اكتشفت ان زوجي صعب وانا توني مالكه وخايفه ارجوكم لو كلمة

وعليكم السلام ورحمه الله

أختى نـونـو

امـور هيـنـه وبسيـطـه ماعليكى إلى إنك تجلسين معاه وتبادلينه الحوار عن مشكلتك دون أن يتدخل احد بمشكلتك

وإن كان مانعك عن الطلعه بسوق مافيها شى لو تتفقون إنكم تطلعون مع بعض وتخصصون يوم تتسوقون فيه

حتى لو كانت مشترياتك اشياء خاصه فيكى انتى

وإن كانت مشكله السفر برضو تعتد على نقاش بينك وبينه , وإن شاء الله راح تتفاهمون

( ارجو منك إنك تفكرين زين قبل موضوع انفصالك مع زوجك دامها مشكله صغيره )

ولاتتدعى على نفسك إنك تتركين زوجك

اختى اتمنالك مع زوجك كل السعاده والتوفيق

تـقـبـلـى مـنـى خـالـصـ تقـديري وأحـترامـي

الله يعينك يالغاليه .........قبل مااقول شئ اقولك اصبري اصبري اصبري


وحاولي تغيرينه ........وعلى فكره عن تجربه شخصيه انا زوجي ايام الملكه كان يحكي لي عن مغامراته وكان راعي سفر ومو مسؤول لكن قالي انا ماعترفت لك بهالاشياء الا اني قررت اتغير وقد قرار الزواج بس زوجي ماكان يكلمني عن الجنس كان يبعد عن هالكلام مرررررره .......المهم لما اتزوجته الى الان والحمد لله شايلني شيل ........بس فيه عيب انه كسول مايحب يروح ولايجي تخيلي ولانتعشى اونطلع مطعم تخيلي كنت متأزمه بس خلاص تعودت ..........المهم فكري زين قبل اتخاذ اي قرار


وبالتوفيق يالغاليه

الله يعينج اختي بس لازم تكلمين لاتمين ساكتة لانه حقج راح يروح وبعدين بيتعود انج دايما اتمين ساكتة تكلمي بالطيب وتفاهمي معاه على احتياجاتج وشوفي شو رايه


والله يوفقج

السلام عليكم ورحمة الله وبركاته ...
أختي الريال مثل الياهل يعني يزعل بسرعة ويرضى بسرعة فحاولي تمشين معاه خطوة بخطوة
وصدقيني إذا كلمتيه بهدوء وأقنعتيه بيوافق على طلباتج بس من غير صراخ وعناد...
سايسي ريلج وخذيه على قد تفكيره وحاولي تغيرينه وصدقيني بيتغير أنت قدها وقدود .

إنشاله تنحل مشكلتج ..
أتمنى لج التوفيق في حياتج وطمنينا عليج ...:smile:

نونو2007:
السلام عليكم ورحمة الله وبركاته

بس هو للأسف لوح ما يفهم

السلام عليكم و رحمة الله و بركاته

هلا بيكي أختي نونو..

أول شيء...هالني إنه واحدة تقول على زوجها ( لوح )...

غلط أختي...ما يصير...هذا الحين زوجك...جنتك أو نارك...لو إتعودتي تشتميه من الحين...و هو راح يبدأ يشتمك بعدين...راح تصير الحياة بينكم صعبة جدا...

ثاني شيء...طبيعي جدا بين المخطوبين يكون في إختلاف في الصفات...يعني حتى لو تركتيه...و إنخطبتي لواحد ثاني...أكيد مش راح يكون تفصيل 100 % عليكي...

يعني لازم يكون هناك إختلاف في الصفات...و إنتي و مقدرتك...

هل تقدري تتحملي هذا الإختلاف و تتوافقي معاه...و تغيري زوجك للأفضل ...و تتأقلمي عليه...

أو إنه الموضوع مستحيل عليكي بشكل قطعي ( و أحس هذا يكون في الزوج اللي يرتكب المحرمات...مثل الخمر و الزنا )..

