوا الاخوات لو كان مريض ما يطلع الحرارة من جسمه ..

لازم تختارين حجم اكبر من عمره عشان حتى لو كبر يكون فيه مجال حق ريله ومساحة...
واجده لبس مثالي في وقت الشتاء..[/color][/size][/QUOTE]

roca
مشكورة اختي على الرد
بس هم حجتهم ان يأثر على خلايا العين
شو يخص هذا في هذا ؟؟؟؟؟
مع انه ما يضغط و اللي شارتنه وسيع عليها

السلام عليكم و رحمة الله و بركاته

تسلمي أختي الوردة الحزينة...:)

مع إني كنت في المذركير من يومين...بس كنت أدوّر على بلوفرات و سويترات للشتاء...ما أخذت بالي من هذا اللبس...

خلاص أروح ثاني و أشوف إن شاء الله...

تسلمي أختي ...و سلامي لإبنك الحلو :)

هلا ختيه عادي لا تحاتين هاللبسه ما فيها شي انا البس بنتي من يوم ما نولدت فديتهااااااااا
بس المهم ما يكون صاك على ريولها افضل يكون الافرول فيه مسافه عند الريول عسب ما يعيق نموهاااااااا وتقدر تحرك اصابعهاااااااا