يحبني وأموت فيه بس المشكله أكبر مننا..!!الرجاء الرد قبل العيد

عزيزتي انا مافهمت بالظبط انتي متملكه بس ولاخلاص تزوجتي
الي فهمت انكم لسا مملكين يعني لسا ماسكنتوا ببيت واحد
عزيزتي
انك تخلينه يطيع امر امه شئ جميل ولاتتندمين على هالشئ
لكن بنفس الوقت انتي فكري
لو سافر باذن الله المره الجايه بتسافرون مع بعض يعني تكونون تزوجتوا
عزيزتي
لاتتسرعين الايام قدامكم وبتعيشون مع بعض وبتسافرون وتعيدون باذن الله
لكن الاهم
انك ماتشيلين بقلبك
انتي قلتي الي عليك وهو يسوي الي بضميره
عزيزتي
لاتجيبين المرض لنفسك وانتي لسا باولها
واذا كانت امه متسلطه
نصيحه بعد الزواج حاولي تتقريبن منها
ومثل ماقلتي ولدها الصغير
يعني للصغير ميزه عن الغير انه مقرب والام ماتقدر على غيابه
فالله لايلومها
لذلك حكمي عقلك
وعودي نفسك

الله يعيينج عزيزتي

صراحة ماعندي خبرة بهالامور
الله يصبرج يارب ويعوض صبرج خير

وعليكم السلام ورحمة الله وبركاته



أختي الحبيبة (عاشقة علاء_14)

الله يوفقج مع حبيب قلبج والله يتمم زواجكم على خير ..

في البداية أهنيج على حسن أخلاقج وطيبج وإللي تسوينه عين العقل

وأسمحي لي بالتعليق على الموضوع عل وعسى نتوصل لحل..

أم الزوج دايما تكون هاجس تخافه أي زوجة في بداية حياتها والخوف من

معاملتها وما أخفي عليج أن حتى أنا افكر في هالشي..

بس لازم الزوجة تكون ذكية وتتصرف بحكمة علشان لا تتعب نفسها بمشاكل وتعيش براحة

فأنتِ ولله الحمد تعرفين أن زوجج يموت فيج وهاذي أهم شي أما بخصوص أمه

فبإذن الواحد الأحد راح تتغير.. وإذا ما تغيرت صدقيني أنتِ مو خسرانة شي

لأن كل شي بأجره، وأي شي تسويه لج أحتسبي أجره عند الله سبحانه

وهاذي ما يمنع أنج تحاولين تكسبينها .. كبداية أقول لج ما يسوى تتعبين نفسج

وتمرضين نفسج علشان موضوع مثل هذا.. فكري في حبيبج وقرة عينج قبل ما تحاتين

وتشغلين بالج وتخسرين صحتج وتأكدي أن كل شي له حل إن شاء الله

بالفترة هاذي لا تقولين حق زوجج ولا شي عن أمه وراح نخلي هالشي حق أسوأ الحالات

عامليها بطيب زي ما تسوين الحين بدون ما تحسسين زوجج وتأكدي أن معاملتج

لأمه راح تخليج تكبرين بعين زوجج.. ودايما قابلي السيئة بالحسنة تمحوها

كما كان يفعل حبيبنا محمد صلى الله عليه وسلم..

خليه يروح العيد واحتسبي الأجر وإن شاء الله راح تكونين معاه بالأعياد الياية

بس أهم شي ما تضايقين نفسج.. وبخصوص أمه أنها دايما تستفزك وتتكلم عليج

فهذا فيه زيادة لحسناتج ونقصان لحسناتها فليش تتضايقين حبيبتي؟؟

لا تنسين أن ربج موجود ويشوف ما تخفيه الصدور..

تقربي منها، ولا تنسين تأثير الهدايا ، يمكن ما بتعجبها الهدية بس المهم تكونين سويتي

إللي عليج وبإذن الله ربي يحنن قلبها عليج.. بس لازم تصبرين علشان خاطر زوجج..

ولا تنسين حبيبتي صلاة الحاجة والدعاء دايما أن الله سبحانه يحنن قلبها عليج

لأن قلب أم زوجج بيد الله سبحانه وإن شاء الله تشوفين التغيير عليها...