و بالنسبة للعلاقة الخاصة...طبيعي الرجل أول ما يخطب يبدأ يفكر في الموضوع بشكل أكبر...لأنه يمثل حاجة من إحتياجاته..لكن إنتي إتأكدي...هل فعلا هذا هو هدفه من الزواج فقط !

و دايما صلي إستخارة...و إسألي الله العون...بالذات إحنا في ال 10 أيام الأواخر من رمضان..

الله يهديكي يا رب و يوفقك دايما...

عزيزتي اجلسي معاه و ناقشيه بكل صراحة
و بعدين ابني قرارك على نتيجة هالجلسة
يعني إذا كنتي شايفة إن هالزواج راح يقيدج و ما يحقق لج الحياة اللي تطمحين لها ...فبلاه أحسن

مرحبا الغاليه
في البدايه احب اقولج ان كل المخطوبين نفس الشي في اول ايامهم وحتى في اول ايام الزواج كل واحد من الطرفين بتشوفينه يتضايج من بعض تصرفات الثاني لانها مب مثل ما كان يتوقع او يتمنى .. وانتي مستحيل تلاقين الشخص اللي تخيلتيه قبل في بالج لانه ما فيه واحد لقى له شريك بنفس المواصفات اللي كانت في باله .. لازم فيه شوية فروقات ممكن التنازل عنها ..
بالنسبه للطلعات انتي قعدي معاه وكلميه وحاولي تشوفين رايه وتقنعينه .. وحتى لو ما اقتنع تمي معاه واصبري عليه وانتي تقنعينه يمكن يتغير ويقتنع بكلامج ويحس ان هالشي من حقج ولازم ما يبخل به عليج .. اما اذا حسيتي انه مصمم على رايه ومب طايع يتفاهم معاج على هالنقطه هنا لازم انتي تعرفين في داخلج شو تبين لان موقفج بيكون مصيري .. يعني تبينه مع كلامه هذا او لا ..؟؟؟

اذا هيه توكلي على الله وانتي تراج على ذمته ولازم تسمعين كلامه وتحترمين رايه واذا حسيتي انج مستحيل تكونين مرتاحه او انج مب قادره تتنازلين عن هالشي عشانه فالافضل انج ما تقصين على عمرج وتتخذين موقفج برفضه وتصلين استخاره قبل كل شي لانج بعدج في بر الامان وهالفتره لازم فيها الواحد يشوف نفسه مع شريكه وانتي من حقج تقررين بهيه او لا ..

اهم شي انج تكلمينه بالطيب والهداوه لان الرياييل ما يحبون العناد .. وبعدين اخذيه بالسياسه وابدي معاه الكلام شوي شوي مب مره وحده تقطينه في ويهه تبي اهلا وسهلا ما تبي مع السلامه ..



بالنسبه لعلاقاته السابقه لازم تنسينها وتشيلينها من بالج ولو تقدرين تقنعين نفسج بالعكس يكون احسن لانج بتتعبين .. ولا تصيرين الحرمه الل تفتش عن عيوب ريلها ولازم تصيده على كل شي .. كل الشباب كانت لهم علاقات الا من رحم ربي فالافضل انج تتغاضين عن اللي مضى وتبدين حياتج باستقرار وامان من دون هالشك اللي ممكن تهدمين به حياتج معاه ..

لا تقولين تزوجني عشان كذا وكذا .. مع الايام بيحبج لانج انتي والحب ما ايي بين يوم وليله يبي له شوية وقت ..

كل شي محتاي لصبر وانتي لازم تصبرين حبيبتي وان شاء الله ما بيصير الا كل خير ..

