مشكلتي الغريبه ..

عزيزتي
دامك في سعاده كثير انحرموا منها احمدي ربك واشكريه
والحياة مو بس هدايا وكلام حلو
الحياة روتين
لازم الواحد يغلبه ويغيره
يعني جددي بحياتك شوي
انا متاكده انك من النوع الي يومك زي امس زي بكرا
ابتكري ابدعي
شوفي هواياتك
وراح تحسين بطعم حياتك
وقبل كل هذا بتحسن بطعم الحياة وانتي تشوفين الي تحبينهم باحسن صحه وحال

ليش جذي انسي الحزن والله وايد غيرج يتمنون هاللحظات الحلوة تعوذي من ابليس ياحبوبة وانا مع راي اختي عاشقة الجوري ابتكري وابدعي شوفي شلون كل شي راح يتغير:up:

السلام عليكم و رحمة الله و بركاته

هلا بيكي أختي jami...كيفك و كيف البنوتة الحلوة :)

أختي...الشيطان دائما يتربّص للإنسان المؤمن...و يحاول بقدر الإمكان أن يتعسه في حياته...

يظل يوسوس لك أنك غير مرتاحة أو سعيدة في حياتك...لحد ما تصدقي هذا الوهم...و تدمري حياتك بإيدك...و تأثري على زوجك و بنتك...

السعادة أختي تكمن في الرضا..الرضا بما قسمه الله لك...و الحمد لله تعالى...أنت أفضل حالا من ناس أخرى كثيرة...

ثاني شيء...اللي يكون بقرب الله تعالى...مستحيل يحزن...و لا يكون للشيطان تأثير عليه...

عارفة المسبحة...؟!

خلّي عندك واحدة...و إنتي قاعدة ترضعي بنتك...إمسكيها و إستغفري الله 100 مرة...

كل يوم...

و شوفي الفرق اللي راح يصير...صدقيني الإستغفار له مفعول عظيم...

( فقلت إستغفروا ربكم إنه كان غفارا...يرسل السماء عليكم مدرارا...و يمددكم بأموال و بنين...و يجعل لكم جنات و يجعل لكم أنهارا )...

و لا تنسي...إنه كل مشاعرك و أحاسيسك تنتقل لبنتك مع الرضاعة...

الله يوفقك إن شاء الله :)

وعليكم السلام ورحمة الله وبركاته




أختي jami

سؤالي لج، شلون علاقتج بالله سبحانه؟؟

يا ليت اعرف مدى قربج له سبحانه وتعالى

وبعدين بقول لج إللي ربي يقدرني عليه

السلام عليكم و رحمة الله و بركاته

الحقيقة سؤال الاخت همس القلوب في محله

لانه مهما حصل الانسان من نعيم الدنيا وهو معرض عن ذكر الله لن يحصل على الهناء و السعادة

{وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكاً وَنَحْشُرُهُ يَوْمَ القِيَامَةِ أَعْمَى}(( 124)) سورة طه

وكذلك ذكر الله يؤدي الى الاطمئنان

{الَّذِينَ آمَنُوا وَتَطْمَئِنُّ قُلُوبُهُم بِذِكْرِ اللَّهِ أَلاَ بِذِكْرِ اللَّهِ تَطْمَئِنُّ القُلُوبُ}((28)) سورة الرعد

ولايعنى ذلك اتهام لاختنا بانها مبتعدة عن ذكر الله و لكنقد يكون هناك تقصير منها و هذا سبب لما

هي فيه. اسال الله العلي العظيم ان يزيح هذه الغمة عنها و ان يفرج كربتها و يجعل لها من كل هم

مخرجا.
ولكم التقدير و الاحترام من شوّيب

عزيزتى الله المستعان اقسم بالله نغس الحالة عندى اسفر واغير جو واطلع مصيف احس انى مبسوطة تخيلوا انى اعيش فى كندا اخوات زوجى يقولى الناس تتمناه تروح لبييا وانت فى كندا مش مبسوطة لكن اقسم بالله ما احس بسعادة دائما ابكى ممكن لانى مفرقة اهلى وزجوزى لانى مع اولادى يدسونا فى الخارج لكن انزل كل عام على بلدى اجازة لكن دايما فكرى شارد مع ان الناس ووووووووووو معهم فلوس بيخرجوا ويروحوا مصيايف لكن ربى بس اللى يعلم بى
لكن ما اقول غير استعانى بالله دايما

انا من راي مرموم وهمس القلوب القرب من الله يبعث سعاده عجيبه في القلب انصحك بصلاة الليل (القيام) والاذكار وتعرفي على اناس محتاجين وساعديهم وشوفي الفرحه في عيونهم وقولي لي شعورك وادعي ل سمراء السودان

زي ما تفضل الأخوة والأخوات قبلي

وأختصر لك الموضوع
فلاحظي أمرين مهمين قبل فوات الأوان

1- مقدار السعادة ولذتها مرتبطة بمقدار العلاقة بالله سبحانه
حتى ولو لم يُحس الإنسان بها مباشرة فيكفي أن الله يرضى عنه