الله يوفقج وييسر أمرج


و السلام عليكم ورحمة الله وبركاته

[grade="DC143C FF6347 DC143C FF4500"]
السلام عليكم ورحمة الله وبركاته

أختي ليش ترفعين ضغطج وتتضايقين،حاولي قدر الامكان في أي مشكلة تواجهينها

ما إتعبين عمرج بالانفعال الزائد والقهر لأنه كله بينعكس على صحتج،والحياة مليئة بالمشاكل

ولازم نتأقلم معاها عشان نقدر نعالجها،الله يبعد عنج الضيق والألم،اللهم آمين

بالنسبة لأم زوجج،بإذن الله بتتغير،صح تصرفها مش طيب لكن ماعليه مع الأيام يمكن تتغير

ومااعتقد انها تكرهج لأن كيف تكره وحدة هي خطبتها لولدها،المسألة أقل من ذلك بإذن الله

بالنسبة لزوجج وسفره لمصر،مافيها شي أختي،صح تحسين انج ماتقدرين على فراقه كمن يوم

لكن لازم اتعودين عمرج إنه مش كل وقت راح يكون زوجج معاج،حتى بعد ماتتزوجين أكيد بتحصل

ظروف تخليه يسافر سواء شغل،أو غيره فلازم اتعودين عمرج على هالشي،إحساسج الحين طبيعي

لأنه هالفترة فترة الملكة تعتبر فترة الافتقاد للشريك،وعدم القدرة على تحمل بعده،لكن بعدين بتتعودين..

الله يوفقج يارب،ويتمم زواجج على خير،ومثل ماقلتلج الله الله بأعصابج ترى الصحة ماتتعوض..

في أمان الله[/grade]

الله يوفقك حبيبتي

لو كنتو متزوجين .. حاولي تقنعي حماتك وزوجك انه يعيد معاك ...

لوكنت بس مالكين فانا افضل انك تخليه يسافر معاهم .....

اصبري حبيبتي

وما شاء الله انت فتاة عندها صبر .. قل في هي الايام

الله يسهل عليك

حبيبتي رضا الله من رضا الوالدين

اذا امه تبيه يسافر خل يسافر معاهاا

وخليه دوم يسولف لها عنك

ويمدح فيك

وانشاءالله بعد الزواج بتتيسر الأمور

الله يوفقك

الله يكون في عونج اختي ..
صدق مشكله كبيره بس اكيد لها حل وحلها بيدج انتي ..
كل شي ايي بالطيب وحماتج اكيد ما بينفع معاها الا الطيب ..مهما طال الوقت في النهايه بتحس وبتتغير للأحسن
لا تعاندينها الغاليه وما عليه الاعياد جدامج انتي وزوجج وان شاء الله عيد واحد بدونه ما بيأثر على حياتكم ..
خليه يروح مع امه وانتي ابقي مثل ما انتي الانسانه اللي تكسب غيرها بطيبتها ورزانة اسلوبها وتصرفها ..
مع الايام ان شاء الله بتصير حماتج مثل ما تبين وابقي انتي دايما كبيره في عين زوجج لان الريال يحب الحرمه اللي تراعي اهله وتحشمهم خاااااااااصه امه وانتي ما شاء الله ما عليج قصور من هالناحيه ..

الله يحفظج الغاليه ويهدي ام زوجج ويحببها فيج امين

ولا تنسين تدعين لنفسج بهالشي في قيام الليل وكل وقت والله عند عبده اذا دعاه ..

اختي اهنيج على اخلاقج الطيبه..

وانا رايي دام انكم مملكين خليه يرووح و اذا تزوجتوا اكيد بيتغير الوضع و يتصيرين معاه على طول و بياخذج في سفرتهم السنويه هاذي..

اخاف انصحج بشي ما يفيدج او لا سمح الله يخرب كل شي
لاحظت انج فعلا نفس ما قلتي متربيه وما تحبين تسوين مشاكل بين الام وولدها وصدقيني هذا عين العقل ولج الاجر على صبرج
اختي انتي زعلانه ومتضايقه لدرجه يبتي لنفسج المرض عشان العيد وعشان ريلج يقعد معاج فالعيد
حبيبتي ليش مستعجله وبعدين عرسج عقب شهرين يعني لا تشوفينه خليه يشتاق لج..وبعدين العرس ما بقاله شي وبيكون الجمل بما حمل عندج..يعني اسمحيلي..بس كبري عقلج من ناحيه العيد هذي ومافيها مشكله لو راح مع امه لمده سنه حتى
لانه هذي امي حبيبتي ولها الاوليه والاحقيه بالطاعه خصوصا انه العرس بعده ما تم
ولي تم العرس انتي بكلامج المعسول وصبرج وادبج وطولت بالج على امه بتغيرها بشكل كبير
خلي دايما على لسانج من عيوني وتامرين امر..ومالج الا طيبه الخاطر..ودايما قوليلها اذا بخاطرج شي ولدج يسوويلج اياه انتي بس قولي وتدللي تراج انتي امه وانتي الاغلى على قبله وانتي الاولى وانا الثانيه يا بعد عمري

