لدي رحم ذو قرنين فمن لديها نفس مشكلتي (أرجوكم طمنوني )

السلام عليكم ورحمة الله وبركاته

الغاليات رواد هذا المنتدى الرائع ..

انا متزوجة من 11 شهر تقريبا وكنت اخذ حبوب منع الحمل في البداية ووقفتها بعد 6 اشهر وجلست انتظر حدوث الحمل وتأخر .. توقعت ان الحبوب اعطتني مناعة ولا فكرت نهائيا اني ازور طبيبة لأني اؤمن بأن كل شيء بيد الله سبحانة وتعالى

بالصدفة حدث عندي بعض التعب والتهابات فاضطريت ازور طبيبة نساء وولادة وبعد الفحص الداخلي ( وكنت لآول مره اسويه وميته من الخجل ) اكتشفت الصدمة !!

بلغتني الدكتورة ان عندي مشكلة بالرحم واني لازم احمل باي طريقة وبما ان الدكتورة كانت اجنبية ولا تتكلم لا انجليزي ولا عربي الا ركيك ماقدرت افهم شي منها بشكل واضح وطلعت من عندها وانا مرعوبة ودموعي على خدي وهي تحاول تهدي فيني وتقولي طبيعي ومدري ايش

المهم قالي زوجي لازم افحص عند دكتورة ثانية .. وفعلا رحت وقالت لي نفس الكلام بس هالمرة قدرت افهم وش المشكلة بالضبط وانا كنت اتمنى انها تكذب كلام الدكتورة الأولى

بعد الفحص اخبرتني ان عندي ( رحم ذو قرنين ) وهو رحم يختلف بشكل بسيط عن الرحم الطبيعي ويكون على شكل قلب وبأن عندي انقسام في عنق الرحم !! وهو عبارة عن تشوه خلقي من كنت انا ببطن امي

ماتتخيلون كيف كانت صدمتي وبالقوة قدرت امسك دموعي من انها تنزل .. قلت لها يعني ماراح احمل ؟
ردت علي بكل بروووود تقولي :يمكن تحملين ويمكن لا وحتى لو حملتي فيه خطر انك تجهضين ولو ما اجهضتي في احتمال ولادة مبكرة
سألتها طيب وش الحل كيف اتجنب حدوث هالشي ؟
قالت لي وبنفس البرود انتي ليش مهتمه خلينا نشوف اذا تحملين ولا لا بعدين يصير خير
قلت كيف يصير خير طيب اذا حملت ان شاء الله كيف اتجنب الاجهاض ؟
قالت نسوي لك ربط لعنق الرحم بس خلينا نشوف اول حمل لك اذا اجهضتي ساعتها نقرر وش نسوي
واحتمال تكون ولادتي قيصرية !!

تخيلوا ؟؟؟؟؟؟؟؟
تقولها لي بكل برود وعدم اهتمام وكأنه عادي عندها اني احمل واجهض وكل ماسألتها شي قالت وشوله مستعجله بعدين نشوف وطلعت وانا ضايق خلقي واحس اني شايله هم فوق اكتافي
مسكت سجادتي ومصحفي وطول الوقت وانا ادعي ربي اني احمل وانه يثبت لي حملي ويتممه علي بخير ولا يصير كلامها صحيح

والحمد لله .. انا الآن حامل في الشهر الأول بعد 4 اشهر من ترك الحبوب ولكن احس بمثل المغص في بطني مع تقلصات خفيفة لكني خااااايفة مووووووت من كلامها ما ادري وش اسوي .. ولا اقدر اسأل احد لأني ما ابغى احد يدري حتى امي واهلي ماقلت لهم علشان مايقلقون علي

ياريت يابنات الي عندها نفس حالتي او تعرف احد لها نفس الوضع وانجبت بشكل طبيعي تقولي
وارجوا منكم الدعاء لي من القلب ان ربي يثبت لي حملي ويتممه علي ويسهل علي ولادتي لأني كل ما اشوف الفرحة بعيون زوجي وخوفه علي ما اقدر امسك دموعي من الفرح والخوف

الله يجزاكم ألف خير