هل هاي الشي طبيعي؟؟؟؟؟؟؟؟؟؟؟

أنا اشوف انه حلو من الوحدة انه تساعد زوج المستقبل ويساعدون بعض بس يكون بتفاهم ورضى بين الطرفين مو غصب يعني وانتي تشتغلين حرة بفلوسج في حدود الالتزامات اللي بينكم وفي حدود المعقول يعني مثلا بعد الزواج مو تسرفين وتكونون محتاجين لأنه هو بعد قاعد يدفع فلوس الخطوبة من جيبة واشوف اننه مو لازم يفرض رابه عليج يخليج عل راحتج وينصحج

اللغطه غلطتج انك من البدايه عودتيه على الشي هذا المفروض تحسسينه انج تسوي الشي طيب منك ومو غصب ولا واجب مثل ما يوقول عيل وين الرجال قوامون على النساء ولا مو قوامون عليهم لين توصل حق الفلوس ... لا موجوده في السنه ولا في القرأن الي البنت تصرف على الريال .. اختي حبيبتي ... انتي الي تسوينه ذي من كيفج وطيب منج .. ولأنج تحبينه مو عشان ان واجب عليج مثل ما يقول خطيبج ,, ومثل ما قالت اختي في زوجات عندهم راتب لا بعد وياخذون من ازواجهم .. وانا وحده منهم ..... واخذ من زوجي .. عشان ما يحس ان راتبي خلاص ينسى مصروفي واذا احط شي احطه بكيفي .. مو لمه هو يطلب مني .... تحياتي لج ولا تعودينه على هالشي ....

الله يعينج ...

اختي انتي غلطانه من البداية مثل ماقالت Noor1979
لان الرياييل كلش مايتعلمون على شي لانهم يصيرون استقلاليين و كل شي يغطونه على المراه في النهايه
اهوه ملزوم انه يصرف عليج و كل شهر لازم يعطيج و هذي طبعا محد يختلف عليه
اما اذا انتي تبين تساهمين في مصاريف البيت فهالزمن الكل قاعد يساعد الثاني

و انتي قلتي بياخذ نج البطاقه مالت البنك ترا تحملي اعرف وحده ريلها سوى فيها هالشي و بعدين تم يصرف من راتبها و اهيه مايعطيها شي و فوق ذي كله تزوج عليها وحده ثانيه من فلوسها اللي كان ايمعها من وراها بعيد الشر عنج و الله لا يقول هالشي بس انا قلت باقولج هالمثل .

و لازم من الحين تفهمينه هالشي لان انتي توج بتتزوجين و بعدين بيصير عندج عيال يعني كل المسؤلية بتكون عليج ؟؟

و الله يساعدج حبوبه

أنا عن تفسي مخطوبة وخطيببي مع أنه ماخذ قرض فوق كل هذا يعطيني مصروف
فوق راتبي ويكفيني والحمد لله ... أختي مثل قالن الاخوات انج عودتيـه من البدايــة
حاولي تقوليله انج ما راح تسرفين في راتبج وانج راح تحطينه في البنج للايام القادمة
ولما يجيكم عيال .... حاولي تخلي في البنج وبطاقتج مو شرط تعطيه اياها

خليها معاكي أو مع الوالدة وخذي مصروف يكفيكي لشهر ... وكذيــه ما راح يستغل
راتبج ولا شي


آآآآآآآآآسفة على الاطالة ويا ريت ما تفهميني غلط

الللللله يعينج والله .......... وصج انها مشكله بس اذا كان هالشي انتي راضيه عنه هذا شي ثاني ...... بس لاتقارنين روحج بغيرج .... ضروف ربعج تختلف عنج فيمكن حالة ازواجهم راهيه شوي فمن جذي مايخسرون شي من راتبهم .... بس انتي ساهمي ويا زوجج بس بالشي المعقول و عن البطاقه .... حاولي انها تكون وياج والله يعينج اختي

اختي الغاليه هالشي حاصل مع بنات واااايد ماعليج من كلام البنات .....تفاهمي معاه انه ماله شغل بفلوسك

بسم الله الرحمن الرحيم..

انا شايفه انه كويس جدا وعادي انك تساعدي زوجك من مرتبك لانه كله في الاخر عائد عليكي وعلي بيتك ..

