تعبانه وطفشانه إيش الحل

السلام عليكم ورحمة الله وبركاته
كيفكم بنات إن شاء الله تمام
بصراحه أنا طفشانه وودي على أحد أشكي له بعد الله خصوصا إن أنا في منطقه ماأعرف فيها أحد وزوجي مشغول الليل والنهار ماعندي إلا التلفزيون أقابله وعيالي الإثنين الله يخليهم لي
أنا حامل في التاسع الآن وعندي آلام شديده بالظهر وآلام زي ألام الدوره تجي أحياناً وتروح والتقلصات حدث ولاحرج ولما تجي أحس بخدر في فقرات الظهر وأيضاً أحس بألم في المنطقه الحساسه لدرجة إني أتوقع ولاده مبكره علماً إن آخر دوره جاتني كانت بتاريخ 18-11بالهجري 30-12 بالميلادي وموعد ولادتي في 3 رمضان إذا الله كتب وأنا الحين خلاص منتهيه أبي أولد أحس بثقل غير طبيعي صايره تجيني هواجيس وأوهام خايفه على البيبي يصيرله شيء أقول في نفسي لو كان الحبل السري ملفوف على راس النونو إيش بيصير فيه ؟ لو ماولدت في وقتي إيش أسوي وش بيصير فيني لأني أعتقد بأنني لن أتعدى إطلاقاً 3 رمضان لأن أنا حللت تحليل الحمل يوم 19-12 -1425 في البيت وطلع واضح وضوح الشمس إن أنا حامل يعني على الأقل راح أكون حملت قبل تاريخ التحليل ب14 يوم على الأقل قال زوجي يبي يجيب لي شغاله تساعدني بالبيت والعيال وبعد ماأولد بس أنا رفضت ماني متقبله وجود شغاله عندي إطلاقاً خصوصا إن أنا جربتهم قبل كذا ونكدوا علي حياتي وجتني منهم حاله نفسيه صرت أكره حتى شوفتهم بالشارع
تكفون ردوا علي ترى والله تعبانه وطفشانه بالحيل حتى المشي ماأقدر أمشي أولاً لأن زوجي مو فاضي وحتى لو فضي ظهري ماأقدر أتحمل عواره