ساعدوني ارجوكم

هذي فعلا مشكله وحلها صعب ((لكن كله بايدج))

لان كله ولا المشاعر اذا راحت ترى ما ترجع

حاولي ما تفكرين في هالاشياء واقتعي نفسج ان مافيه الا الخير وصدقيني هذي اغلبها وساوس بس من خوفج انج تفقدين هالشي وادعي ربج يجمعكم ويخلي قلوبكم على بعض دوم

تسلمين اختي تعنوعة على ردك وان شاء الله تكون كل هذي الاحاسيس هواجس او وساوس مثل ما تقولين
والله يوفقك و يسعدك يا رب

لا تعطينه وجه لمدة 3 ايام ... شوفي إذا ما يركض وراك ...
وكوني هاديه ولما تكلمينه لا تطالعين بعينه ... طالعي اي مكان ثاني ...
بس عاد مو تمصخينها
وإذا سألك وش فيك متغيره او شي من هالكلام ... طلعي كل الالم اللي بقلبك ... بس طلعيه بطريقه عاطفيه حسسيه انك تعبانه من هالشعور وانك تحسين بالوحده ..


(( هذا رايي والله يساعدك ويعينك ))

عزيزتي
الدنيا تتغير كذلك المشاعر التعبير عنها تتغير
عزيزتي لهفتكم على بعض بتظل ان شاء الله موجوده
بس بحكم الاشغال والمسؤليه الرجال يرجعون للواقع بعد الزواج بعكس الحرمه
لذلك حبيبتي من ناحية المحبه تاكدي باذن الله ان زوجك غلاك باقي في قلبه
لكن اول كان نوادر يشوفك ولحظات جديده عليه فيعبر لك عن شوقه باكبر قدر ممكن اما الحين اكيد يشتاق لك ويتلهف لشوفتك بس اختلفت الطريقه

اختي بقولج شي كلهم جذي بس من ياخذون الي يحبونها يطفون >>>سوري عالتعبير <<< اهم شي يحترمج ويقدرج وصاينج ويعزج والحمدلله على هالشي ادعي الله انه يحفظه ويخليه لج والرومنسيه ماهي موجوده عندنا الله يخلف علينا

السلام عليكم الاخوات غلا المشاعر و كحيلة العين و عاشقكة الجوري و كتكوته
مشكورين على الردود اللي اسعدتني و ريحت بالي و طمنتني
واوعدكم اني راح اهلتم بنصائحكم لي و الله لا يحطكم بضيق ابد

السلام عليكم و رحمة الله و بركاته

ما شاء الله الأخوات ما قصروا...

و هذا شيء يكون طبيعي مع مرور الوقت...و الشغل و المسؤولية...و طبيعة الرجل اللي يفكر بعقله عموما...

ممكن على فكرة سفرة صغيرة إلى بلد حلوة تغير الجو بينكم...و ترجع الشوق و الوله القديم :)

هذي شي وايد عادي

لأن علاقة الحب قبل الزواج تختلف عن العلاقة بعد الزواج اشلون، أقولج إشلون:

قبل الزواج يكون الزوج متلهف وأول ما يشوفج يعرق ويرتبك وما يفكر إلا فيج

وبعد الزواج عاد خلاص اللي يحبه يمه وينام في فراشه لما يدخل البيت عارف إنه راح يشوفها فيه، ولما يطلع بتكون تحاتيه
ولما ياكل هي دايما معاه ووين ما يفر عيونه يلاقيها، يعني خلاص هو مرتاح نفسيا أو تقدرين تقولين مستقر عاطفيا

ولازم تعرفين الفرق بين مشاعر الرجل ومشاعر المرأة

لأن الرجل مشاعره مدفونه، بالنسبه له إن الحب بعد الزواج مو بالكلام يعني إنه وقت اللي تطلبين منه شي ينفذه لج واللي تحبينه
يسويه لج وأي مكان تبغين تروحين يوديج ويتصل فيج وإنتي هناك مو شك لا هذي حب من نوع ثاني وإهتمام.