حبيبتي
لاتحكمين على اسلوب الحياة معه بعدين
عن طريق سوالفه
ياما ناس قالوا بنقفل على زوجاتنا ولاراح يطلعون ولاراح يجون وبالاخير صايرين معاهم زي العسل
ثاني شئ اذا كان الموضوع مايعجبك بيني له هالشئ

لكن لاتتوقعين مثل ماقالت مرموم بيجيك واحد مفصل تفصيل
وبعد كلمة لوح قويه شوي
انا اعذرك بس لو فعلا كارهته اطلبي الخيره من ربك وحكمي عقلك

]
مرحبا الغاليه


انا مع الاخت مرموم انك عيب والله عيب تشتمى زوجك


الرسول صلى الله عليه وسلم قال بمامعناه (لو كان السجود لغير الله لأمرت المرأه ان تسجد لزوجها)


حبيبتى هذا كلام اول الملجه على رأى المصرين يذبحلك القطه


عقب الزواج بتكونين معاه فى بيت واحد وبيكون بنكم حوار مستمر أن شاء الله
الرجاء كتابة ان شاء الله بهذه الطريقه

الغاليه المرأه هى الى تستطيع تلين الرجل صدقينى بشويت دلع وكلام حلو بيكون لج زوج صالح بأذن الله فكونى أنت له أمه



حبيبتى المره مالها بعد الزواج الازوجها وصدقينى هو بعد ا بتكونين تقريبا حياته وان شاء الله ام عياله



الغاليه وأذا زوجك كان يفكر بالفراش وبس ما كان خسر عمره وتعب نفسه واهله عشان يتزوج

كان فكر بالحرام او الرخيص ..الله يحفظج


لا تخسرين حياتج وبيتج وفكرى قبل اتخاذاى اى قرار

وماخاب من استخار للمولى عز وجل





السموحه اذا طولت عليج[/size][/font]

مشكورين خواتي على الردود بس انا ما كان قصدي اشتمه ( لوح ) يعني فهمه صعب ما يفهم بسرعه مو شتيمه فيه بس هذي الصراحه

والزعل على اتفه الأسبااااااب ذابحني كيف اتعامل معاه؟

شي ثاني وخطير الي اهو : الجرأة >> انا مو متعودة على الجرأة الزايده واهو عكسي جريء بشكل غير طبيعي ، والبنت عادةً تطلع من بيت اهلها ما تعرف شي عن الدنيا وتفكيرها وتصورها للزواج محدود وفي صورة ضيقه غير عن الشاب المتفتح واللي يعرف اكثر بحكم طلعاته واحتكاكه باصدقائه وووو الخ....

شلون اتعامل وياه واهو كلامه كله عن ................................... :(

اهو مو مقتنع بموضوع خجلي ببداية الأيام يقول انتي زوجتي خلاص وانا رافضة هالشي لأني ما اقدر اكون جريئة

فياليت احد يعطيني حل جذري لهالمشكلة اخاف ينهد كل شي ويحس كل شخص فينا انه غريب عن الثاني وغير متأقلم معاه

واحسه ممكن ياخذ اللي يبيه بالقوة وبصراحة هذا اللي مخوفني

والله اني احن على ايام العزوبية كنت مرتاحة:(

حبيبتي استخيري
والله يقدم الي فيه الخير وطمنينا عليج والله يسهل الامووووور


تقبلي تحياتي

اختي ربى شلون استخير وانا مالكة عليه؟

اتوقع كل شي انتهى الحين؟

حبيبتي هذي مشكلات بسيطه تقدرون تحلونها بينكم

يعني شيء من لاشيء

وبالتوقيق لج

حبيبتي نونو طمنيني عليكي.. شو أخبارك مع زوجك إن شاء الله تحسنت الأمور.. أوعدك إن شاء الله أدعيلك اليوم في صلاة قيام الليل إن ربي يكتب لك الخير وين ما كان ويوفقك ويريح بالك ويسعدك.. آمين يا رب..