خليج جي وصدقيني بتستحي ومع الايام بتموووت عليج..انا عمتي تموت علي اكثر من مرت ولدها الثانيه..ودايما تفتخر فيني اكثر منها وجدام الكل تقول اني غير عن الثانيه..وانا بصراحه ما انافق ام ريلي بس انا بطبيعتي طيبه وعاقله وابى الاخره واخاف الله في امي وابوي واقول نفس ما اعامل ام ريلي ان شاء الله الله بيرزق اخوي وبزوجه صالحه تعامل امي وابوي بالمثل

ترفعي حبيبتي عن هذي الامور اللي هي من سفائف الامور..وخلي نظرتج للمستقبل واحرزي النجاح اللي بيعيشج بسلام وامان وسعاده طول العمر..بس بعد ما تتعبين مع ام ريلج اللي هي امج بعد مده تختلف من وحده للثانيه

انا عن تجربه اقولج هالكلام تجربه نتيجتها ما جت من يوم ولا يومين..لاااااااا جت بعد سنوات..وما اقص عليج طبعها ما تغير اميه بلميه..يعني عليها حركات..بس خفيييييفه وايد وهذا شي طبيعي لانه في وحده يت تاخذ ولدها بارد مبرد..هم جي يفكرون

بالكلام الطيب والمعامله الحسنه بتحصلين كل اللي تبينه حبيبتي
واعتقد حبج لريلج لازم يكون حافز لج انج تغيرين حماتج

الله يسعدج ويوفقج يا رب ويسخر لج ام ريلج وريلج

فمان الله

الله يعينك اختي

وماشاء الله عليك صبورة

ماعندي نصيحة معينة بس حابة ادعي لك بالتوفيق وان الله يتمم لك بخير

ما شاء الله عليكي عين العقل اللي تسوينه بس احب اقولج شغلة يمكن تنفعج انه مادام امه قالتله انه يسافر لازم يسمع كلام امه وما تعرفين انتي يمكن تاخذين اجر ويمكن يكون كبير في رمضان وبعد انا اشوفها فرصة من بينكم انه تزيد الحب والمودة والشوق بينكم واصبري لانه أنتي الفايزة ولا تكلمين امه يمكن تحطج في بالها وتعند وتكرهج بعدين

الله يوفقج بحياتج الجديدة

عاشقة الجوري

مسك و ورد

همس القلوب

أميرة البجع

فجر الليل

روز

أمل مفقود

soft_dreams

مدلله

RoOoOmy_M

طلوع الفجر

شكراً لكن جميعاً...بس حبيت أبشركم يا بنات من دون ما أكلم زوجي ولا شي هو راح قلها

إنه يبغى يعيد معايا هنا.....وبعد جدال طويل وافقت من دون إقتناع وعلى بالها أنا الي قايله له لا تسافر وقلبت عليّ زيادة

بس مو مهم لاني راح أحاول إني أكسبها وأفهمها الموضوع صح...

و كلامكم مره خفف عني وراح أحاول أعمل بنصيحة كل وحده منكم عشان أنا فعلاً أبغاها تكون في صفي عشان زوجي يكون مرتاح

وهو شايفنا متفقين........


ســــــــــــــــــــــــــــــــــــــــــــــــــــــــــــــــــــــــــــــــــلام يا حلوات

بسم الله الرحمن الرحيم

هلا يالغاليه شحالج ؟؟؟؟؟؟؟؟؟؟

ابي بس أوضحلج شئ مهم وايد وهو مادام انتي وياه وايد تحبون بعض ومتفاهمين فلا تخلي عمتج حجرة عثره جدامج صدقيني لن حياتج جيه بتتهدم .......

انصحج حبيبتي مب بس انتي تعانين من هاي المشكله وايد بنات يعانون من نف الشئ بس انتي كوني اذكى وحاولي تكسبين عمج فصفج وخدميها وبعدين هي الي بتحبج وبتسأل عنج بس لا تتصرفين اي تصرف يخليها تاخذ منج موقف لانكم توكم فبدايه .........


ووافينا باخر علومج واخبارج يالغاليه ............

شوفي اختي

مشكلتج هدي تعاني منها الكثير من المتزواجات
تدخل ام الزوج في حياة ولدها و زوجته

انتي توج مالكه ما سكنتي معاه في بيت واحد و ادري انج تبينه يعيد معاج عشان تحسين بالعيد
انا براي انج ما تثيرين غضب امه و خليه يروح مع اهله و الله بيعوضج خير
لانه صدقيني بعض الحموات الله يهديهم ياخدون سياسة الأستففزاز عشان تثير الزوجه و تقدرة تتهمها انها راعيه مشاكل
و خاصه انه صعب على بعض الامهات انه يتخلون عن عيالهم
ادا انت واجهتي الموضوع بالصبر و الطيبه الأمور بتتغير لصالج

و اسال الله في هدا الشهر الكريم انه يسر عليج