انما انتيلازم برضه تحذري زوجك علي العين والراس بس لا تخلي معاه البطاقه البنكيه تبعك قوليله الان انتي مبسوطه بيه وفرحانه فعلشان كدا بتجيبي حاجات كتير يعني مسرفه بعد الزواج هتكوني اشتريتي كل اللي تبغيه فخلاص مفيش مجال للاسراف اختي عندنا مثل حذر ولا تخون ..
واحلف بالله العظيم انه برضه قرات انه فتاه اتزوجت زوج وصرفت معاه واستروا منزل وبنوا اول دور والتاني كله من اموالها في حين مكانش هو بيشتغل وفي الاخر بدل الشكر قام اتزوج عليها ومعيش الزوجه التانيه في بيتها اللي هي صرفت عليه وبنته من اموالها

الامر يرجع ليكي الان

الله يكون في عونك بس

حبيبتي انا من رايي انه لا تسمعين كلام ربيعاتج اللي يقولن ناخذ من رياييلنا..يمكن هذيله رياييلهن مقتدرين يالغاليه ومعاشهم يسمحلهم انهم ما يدقون شي من معاش زوجاتهم..بس الظاهر انه خطيبج يمر بضائقه ماليه ويبغي المساعده بس الصراحه اسلوبه هب حلو بالمره..انتي تقولين انج مسرفه والهشي غلط سواء انتي متزوجه او غير متزوجه لان المسرفون اخوان الشياطين ولازم تغيرين هالطبع بأسرع وقت ممكن
بالنسبه لريلج حلو انج تساعدينه وانا اللي اشوفه هالزمن انه الكل يتساعد ولا الحياه ما بتمشي خصوصا انه الحين الكماليات صارت اهم من الاساسيات والكل يبى يكشخ ويدلع نفسه..اختي فهميه هالشي من الحين..بساعدك مافي اي مشكله بس بالمبلغ اللي اقدر عليه وغير هالمبلغ انا الوحيده اللي حره فيها وكيفي اصرفه ولا احرقه .. وديري بالج ولا بتعظين اصابع الندم لو عطيتيه البطاقه..اختي مثل ما قالو الاخوات والله انه الرياييل لو حسو انه في مبلغ يتوفرلهم والله عيازه الدنيا تطلع فيهم وهب بعيده عقب يخليج انتي اللي تتشرين للبيت وهو راقد فحجرته لانهم من هالناحيه اتكاليين وايد
لا تعطيه فرصه يتكل عليج ابدا..اعرف وحده كانت تساعد ريلها فكل مصروفها لانه يحتاجه نفس خطيبج..هو يحبها وايد وما تزوج عليها ولا شي بس صارت هي الحرمه والريال..هي تكد وتكدح وهو راقد في البيت وهي تصرف على عيالها ولا بعد هي تروح السوق تشتري روشن تخيلي..وهب رايمه عليه ابدا لانها هي من بدايه حياتهم عودته على هالشي

صيري ذكيه وعوديه على انه ياخذ اللي بكيفج وبس وبطاقتج عندج انتي هب ياهل عسب ياخذها ولا قاصر..والمثل يقول ولدج على ما تربيه وزوجج على ما تعوديه

فمان الله

التعاون والمشاركه في المصاريف والالتزامات الماليه حلوه بين الزوجين

بس مب من الواجب على الزوجه تصرف على الزوج او ياخذ بطاقتها

وابد ماحب الحريم اللي يشتغلون ويقولون خل الريال هو اللي يصرف علي وعلى البيت وعلى العيال
وهي راتبها مكدس في البنك
لازم تعاون ولو بشيء بسيط

حبيبتي انا راي انج تساااعديه بس يكيفج مو بكيفه وحاولي تعوديه ع هالشي من البدااااية بما انكم في فترة الخطوووبة

واحذري تعطيه بطاقتك ..حطيها ف بيتكم مع امج احسن لج .......

والله يوفقك يااارب

أختي العزيزة انا أشوف انك تساعدي زوجك هذا امر طيب وطبيعي بس لا تخليه يتملكك من حيث أنه ياخذ البطاقة البنكية معاه يعني فهميه انك لما تساعدي وتقدمي مساهمات يكون بكيفك انتي وان انتي عندك إلتزامات غير عن إلتزامات البيت ومنها انك تعطي لأمك واخوانك.