لكن المرأة مشاعرها خارجيه، يعني تحب الكلام تحب اللمس تحب الهمس تحب النظرات الحنونه والرعايه الحسيه

والله يريح بالج

ما شاء الله البنات ما قصرو

بس بقولج اذا قدرتي تسافرين ترا وايد السفر يغير جو على الأقل اكسري الروتين اللي قاعده فيه،، ولو مثلاً خليتيه كم يوم وسافرتي وياالأهل المهم انج تبعدين كم يوم عنه

وبعدين شوفي اللهفه شلون


الله يرجعج مثل اول ولا يغير عليكم الا بالأحسن



سفيرة فوق العاده

وعليكم السلام ورحمة الله وبركاته


أختي الكريمة bawasim

أنا ما ألومج على إحساسج لأن هاذي طبيعة أي بنت وما أخفي عليج اني لو كنت مكانج

راح أتضايق مثلج.. لكن خليني أقول لج إللي أعرفه وإللي طبقته على خطيبي وإحنا ما بعدنا

كملنا الشهر مع بعض :) بس لازم أسوي دراسة علشان أعرف شلون أتعامل وكيف أتصرف..

أختي أول شي أنصحج بكتابين للدكتور صلاح الراشد

(كيف تكسبين محبوبك؟) و(الفرق بين الجنسين)

وحاولي تخلين ريلج يقرا كتاب (الفرق بين الجنسين) و(كيف تكسب محبوبتك؟)

وراح تعرفين أشياء كثيرة من خلالهم رغم صغرهم وقلة صفحاتهم ..

أختي إللي لازم تعرفينه وإللي لازم تعرفه كل بنت أن سيكولوجية المرأة تختلف عن الريال

وتعبير كل طرف بحبه للثاني تختلف عن الآخر.. يعني المرأة مثلا تعبر عن حبها بكلمات الحب

والغزل وتنتظر بالمقابل المثل لكن الريال لا، ممكن أن يعبر عن حبه بأمور ثانية مثل إهتمامه بالبيت

وتحقيق طلبات زوجته ورغباته وممكن كلام الحب ما تطلع منه إلا غصب.. وإللي لازم تعرفينه

أن أيام الخطوبة تختلف نهائياً عن الزواج لأن الحين الزوج يحس أن عليه مسؤولية ولازم

يعمل علشانها راح يقصر معاج بالكلام ولازم ما تتضايقين لأنج جذي أنتي بتتعبين

نصيحتي لج، لازم تحسسين زوجج بحبج له وأنج فخورة فيه دايما حتى لو هو ما قال شي

بس مو دايم يعني ساعات خفي عنه ولا تحسسينه بلهفتج علشان هو يحن ويشتاق ويحس

أن شي ناقصه.. المشكلة حبيبتي أن معظم الرياييل وخصوصا الشرقيين مو راضيين يستوعبون

أن المرأة دايما تحتاج كلام الحب وأغلب النسوان يفهمون أزواجهم ويحاولون يرضونهم

بالمقابل يلقون الجفا مو بسبب عدم وجود الحب بس بسبب عدم معرفتهم بالتعبير عن الحب..

فأنتي عزيزتي تعرفين زوجج أكثر منا، هل تحسين أنه مهملج في إهتمامه بالبيت ؟؟

هل إذا طلبتي شي يردج؟؟ أو يلبي لج الطلب؟

يمكن يكون زوجج مقصر عليج من كلام الحب بس قاعد يعبر عن حبه بأشياء ثانية بس ما قاعدة

تلاحظينها.. ونصيحة ثانية لا تبينين له لهفتج دايم لأن في رياييل يتمللون.. أدري أنج تحبينه

وأدري أنج ملهوفة عليه بس حاولي ساعات تكتمين هاللهفة كنوع من التغلي عليه ..

ولا تنسين دايما تجددين في حياتج والمفاجات لها تأثير كبير.. ممكن تستفيدين من خبرات البنات

في المنتدى وبإذن الله بتشوفين أشياء تعجبج...

ونصيحة مهمة، أكثري من الدعاء وصلاة الحاجة وأدعي دايم أن الله يألف بينج وبينه

ويقربكم لبعض لأن كل شي بيد الله سبحانه..

حبيبتي لا تتضايقين وصدقيني أكثر الرياييل جذي وتعبيرهم عن الحب يختلف

ولا تنسين يا الغلا أن إحساس الواحد بالمسؤولية يأثر كثير فلازم تتحملين وإذا ما تحملتي

زوجج من إللي راح يتحمله ؟؟


الله يوفقج ويهنيج ويجمعج مع زوجج على خير :)


و السلام عليكم ورحمة الله وبركاته