2- استمرارك على هذه الحال مع أن زوجك بدأ يشعر بهذا الأمر
ربما يؤدي به لهجرك والبعد عنك، فالزوج إذا أحس من زوجته
أنها لا تأبه به أو أنها تجامله انقلب عليها وتركها ولات حين مندم

--------------------------------

مشرفتنا مرموم

( وقلت إستغفروا ربكم إنه كان غفارا)
الصحيح (فقلت استغفروا ربكم إنه كان غفاراً)




" قل لي بربك ـ ابو داحم "
@ تعلم الفوتوشوب مع ابو داحم @

بسم الله الرحمن الرحيم
وعليكم السلام ورحمة الله وبركاته

حصنى نفسك بالأذكار أختى العزيزة ليحفظك الله من كل شر ويبعد عنك كل مكروه

السلام عليكم و رحمه الله و بركاته .. مشكورات خواتي بصراحه يمكن الاقرب وحدة و فتحت عيني على اللي مضايقني
هيه عاشقه جوري لما قالت يومك زي امس و زي بكرا

النجمه اللامعه صح انا الفرق بيني و بينك انك في غربه عن بلد عربي بس انا في نفس البلد .. بس مدينه ثانيه

الوحدة ذابحتني صح عندي زوج و بنت بس احس بالوحدة لا اهل اعرفهم و لا ناس ازورهم او اكلمهم
مع اني من النوع اللي يقرا بس من الفراغ صرت ما احب اقرا او اسوي اي شي .. من الملل انام .. اقول ما عندي شي انام احسن
انا صح يمكن ما استغفر وايد بس مب لدرجه البعد عن الله ...

كل علاقتي مع الناس بالنت او التلفون و اذا بغيت ازور يا اهلي او اهله

احيانا اقول لنفسي انتي غلطانه لما تزوجتي
كيف اخلي نفسي احب بيتي و زوجي و عائلتي

روحي العمرة أو الحج مع زوجج وصدقيني بترتاح نفسيتج وايد

الغاليه
حتى هو يقول نسير العمرة
بس بنتي صغيرة و ين اخليها قلبي ما يطاوعني اخذها معاي

عزيزتي جامي والله الي فيج قام اييني من فترة

كله احس انه زوجي ما يحبني او بعيد عني او يجاملني مع انه 100% ما سوى شي يخليني احس بجي كل شي ماشي طبيعي وهادي بس انا مادري شو ياني مرة وحدة

حتى اني ايلس اصيح له احيانا بدون سبب واقوله انته ما تحبني واحس اني مب مرتاحة ولا سعيدة .. يعني ما احس انه في شي مميز غير التعب .. بس هالشي صار لي بسبب صياح ولدي الكثير والجامعة وأرفها...

هو يحاول ينسيني يسعدني بس بعد صرت ما احس بالرضا وايد ... دوم العن الشيطان واستغفر ..

بس الي قدرت اني اوصل له هو .. ( انه الي امر فيه عبارة عن فترة ملل .. كآبة من الدوام ..) يعني الوحدة تحس بالملل والحنين لبيت الأهل لكن جربي فكري بينج وبين نفسج ..

انتي تحسين انج مب سعيدة صح ؟؟

افترضي انه حد ياج لا سمح الله وقال لج .. (لازم تبتعدين عن ريلج شهر مثلاً) ما تشوفينه وتردين بيت هلج ؟؟ بتصبرين ؟؟

دايماُ تذكري انه ريلج مب دوم عندج بسبب دوامه ممكن يسافر يغيب فترة وانتي ما اتطيقين اتمين بروحج من غيره .. يمكن نفسيتج تتعدل وتتمسكين بالحياة الي انتي فيها اكثر ...

عيون تصدقين و بتنصدمين
انا في الاربعين كنت بيت اهلي يقولي حسيت انج نسيتيني ما تشتاقين لي ولا حتى مسجات
و انا ساكته ماشي احساس
لو يسافر و يغيب صار هو اللي يخاف من الفكرة

يمكن هو الملل و الوحدة انا اتمنى اكون في موقفج اسير الجامعه اضيع وقتي
يرجع يقولي بتكونين في روتين و هذا ما يعجبج

يمكن اللي مضايقني اني في بوظبي ما عندي حد لا ربيعات ولا اعرف حد غير اهله

وربيعتي كله تقولي انتي كله فاضيه و الشيطان بس يوسوسلج عن اشياء مب موجوده
ما تصدقين مرات اسوي مسلسل اني اطلقت و رحت بيت اهلي و خذت بنتي و شتغلت و عايشه عادي و مرتاحه
و مرات اتخيل انه يحب وحدة ثانيه غيري و انتي تضاربت وياه .. يعني لو يبون قصص حق رمضان الياي ايون عندي وايد عندي بالاحداث و الحوار و السيناريو

بس اذا طلعت و استانست وياه احسها وناسه لحظه و تنتهي و انسى السالفه .. كل اللي اتذكره فيه الهواشه و الضرايب


تعبت من هالاحساس .. ابا احس اني احبه او احب كل لحظه اعيشها معاه .. ابا احس بالراحه مب اعصاب مشدوده طول اليوم