وبارك الله لكم وجمعكم بالخير

أخواتي
في البحرين مشكلة القروض و ان ما يصفى شي من الراتب ترى شي طبيعي
و تشكل نسبة الرواتب في البحرين أقل نسبة في الخليج كله
على سبيل المثال: أنا متخرجة من الجامعة و عندي بكالريوس في البحرين و و لد خالتي أصغر مني و توه متخرج من الثانوية في احدى الدول الخليجية و راتبة أكثر من راتبي ب 600 دينار كمتدرب يعني بعد التثبيت كم؟

المهم اسفه اني طولت عليكم بس كنت ابي اخليكم تعرفون الحال بالأول قبل الحكم.
عزيزتي في حالتج، عليج تقعدين مع زوجج و تييبون ورقة وقلم و تسوون لكم ميزانية انتي تساهمين فيها و هو بعد و ما تتجاوزينها.

مشكورين الاخوات الغاليات،،،،،
مشكورين على الردود.... صراحة انا عادي عندي اساهم واحس هذا من واجبي بس مو بهالدرجة تقريبا امثر من نصف راتبي ..يعني مثلا الحين احنا تأجرنا شقة حق الزواج من شهرين انا اللي ادفع الاجار وهي مو رخيصة واعتقد ان انا اللي بدفعه على طول..انا اعرف انه راتبة يدوب يكفي يعني اهو ماقاعد يلعب بالفلوس اعرف كل فلس وين يروح بس مثل ماقلت لكم احس هالشي جنه اجباري عليي حتى ماتهنيت في راتبي ... بس انا مستحيل اعطيه بطاقي خاصة انا انا اشتغل في بنك يعني قلت له اذا تفكر تاخدها انا بروحي بلغيها من البنك...
بس انا اللي ابغيه يعرفه ان هالشي مو واجب يعني المفروض يبين في عينه.. انا ما اعايره بهالشي بس ابغيه يعرف..

ومشكورين مرة ثانية..

السلام عليكم و رحمة الله و بركاته

هلا بيكي أختي...

هو طبعا شيء جميل منك إنك تساعدي زوجك...

بس حاولي هذا ما يكون فرض عليكي...

حاولي دايما تطلبي منه مثلا فسحة حلوة...و هو اللي يدفع...

فستان جميل يجيب لك إياه...و هو اللي يدفع...

يعني بشتى الطرق خليه يحس إنك محتاجة له و لراتبه...و إنك ملزومة منك...

بعدين الإسراف شيء مش حلو أختي...بالذات مع ظروف زوجك المادية...

الله يوفقكم إن شاء الله...

هلا

راح اقولج رايي الشخصي........

انه ما احب الرجال إلي يفرض على زوجتة ان تساعدة او حتى ياخذ منها دينار..... ولا احب مسألة المساعدة المادة لأنه حسب المعروف انا اصرف على نفسي واصرف على بيتي اذا انه مستحبة لكن اساهم لأنه هو ما يقدر لا والف لا ...

ومسألة انه ياخذ منك البطاقة (( تحملي )) وإياك تغلطين وتعطينة حتى الرقم والله راح تندمين وروحي شوفي المحاكم مليانة من قضايا الناس..........

هو الرجال وهو إلي لازم يتصرف ....ليش بوم فكر في الزواج مافكر بالمسئولية والصرف والا بس يبي حرمة والسلام............

السلام عليكم ورحمة الله وبركاته



أختي الكريمة

هناك صنفان من الرجال، صنف يُقدر كل ما تقدمه الزوجة ويشعر بالحرج إذا قصر في حقها

وصنف آخر يطلب المزيد دائماً من زوجته رغم إنها غير ملزومة بالصرف على المنزل وعليه..

فلا أعلم من أي نوع هو زوجك ولكن يظهر أنه من الصنف الثاني الذي لن يقدر ما تقدميه له

وإن كان ما تقدمينه له وللمنزل ناتج عن حبك له ولكن هذا لا يعطيه الحق أن يبدي ضيقه وحزنه

إذا لم تقدمي له شيئاً..

ومن رأيي أن أساس مشكلتك هو سوء التخطيط منه ، فكيف يقترض من البنك ويجعل قيمة

القسط نصف راتبه؟؟!!! هذا يدل على سوء التخطيط والتنظيم.. وكيف يقوم بتأجير شقة

يدفع فيها الباقي من راتبه.. ألم تجدوا شقة بسعر أقل حتى يبقى القليل من راتبه؟؟

الأفضل أن تجلسي معه وتتناقشوا في موضوع البحث عن شقة أرخص

وتقليل قيمة القسط وإلا ستزيد المشاكل بينكما والسبب المادة..



أسأل الله أن يوفقك

و السلام عليكم ورحمة الله وبركاته