مع مدللة بتسوون شوارما بعمره لا صار ولا استوا..طعم لا يقاااوم

السلام عليكن ورحمه الله وبركاااااته


شوفو حبيباتي اليوم بعطيكم طريقه شوارما تسوويها عمتي ام ريلي الله يطول بعمرها
والله انها شورما محد ذاقها الا تخبل عليها...تخيلو..ولا حد اكلها الا اتصل فيني يسأل عن طريقتها
والحلو فيها هذا انها سهله وااايد وما فيها طحينيه للي ما يحبون الطحينيه

نبدأ: هالكميه تصلح لحشو 6 صمونات من الحجم المتوسط

المقادير:

2 صدر دجاج
بصله كبيره ومقطعة شرائح كبيره
فصين ثوم مدقوق
زنجبيل فرش مبشور...ملئ ملعقه كبيره
كزبره بودره
كزبره ورق..فرش
ملح
بهارات (شويه كاري..شويه فلفل اسود..شويه دارسين..شويه كركم..شويه كمون..شويه فلفل احمر حار مطحون..بس اللي يحبون الطعم الحار يزودون الفلفل الاحمر حسب الرغبه)
مايونيز
خردل
عصير ليمونه كبيره

الطريقه:
نقول بسم الله الرحمن الرحيم وبه نستعين

اول شي نغلي الصدور ونحط معاها ملح عشان الزفه تتطفح وطبعا عقب ما تتطفح نشيلها بالخاشوجه..يعني الملعقه..ونخلي الدجاي يفور لين ما ينضج تمامااا

بعد جذي نطلع الدجاج وننتفه بس هب نتف رفيعه تقولون فيها فقر دم...لا نتف عراض شويه

وبعد ما ننتف الدجاج نحطه في صحن ونجهز المقلى من الحجم الكبير عشان الدجاج ما يطلع بره اثناء التحمير والتقليب

نضع المقلى على العين والحراره تكون متوسطه مش حاره لانه الدجاج ناضج
ونضع زيت ونحط الدجاج في المقلى ونحمره لمده 3 دقايق لاااااا اكثر

بعد جذي نظيف البصل ونستمر في التقليب لين ما يذبل البصل وبعد ما يصفر البصل ويذبل نضيف الثوم والكزبره البودره في نفس الوقت واول ما تروحون ريحه الثوم الخنينه تضيفون الزنجبيل

تستمرون في عمليه التقليب لمده 10 دقايق على نار هاديه يعني لاحظو لا تخلون الدجاي يتحمص

بعد جذي تظيفون الملح والبهارات اللي ذكرتها فوق وطبعا هالشي حسب الرغبه
وتقلبون الدجاج لمده 4 قايق

بعد جذي الله يسلمكم تظيفون الكزبره الفرش وتقلبون لمده دقايق بسيطه جدا يعني دقيقتين فقط وبعد جذي ترفعون القلايه عن النار وتسكبون على الدجاج عصير الليمون الفرش

الحين الحشو
# هالشي اختياري يعني تقدرين تقلين بطاط مثلج وتظيفينه للحشوه وتقدرين لا

نكمل عمليه الحشو
تيبين وعاء تحطين فيه ميونيز وخردل وتخلطينهم مع بعض
بعدين تيبين الصمونات وتبدين تمسحين من داخلهم بالمايونيز والخردل وعقب تظيفين البطاط وخلطه الدجاج

يوم تخلصين رصيهم في البايركس ودخليهم الفرن لمده 10 قايق بس اهم شي على ناااااااار هاديه عشان لا يتحمص الصمون ويصير يابس

وبالهناء والشفاء على قلوبكم ياااااا رب:up:

اختكم مدللة