الموضوع كان صعب عليا اوى

يارب تكونوا لسه فاكرنى
انا كنت حامل وكنت عالطول باقرا اللى بيتكتب عن الحمل والولادة وكنت باكتبلكوا كل اللى بحس بيه
الحمدلله رب العالمين انا ولدت من 3 اشهر
بس كانت الولادة وما بعدها صعب جدا يارب ماحد يمر باللى انا مريت بيه

انا جالى الم الولادة واستنيت لحد الصبح ورحت المستشفى والدكتور لما كشف عليا قال لزوجى ان نبض البيبى ضعيف ولازم اكون فى المستشفى
واخدت طلق صناعى يعنى جربت الم الولادة الطبيعية ولما ماكنش فى الم والنبض ابتى يقل اكتر
دخلت ولادة قيصرية
ولما فقت من العملية شعرت بالالام صعبة اوى وكان نفسى امى الله يرحمها تكون معايا
وسألت على ابنى وقالولى انه جاى والوقت تأخر وسألت تانى
والوقت بيمر وفجأة
جت ممرضة ومعاها طفل لونه ازرق داكن ومالوش صوت وقالتلى ابنك اهو ولسه جاية حالمسه راحت جارية بيه
وانا لسه مافوقتش من البنج سالت ماله؟ قالولى اصل عنده الصفرا
وانا واحده متعلمه والصفرا مش بتخلى البيبى ازرق
واستنيت يوم والتانى وابنى مش باشوفه وبيقولوا فى الحضانه وانا من الالم مش قادرة اتحرك لانى كان عندى انيميا ومع العملية ماكانش فيا قوة

وفى اليوم التالت حسيت ان قلبى مش مطمن هو انا كنت قلقانه من الاول بس مش عارفة . لحد ما والدى قالى احنا حانقولك على الحقيقة

ابنك اتولد عنده صعوبة فى التنفس مش بيقدر يتنفس لوحده لان الوصلة اللى بين الشريان مفتوحة
ولازم يفضل على جهاز التنفس
ليكوا ان تتخيلوا كنت عاملة ازاى وانا باسمع كده عن اول ابن ليا
ماحستش غير انى باتسند وانا باموت من الالم ونازلة الحضانة لاقيت منظر يارب ماحد يمر بيه
ابنى محطوط عليه كمية اجهزة( رسم قلب __ ضغط__ قياس دم__ تنفس __ خرطوم تغذية__ حقنة مثبته فى جلده عشان بياخد دوا)
جالى انهيار لانى حتى ماكنت قادرة ادخله
وطلعت حجرتى وانا عمرى ماحسيت بالم فى قلبى كده
لانى اكتشفت ان اصعب حاجه ان ابنك يكون مريض

كل يوم كنت بانزل اشوفه ومش حاطول عليكوا قعدت على الحالة دى 3 اسابيع
وكنت مع كل يوم بيمر احمد ربنا انه عايش
لحد ما الحمدلله رب العالمين انه طلع من الحضانه طفل طبيعى جدا والدكتور بتاعه قالى انسى خالص اللى حصله لان خلاص الفتحة دلا قفلت تماما والحمدلله من غير عملية بالادوية


حبيت اقولكوا لانى كنت معاكوا كل يوم فى حملى وكنت معتبراكوا اخواتى

ويارب كل ام تقوم بالسلامة من غير اى تعب
لانى دلوقتى ابنى عنده 3 شهور ومجرم وشقى الحمدلله