قصه ولادتي بابنتي البكر

تحيه وبعد...

طبعا قصه ولاادتي أحسها حلم... الحمدالله عدا على خير وكانت النتيجه بنتي حبيبه قلبي...

يوم الخميس يصادف 1/9 كنت خلاص حدي طفشانه وأبغى أولد .. طلعنا تعشينا انا وزوجي برى وكنت اقوله الله يخليك وقف الصيدليه اشتر لي خروع وهو كان نعسان يقولي ما فيني حيل خليها بكره الصباح.. وانا خلاص شوي واصيح .. قلت يالله استنى لبكره..
طبعا انا بكريه وما ادري وشو الطلق وكان فيني طلق بس انا احسبه تعب ونمت الساعه 2 بالليل وصحيت الساعه 8 يوم الجمعه بس عشان الخروع وصحيت زوجي عشان يجيب لي خروع .. وراح الحمدالله جاب لنا فطور وجاب خروع وعصير برتقال...

المهم العلبه كانت 60 مل والي اعرفه ان الوحده لازم تشرب 30 مل ... قلت لزوجي يالله انت نص العلبه وانا نصها.. قالي ليش طيب انا ما راح اولد .. قلت له حالك من حالي اي شي اسويه تسوي زيي...د

قلت له انت اول .. مسكين شرب 30 مل .. بس انا ما قدرت كنت اشوف الزيت وتحوم كبدي.. وهو يشجعني ... لما بالاخير تشجعت وشربببببببببببته...

الناس الله يكرمكم اذا شربوه يجيهم اسهال .. انا قمت استفرغ .. يمكن استفرغت 3 مرات .. وتعبت مره... وزوجي مسكين كل شوي الحمام...

بعدين كان يوم الجمعه وحنا غالبا كل جمعه نتغدى عند أهله... قالي يالله البسي عشان بعد شوي نتغدى عند اهلك... قلت له كيف اروح واذا جاني اسهال وتوهقت عندهم ... طبعا اشوى اقتنع بكلامي... بعد ما شافني كل شوي رايحه الحمام..

المهم شكل الخروع سوا اسهال لبنتي ياعمري.. وتنزل معي مويا لونها أخضر قليله مع شويه دم تقريبا ملت الفوطه الصحيه.. وأختكم عليميه ماتدري وش السالفه ؟ واحسبها السداده الي تنزل قبل الولاده بكم يوم... عاد رحت فرحانه لزوجي قلت له نزلت السداده ابشرك يعني خلال يومين ان شاء الله بولد ... المهم وفيني الم في بطني وظهري بس اني احسبه الم التاسع مع انه كان شديد واول مره يجيني من بدايه التاسع...

بعدين رحنا تغدينا في بيت اهلي لأن ما عندنا غداا... وكان بطني مره يوجعني وكل شوي اروح الحمام الله يعزكم وتنزل مويا زياده واغير الفوطه الصحيه.. وما قلت لأهلي...

امي تشوفني تقولي شكلك مطوله ما تولدين الا بعد 10 أيام.. .. لما جت الساعه 3 العصر انا خفت زادت المويا..

قلت لزوجي خلنا نرجع البيت .. المهم كلمت دكتورتي على طول وقلت لها السالفه.. وعصبت مني .. قالت لي انا قلت لك السداده تصير قليله مو بهذي الكميه..

تعالي طوارئ على طول.. وقلت لزوجي واخذنا شنطه المستشفى وبطني يوجعني وظهري يوجعني مره.. وانا فرحانه واضحك من الخوف والفرحه اني بولد..

بس كنت متوقعه اني ما راح اولد بيقولون لي ارجعي البيت... المهم وطول الطريق بس اضحك.. زوجي مسكين خاف يحسبني انهبلت... وكل شوي يقولي لا تخافين ما راح تولدين ... قلت له لا ان شاء الله اولد واضحك ...

