فقدت الثقه بكل اصدقائي

بسم الله الرحمن الرحيم
[align=justify]السلام عليكم ورحمة الله وبركاته تحية طيبه معطره بالفل والياسمين لكل مرتادي منتدى عروس، تعرضت لمشكله مع اصدقائي قبل اربعة اشهر تقريبا وحده منهم بالرغم من اعتذاري لها مرتين ما تكلمني والثانيه الله يهديها ويسامحها ان شاء الله كشفت عن حقيقة صداقتها لي ، تعرفون يا بنات كنا اصدقاء ومافي احسن منا في يوم وليله انتهى كل شي المشكله كالتالي حاولت انصح صدقيتي في شغله مهمه فهمتني غلط وكبرت الموضوع ودخلت اهلها وكانت نيتي والله عالم فيها هي النصيحه المهم راحت الصديقة الاولى خبرت الصديقه الثانيه على الحديث الي دار بينا ولا بعد قالت اني حقوده وحاسدتها يا ناس ليش احسدها الحمدلله مش ناقصني شي ، طبعا البنت الثانيه حاولت ادافع عني بس اقنعتها الاولى بكلامها طبعا زودت البنت الاولى كلام ماله اساس عني وقالت اني اطلع كلام على البنات ، الثنتين بطلو يتصلون فيني ويكلموني و بعد فترة صارت مناسبة عند البنت الثانيه اقصد الصديقة الثانية واتصلت لها اباركلها وفتحت معها الموضوع تخيلو قالت لي اني انا طلعت عليها كلام سئ قلت لها واجهيني في البنت الاولى سكتت لا وبعد قالت انا طلعت عليها كلام في يوم من الايام و ربي يشهد اني في ذاك اليوم ما كنت جالسه معها وقلت لها الكلام هذا بعدها بشوي بدات تتكلم على البنت الاولى تخيلو عرفت وقتها انه مالها آمان وان لها وجهين ، اتفقت معها علي في البداية وقالت اني حقوده والحين تقولي كلام عن البنت الاولى طبعا انا قلت لها مالي شغل في حد انا بس ما ابغي احد يشيل في خاطره عني وابيكم تسامحوني عشان ربي يتقبل اعمالي ويغفر لي ، تعرفون طلعو علي كلام ما ادري من وين وقالو وقالو الله يسامحهم ، بس نصيحة لكل بنات عروس اسراركم الشخصية ما تعطوها لاي احد مهما كان واذا كنتي متزوجه لا تبينين لاحد انج مرتاحه وسعيده مع ريلج ترى في ناسي عيونهم مش شايفه خير
تعرفون انا من النوع الي ما اقول اسراري بالرغم من الكلام التافه الي كنت آتمنهم عليه ما حافظو عليه كيف لو قلت لهم عن مشاكلي واسراري الحمدلله ربي حماني من لسانهم وشرهم ، انا مب شايله في قلبي عليهم والله اني ادعيلهم دايما وادعي لكل اصدقائي بس بصراحه حسيت براحه كثيره لما بطلنا نتكلم مع بعض ما ادري شو سبب الراحه ،
المشكله الي اعاني منها حاليا هي اني صرت اقلل ما اتصالاتي بصديقاتي الباقيين واذا كلمتهم اكلمهم شوي واطمن عن احوالهم اسكر وما احاول افتح مواضيع ابدا شخصية معهم وبالرغم ان منهم صديقات بلسم للجروح بس ما عاد عندي ثقة بحد نهائيا وطلبي انكم تساعدوني في انا اعود مثل ما كنت في السابق .