موعد مع الألم (( قصة من تأليفي))

الجزأ الاول:


الساعه 6 صباحا:

ترررررررررررررن.. صحيت على صوت المنبه المزعج بالعاده ارميه بالطوفه علشان ينكسر و ما يزعجني لكن هذا صوت المنبه الي بالموبايل ان كسرت موبايلي محد بيشتري لي غيره..شفت الساعه لقيتها 6 يعني لازم اتجهز علشان اروح المدرسة .. متى نخلص منها و نرتاح دخلت الحمام (( تكرمون )) اغسل وجهي واجهز نفسي لبست ملابسي وكل شي لقيتها الساعه 6 وربع تو الناس يعني.. عادة امي كل يوم تطل علي الصبح تشوفني صحيت او لا ..لكن اليوم مالها اثر..يمكن جات لما كنت اغسل واجهز نفسي وما انتبهت لصوت الباب من كثر النوم الي فيني..

فتحت باب غرفتي لقيت امي باصاله قاعده تتريق وبإيدها كوب الشاي وصوت التلفزيون على الاخر .. ارتحت لما سمعت صوت القران على الاقل امي احسن من ابوي من يشغل التلفزيون على الاخبار وياريت اخبار زينه كلها بلاوي وقتل × قتل الله لا يبلانا ..شافتني امي و ابتسمت لي ابتسامتها الحنونه كالعاده من تشوفني..رحت لها وبستها على راسها..

امي: تبين اسوي لج شي علشان تاكلين؟

عادة مااهتم بوجبة الفطور..لاني مالي مزاج اكل شي من الصبح لكن علشان امي كل شي يهون.. وعلشان ما تعيد اسطوانتها عن الفطور واهميته..

وقلت لها : لا يمه بشرب عصير كفايه..


وقعدت اسولف مع امي لين ما جات الساعه 6 ونص..وحان موعد الانطلاق للمدرسه..

لبست عباتي وشيلتي و اخذت شنطتي وقلت لامي :يالله مع السلامه .. وقعدت امي توصيني على نفسي.. يمكن انتوا تستغربون وتقولون شلون بتروح ذي المدرسة..
المدرسة قريبه من بيتنا وتبعد يمكن حوالي كيلومتر واحد اكثر شوي و انا بالعاده احب المشي والرياضه من الصبح مفيده..وانا طالعه من البيت شفت ولد جيرانا عبودي عمره يمكن 4 سنوات لابس شنطته للروضه وواقف عند سيارة ابووه لما شافني ابتسم لي.. ياحبي له رديت له نفس الابتسامه و احلى .. اول مره بحياتي اشوف ياهل خجول مثل عبودي..رحت سلمت عليه وبسته على خده ومشيت عنه و انا امشي سمعت صوت يناديني ..صوت انثوي..التفت وراي لقيتها صديقتي عبير.. وقفت لها لين ماوصلت لعندي سلمت علي وكملنا دربنا للمدرسة كله سوالف وضحك احلى الشي الصبح انه يكون الشارع هادئ و اقدر اخذ راحتي..

وصلنا المدرسة على الساعه 7 وافترقنا انا وهي عند بوابة المدرسة هي راحت لصفها و انا رحت لصفي..

دخلت الصف لقيت اغلب البنات فيه سلمت عليهم وانا اناظر كل وحده فيهم بانتبااه يمكن القى صديقتي لكن مو موجوده للحين ما وصلت الظاهر ورحت على كرسيي حطيت شنطتي و فصخت عباتي و خليت الشيله على راسي بأي وقت يمكن يجي هلالووه المزعج ينظف او يسوي شي ويقعد يتليقف على البنات ياكرهي له ..

بقى على الجرس دقيقتين وللحين ماشرفت ست الحسن ليكون بتغيب بذبحها..وانا اقول هذاالكلام الي هي داخله الصف بكشختها..ومن شافتني جات على طول لي و انا ماعطيتها وجه يعني ..يكون انا زعلانه منها علشان هي تاخرت..يات لي و طقتني طقه خفيفه على جتفي.. طالعتها عيني بعينها ماقدرت ماابتسم وهي عرفت وش فيني وقالت لي: فديتج ريمانوا اسفه لاني تاخرت عليج بس هذا كله من اخوي هو الي اخرني قاعد يتلعب ويطنز وانا اصارخ عليه يلا نمشي..

قلت انا: حصل خير يا سارة مع رنة الجرس..

سحبت يدي وقومتني من الكرسي..وقلت لها: حشى انتي مو بنت كسرتي اصابعي وانا اضحك وهي تضحك وتقول: شنو تتوقعين من بنت عايشه مع صبيان..

خلوني اقولكم عن ساره.. سارة بنت عمرها 18 سنه بعمري.. صديقتي من يوم ما كنا صغااار يعني على ايام الابتدائي و ما افترقنا و ان شاء الله ما نفترق ..طبيعتها حبوبه و مشاكسه عكسي انا هادئه بطبعي و الكلام عندي ماقل ودل..

نزلنا لطابور الصباح وحطوا تحية العلم وانا واقفه وقربي سارة تقولي: انا اليوم خاطري اتسرب من حصة الكمياء ما اقدر استحملها طالعتها المدرسة مربية الفصل بنظرة تقولها سكتي وقعدت سارة تتحلطم وانااضحك خلص الطابور و مشينا الصف سارة قربي تقعد و الصف طاولاته و الكراسيه صاير على شكل حرف U وابتدت الحصه الاولى و الثانيه وفي نص الحصه الثالثه كتبت لي سارة بورقة صغيره شي ومررتها لي بحكم ان احنا بحصة الوحش ما نقدر نتكلم اخذت الورقه بدون ما تحس المدرسة الي نسميها الوحش علي .. وقرات شنو فيها.. بصراحه انصدمت صدمه بانت على ويهي..وخفت احد يشوفني ويشك فيني ويقول وش فيها ..وسارة تقولي و لا كلمة بعدين بالفرصة نتكلم..

ياترى شنو كاتبه سارة لريمان بالورقه وخلاها تنصدم؟؟


انتظر ردودكم واقتراحتكم على احر من الجمر..

اختكم

ذكريات حزينه

واو حلوة سلمت يمناك يارب

أوعدك أني اتمعن في قراتها وأعطيك نقدي ومقترحاتي

السلام عليكم ورحمة الله وبركاته

مشكورة اختي منال و عيونج الحلوة..
و انا انتظر رايج و مقترحاتج..

بس وين الباقي؟؟ ماعجبتكم القصه و لا شلون؟!

اولاً اهلاً بكِ اختي sad memories
معنا هنا ..
بكل صراحة قصة جميلة فيها العفوية والسلاسة
اكملي غاليتي ونحن نتابع ..
وشوقتيني اعرف شمكتوب بالورقة !:smile:

السلام عليكم ورحمة الله وبركاته

مشكورة اختي شجونه الحلوة على الرد.. وان شاء الله راح اكمل لكن بعد ما الاقي اقبال اكثر للقصه..

ولحد الان 16 قرؤا قصتي و مافي ردود الا 2 ليش؟؟

السلام عليكم ورحمة الله وبركاتة


قصه روعه حبيبتي ويالله عاد
نبي أنشوف التكمله
الله يعطيج العافيه أن شالله