باركولي صرت ام خالد ...

السلام عليكم ورحمة الله وبركاته
هلا اخباركم

غبت عنكم وااايد ووحشتوني

بس المهم مطول الغيبات جاب الغنايم

وانا جبت لكم غنيمة حلوه

وهي ( خالــــــــــــــــــد )

الحمدلله ربيت وجبت ولدي البكر خالد

والحين توني مكمله ال40 من يومين تقريبا

والحمدلله كانت ولادتي سهلة ومريحة والدكاترة ماقصروا والنرسات

والحين بقولكم قصتي ...

يوم الخميس احنا نتجمع ببيت الوالد خواتي وحريم اخواني ومن المعتاد اننا نروح عالساعة 6 ونص 7 بالكثير

انا كنت حاسه بالم بسيط من الصبح وماقلت لحد ولما كان زروجي يسالني كنت اقول له لا بس الياهل يتحرك ولانه كبر احس بالم وكنت كله بالغرفة عشان ام زوجي ماتشوفي وتلاحظ تعرفون الحريم يعرفون

المهم اول شي قلت مب رايحة بيت الوالد بس بعدين قلت لا اكيد امي بتحاتي ومابتنام الليل وانا اصلا مدري هذا الم ولادة ولا لان كان باقي على موعدي 17 يوم

المهم رحت على الساعة 7 وكنت كله منبطحة وطلعت الساعة 9 مع اننا جلس لما 11 بس لاني حسيت بتعب شديد ولا يطاق

والكل قال لي يبين عليك تعبانه وكنت اخفي تعبي

المهم رحت بيت اهل زوجي اللي ساكنه فيه انا
وزوجي يقول لي يالله نروح المستشفى شكلك تعبانه

وكنت اقوله لا لاني اخاف المهم جلست اقرا سورة مريم والزلزله واصلا من بداية حملي وانا اقرا سورة مريم ترا وااايد تنفع

ولما اتعب زوجي يقرا وكنت اتعصر واتالم واشوي وبصيح بس انا من النوع اللي مااحب اصيح
من زود الالم كنت امسك يد زوجي بالقو لدرجة اني جرحته

المهم زوجي كان شاري كتاب عن الولادة والحمل جلس يقرا وتبين ان الالم اللي فيني طلق وقعد يحسب لي مثل ماموضح بالكتاب

المهم الساعة 3 الفجر قررت اني اروح المستشفى وطول ذاك الوقت طبعا مانمت وكل مايقولي زوجي بوديك المستشفى كنت اقوله اكيد انت ماتحبني وتبي توديني لاني كنت اخاف من كثر الكلام اللي اسمعه واصلا انا بعد صغيرة وبكر لان انا عمري الحين 19 يعني بروحي بيبي ههه

المهم اتصل زوجي بامي وامه جات معاي امه واخواته الثنتين اللي بالبيت مامعرسات ومرينا على امي

المهم رحنا المستشفى وزوجي كان يسرع بطريقة جنونية لاني كنت ماسكه يده وارعص عليها وهو يعرفني مابتكلم ولا بصرخ فهو حاس اني اتالم

رحت المستشفى وقالوا لي انتي اشلون ساكته على نفسك واستحملتي انتي مفتوحة 5سم

مت من الخوف وودوني غرفة الولادة من 4 الفجر لما 6 الصبح ربيت وكنت كله بالغرفة ادعي واقرا سورة مريم وماصحت كلش كنت استحمل حتى لدرجة ان السستر تقول لي انتي ماتتالمين

بس دموع تنزل وانا كنهم حاطيني على الصامت بس اخر شي لما نهاية الراس بتطلع صرخت

والحمدلله ماخذت الابرة مالت الظهر

وعقب ماربيت تقول لي فنش

الا قلت لها بوي اور غيرل لاني ماكنت سائلة بغيتها مفاجئة الا قالت لي بوي

والحمدلله خلصت ودشوا علي خواتي وامي وام زوجي وخواته وشافوني وشافو البيبي

وسميته خالد على اسم ابو زوجي

وزوجي كان طاير من الفرحة وانا عن نفسي مااقدر اوصف لكم شعوري اول ماشلت لودي قلت وااي فدييييييييييته الحين صج هاي ولدي مني ومن زوجي مومصدقه

والحمدلله حجز لي زوجي سويت وراح محل كنه في المعمورة يجهزون لج الغرفى بالف ريال

والله تجنن مع فراش البيبي وفراشك والطاولات ويحطون لك زينة ونفافيخ وسلاسل وكله بلون ازرق

وكان حاط لي باقة ورد كبيرة وحلوة وغريبة وحاط بها ساعة اوميغا الجديدة الفضية والذهبية

واول مادخلت الغرفة تفاجئت بالغرفة والهدية لانه ماكان قايل لي شي

المهم طولت عليكم بس حبيت اقولكم

ان سورة مريم هي سبب تسهيل الولادة على

فاتمنى من الحمل الحين يقرون لما يربون وااايد بتنفعهم

وشكراااا

( سؤال ممكن اغير اسمي لان هاي اشتراك بنت خالي وابي اسمي نفسي ام خالد )