افا عليج جامي هههههههههههههههههه انا ربيعتج ... :bigsmile: والله صدقيني هذا انا اعرض عليج الموضوع من جد ما اتمصخر وياج

انا عندج ان بغيتيني ربيعة اخت حاظرة افا عليج وحياج عندي بعد.. بس بالعكس الدراسة او الشغل عمره ما يشغلج وينسيج

انا ما اصدق متى ايي اليوم الي بقر فيه في البيت وبستقر .. يعني ولدي ماعطيته حقه لا في الرضاعة ولا التربية كله اعصب عليه واصارخ لين ما حسيت انه الولد كرهني .. وهذا بسبب الضغط وقلة النوم .. ريلي نفس الشي ما اعطيه حقه ابد يعني روتيني ملل اكثر ..

انا ياني نفس الي ياج والله بس مشكلتي ما اعرف اوصف لج او اشرح.. فاشله في الشرح تراني ..

انتي سألي نفسج ليش عادي عندج ريلج يهدج؟؟ او لا سمح الله يعرس عليج ؟؟

انتي فكري انتي شو تبين منه ؟؟ او شو الي ناقصنج وياه ؟

لما تطلعين انتي وياه عشان تستانسين لا تفكرين انها لحظة وبتعدي .. لا فكري انه ياسلام محلى هاليوم ان شالله كل اسبوع بنسوي جي .. وخططي انتي للطلعة الي تبينها وسويها بتحسين انج راضية عن كل شي صار ..

جددي في حياتكم.. زيدي شي يديد في البيت غيري في لبسج وكشختج وشكلج بتتعدل نفسيتج .. قصي شعرج مثلاً.. تقولين كلها اشياء عادية لكن والله بتحسين بشي ثاني لما تغيرين شي في شكلج ..

يعني لا اتدمرين حياتج بالوساوس كلمي نفسج عادي غايضي الشيطان ... تدرين انا لما اوسوس ايلس اسب الشيطان بصوت كأني اكلم نفسي ههههههههههههههههه
اقوله شو تبا تغلبني والله ما اخليك والله لا اغيظك واذكر الله واقول اكيد انته يالس تحترق موت احسن هههههههههههههههههههه

في رمضان اقول وييييييييو الله حابسنكم اللحين وفكنا من شركم ...

السالفة والله ما تسوى بس انتي لا تفكرين في باجر فكري في يومج وكيف انتي مستانسة

اختي اذا حسيتي هالاحساس مرة ثانية قومي وأتوضي وصلي ركعتين واستغفري ربك واذكري الله عارفة بتقولين :مو قادرة مالي خلق من اللي فيك لكن اغصبي نفسك غصب اول مرة بتكون ثقيلة عليك انا عارفة وبتصلين بدون نفس لكن المرة الثانية بتكون اخف وهكذا
روحي عمرة واذا كان على بنتك حطيها عند اهلك او أختك واذا مو قادرة وماجالك قلب مكة قريبة عند جدة اسكني في جدة والفنادق الكبيرة تقدم خدمة جليسة اطفال تقدرين تخلين بنتك عندها كلها ساعتين بالكثير وانتي راجعة من العمرة00000وبالتوفيق0

أنصحج اختي بذكر الله دائما في كل اللحظات

حاولي ياأختي العزيزة إنج تقعدين مع زوجك جلسة حوار ومصارحة تصارحينه بكل هذي المشاعر اللي قاعدة تحسين ابها
واطلبي منه يساعدج في طرد هذي الوساوس منج وكثري من كلمة التوحيد لاإله إلا الله ترى صدقيني إنها تزيح هموم لو كانت
مثل الجبال.لكن قوليها بقلب صادق يرجو الرحمة من الله وراح تشوفين الفرق. ليش مثلا ما تسوين انتي وزوجك مثلا شي مشترك
كأن تخصصون ساعة في اليوم بعد ما ترقدين كتكوتكم الحلوة انكم تقرون سوا جزء من القرآن الكريم أو تصلون مع بعض
كم ركعة تهجد صدقيني يا اختي بتحسين بمحبة عجيبة بينكم كل ما عبدتو الله سوا كل ما زادت المودة و الرحمة فيما بينكم
جربي ومب خسرانة إن شاء الله من الليلة .واتمنى أكون قدرت إني أفيدج وطمنينا عليج الغالية.

بس بغيت اسألج وليتج تجاوبيني بصراحه ..
انتي لما خذتي ريلج كنتي مقتنعه فيه 100% ولقيتي فيه اغلب الاشياء اللي كنتي تتمنينها قبل لان شكلج خياليه واايد وقبل الزواج اكيييد كانت عندج افكاار واايده عن حياتج الزوجيه .. لقيتي هالاشيا في زوجج او الحياه صدمتج بالعكس ؟؟
شي ثاني بعد يمكن يكون حساس شوي بس اتمنى لو تجاوبيني عليه لو كان فيه من هالكلام .. انتي كان في خاطرج حد بس قدر الله وخذتي زوجج مب اللي في خاطرج ؟؟