مشكلة مع أخت زوجي

السلام عليكم جميعاً ....
أخواتي حبيباتي أول شي أقول لكم عيدكم سعيد (f)

والحمد لله على كل حال، وعلى كل معضلة .. واسأله الصبر والعون على كل مشكلة ...
أخواتي جئت أبث مشكلتي علّي أجد الراحة عندكم، حاسه نفسي محتاجه أفضفض.. وقلت أجي أفضفض وياكم ....

بصراحه أني عندي مشكلة ويا أخت زوجي..
هي تصغرني بسنتين تقريباً .. لكن تصرفاتها أصغر بوااااااجد وهي المشكلة..
مشكلتي إنها ما تحترمني وتتعمد تفشلني صوب الناس وصوب خواتها .. حتى ساعات تدفعني (حتى مرة على باب البيت سوتها ودفعتني للشارع) كنت دايماً أقول إنها صغيرة وما لازم أحط بالي معاها .. بس طفح الكيل وآمنت إن الشخص اللي ما يفهم يتعبك أكثر من الشخص الفاهم!

بصراحه دايما تمشي وتعلق وتقول عني إني ضعيفه وما أحب أدخل في هالموضوع . بصراحه الواحد بعيب على شي يخص الطباع الخطأ مو على خلقة رب العالمين وما لينا تصرف احنا عباده في هالشي . وبصراحه اهي فيها بعد عيوب بس أني أكبر وأعقل من إني أعايرها وأكيد لأنها فيها نقص تعيب على الآخرين ...
صبرت عليها واجد بعد ما فهمتها بالطيب إني مو عاجبني إنها تعيب عليي وتعاملني بدون احترام ..


آخر مرة كانت زايرتني زوجة أخي وتصير صديقتها ظلوا عندي يساهرون ، وأني كنت مريضة وعليي دوام يوم ثاني، وكنت أقول ليهم ناموا عااد عليي دواام ، وهم أبداً يقولون لي نامي ما عليش منا! وبعدين لين ما عصبوني وطفشوني رحت وشدخت باب الغرفة وقومي يا أخت زوجي وسوي روحش زعلانه .. إني بصراحه ما سويت هالشي إلا بعد ما تعبت وآنا أقول وأتوسل ليهم يخلوني أنام!! مو معقول يعني ما لي ولا ذرة احترام ليش ما يحسون!؟
ومن ذاك اليوم وهي مسويه روحها مخاصمتني!! وآنا عادي أتكلم وياها بس هي من فوق له فوق اتحاجيني! أني مو مشكله عندي لو ما حاجتني بالعكس كلما بعدت عني أني في الفايده على الأقل ما بحصل عدم احترام من ناحيتها خصوصاً صوب الناس ..

بس المشكلة انها تمشي وتتكلم عليي وعلى زوجي _أخوها_ وإن أحنا مأذينها حتى خطيبها متضايق حده!!!!! والمشكلة إنها تقنع الآخرين إنها مظلومة وبريئة .......

بذمتكم شلون أتعامل معاها ..

فعلاً أمنت وتقينت إن ما في أصعب من التعامل ويا الجاهل !

صحيح الآية الكريمة تقول: وإذا خاطبهم الجاهلون قالوا سلامــــا
بس المشكلة ما تهون عليي نفسي صوب الناس تتهزأ وينطبق عليي مثلهم إني من تحت لا تحت ........


دعواتكم ........