توني واصله المستشفى وادخل الطوارئ.. الا تنفتح المويااا كلها ولونهاا اخضر .. ويودوني غرفه الولاده ويحطون التخطيط حق النبض وحق الطلق...

وقالت لي الدكتوره مره خطر على الجنين هذي المويا اذا ما ولدتي اليوم راح نسوي لك قيصريه ... انا خفت بس قلت يالله اهم شي اولد <==مستعجله على الولاده..

المهم كشفت علي وقاست لي الرحم طلعت مفتوحه 2 سم .. قالت كويس بس نحط لك طلق صناعي عشان تولدين اسرع...

وانا مسويه البنت القويه قلت لها يالله حطي.. كل شي عادي.. اعطتني حقنه شرجيه ودخلت الحمام وجاني اسهال شديد بعدين طلعت...

وامي تكلمني تقولي وينك فيه قلت لها بالسوق وجوالي بيطفى لا تدقين علي ....

حطت لي الطلق الصناعي الساعه 4العصر ما امداها حطته الا جلست اصيح ابي ابره الظهر .. قالي زوجي استني لا تاخذينها احسن لك بس عييت...

كلمت الدكتوره وسنه يالله جت عشان تاخذ التحاليل ... خلال هذا الوقت جابوا لي كمام طبعا انا اخذته واحس اني طايره .. وزوجي يكلمني وانا اخربط.... قمت ما اذكر شي... المهم بعدين عطوني ابره الفخذ هدددت الالام كثييير... بس لازت مؤلمه...

وأمي تكلم زوجي تقوله وين زوجتك يقولها بالمسجد تصلي .. قالت أول ما تطلع خلها تكلمني...

المهم مرت نص ساعه وانا ما كلمت.. وامي ازعجت زوجي كل شوي تكلم وهو ما يرد.. قام سكر الجوال...

خلال هذا الوقت
وزوجي يقولي يالله اولدي عشان اول ما تطلعين من الاربعين نسافر... انا ما كنت اسمع وش يقول .. ما سمعت الا هذي الجمله... طبعا هو يلعب علي...

طبعا ما جت الدكتوره الا الساعه 9 ونص بالليل ... عشان تعطيني ابره الظهر وانا كنت متوسعه 7 سم.. قالتلي حرام تاخذين الابره ما راح تفيدك .. قلت خلاص بس متى راح اولد قالتليي قبل منتصف الليل ...

والحمدالله جت الساعه 11 بالليل وتجمعوا الممرضات والدكتوره ويقولون لي ادفعي.. وانا كنت خلاص تعبانه.. اقولهم ما ابغى ادفع اشفطواا البيبي.. واصرخ عليهم ما ابغى ماابغى... اخر شي زعلت قلت لهم والله اسكر رجليني... طبعا خلال هذا الوقت زوجي كان ورا الستاره .. مسكين يحاول يهديني وانا اقولهم ما ابغى اشفطوووه راح اموت... بالاخير فكرت بيني وبين نفسي .. قلت يا بنت ادفعي وارتاحي .. قلت يالله راح ادفع... وجلست اتعصر يمكن ثلث ساعه لما طلع راس جوجو الحمدالله وطلع باقي الجسم وبعدين ما ادري عن الدنيا .. ما حسيت بالمشيمه ولا الحبل السري ولا شي ... كنت بس اشوف جوجو شايلها زوجي واسمعه ياذن باذنها ...

كلم امي على طول قالها ولدت أم جوجو الحمدالله وكلم أهله وقالهم أني ولدت...

طبعا جو اهلي على طول ونامت عندي اختي بالمستشفى.... والحمدالله انتهت القصه على خير ..

أدري طولت عليكم بس قلت أقص لكم قصه ولادتي بالتفصيل الممل...

والحمدالله جود كان وزنها 3 كيلو و 300 جم وطولها 50 سم ماشالله تبارك الرحمن..

ادعوا لي بنتي تكوووون جميله واخلاقها كويسه والله يصلحها يارب..