حبيبتي نونو 2007:)

اول شي صج انج حزينة بس احب مع كل هذا اول شي ابارك لج الف الف مبروك والله يهنيكم ويسعدكم يارب

ثاني شي احب اطمنج ان هالشي طبيعي جدا جدا اللي قاعد يصير بينج وبينه والله ذكرتيني بأيام خطوبتي:):)كنت مثل حالتج واخس بس الحين عرفت شلون تاعمل معاه وصارت العلاقة بيني وبينه عادية والحمدلله صرت اقدر اتفاهم معاه.. طبعا راح تسأليني شلون؟؟

اقولج اشلون...كل ريال ومره هدفهم فالحياة الزواج وتكوين اسرة..والولد دايما ايكون في بداية العلاقة جريء وعلى طول يفكر فالجنس ليش لأن طول عمره محروم وعاداتنه وتقاليدنه فالخليج تحرم العلاقات الجنسية خارج العلاقة الشرعية فأول شي تلاحظه المخطوبة لهفة وجرئة زوجها الغير طبيعية وهالشي يمكن يخليها تنفر منه وتخاف على نفسها وتفكر في مثل الشي اللي انتي فكرتي فيه اللي اهو انه ياخذ اللي يبي بالقوة والله حبيبتي انا صار معي مثل هالموقف وخفت على حالي وكلمته وقتله انه هالشي لازم يصير بعد العرس عيل ايش لزمة العرس مو اشهار للناس ان احنه خلاص تزوجنه وظل يفكر في كلامي واقتنع الحمدلله

ثاني شي عن سالفة الطلعة واهو يبيج تقعدين فالبيت وغيرها الحل حبيبتي بيدج وصدقيني تره كلامه بيتغير بعد الزواج هاي مجرد كلام الحين وبينتهي بعدين ليش؟؟؟ لأن فالبداية اهو يبيج ملكه له وحده ماتشوفين ولاتسمعين غيره تدللينه وتسمعينه كلام حلو وتحنين عليه تره والله الرياييل هاي اللي يبونه وخطيبج واضح انه ينتظر حنانج وقربج ومن كلامه انه يبيج تصيرين اكثر جرئة وتتكلمين معاه عادي لن خطيبج تره مره مو صعب بس محتاج منج مبادرة ودلع وحنان وحب وريج حلو ولين تبين شي طليه مع شويه دلع وابتسامة حلوة ولاتنسين تلبسين له وتتعطرين له وراح اتشوفينه منقلب لج وصاير مثل ماتبين واكثر والله تره فترة حلوة وراح تتذكرنه وتضحكين بعدين :):)


حبيبتي سامحيني على جرئتي واذا في اي سؤال انا حاضرة على الخاص اذا تبين او بالموضوع براحتج ووله يردج الا السانج يالغالية والله يوفقج يارب :)

حاولي تكلمينة األحين قبل ما يطيح الفاس بالراس و تتزوجينة

انصحك تفكرين بالموضوع كويس من كل جوانبه بعد كذا تناقشي معاه باللي مضايقك وتأني في مسألة الزواج يعني حاولي تأخرين الزواج حتى تتأكدين منه كويس واذا ما ارتحتي فكري في الانفصال لكن بعد تفكير
وبسألك سؤال مهم جدا يوم الملكة يعني وهم يملكون لك كيف كان شعورك؟ مهم جدا جدا ارجوا الرد وانا بتابعك0

حبيبتي قلبي معك... بس الصراحة هيك رجال ما بينعاش معو ابدا ابدا الا اذا قررتي تندفني بالحياة...
اذا هيك الوضع انفصلي عنو وخاصة انو انتي بعدك على البر وما فيها شي ..يعني كأنك فسختي خطوبتك..هيدا عمر بدك تعيشيه مو يومين

نونو 2007
اذا هذا اوله فلاتتوقعين الخير منه المهم انتي شوفي نفسج هل انتي من البنات اللي يقدر يعيش مع شخصيه مثل زوجك ولا لا اذا تحسين مايناسب طبيعتج وطاقتج انفصلي احسن ومش مطلوب من المرأه دائما انها ترضى وترضغ لزوج صعب وعنيد ونظرته للمرأه للأشباع فقط فلاتضحكين على نفسج واتذكري انج مش عايشه فغابه انت انسانه وعاقله وقادره تعيشين احسن من غير منغصات وكفاية تحمل الوحده نفسها أمراض مع ازواج مرضى الحياة حلوه عيشيها .............