مشكلة حياتي .. عدم انتظام الدورة .. نصايحكم

السلام عليكم ورحمة الله وبركاته

من أسبوع و أنا أفكر أحط الموضوع ولا ما أحطه .. بيساعدوني ولا لا ..

في الأخير قلت باعرض مشكلتي و أتوكل على الله .. بس على فكرة قبل لا أحطها دورت في القسم
عن مشكلة قريبة ما لقيت ..

الله يسلمكم مشكلتي مع الدورة الشهرية المتلخبطة ما أعرف لها وقت معين .. تجيني شهر و سنة لا .. تصدقون ؟!! ما أبالغ بصراحة و أحيانا ما أشوفها في السنة إلا كم مرة و في هالمرة اللي تجي فيها تعدي الأسبوع أحس بأعراضها الطبيعية ألم في البطن و الظهر ممكن أحس بثقل ما أطيق احرك ساكن ..
رحت من سنتين أو ثلاث سنين أفحص وبعد ما شرحت للدكتورة الوضع طلبت مني أسوي منظار
@@ أنا خفت وايد من سالفة المنظار هاذي وقررت أطلع من عندها بعد ما قلت لها ما تشوفين شر .. رميت الأوراق بالزبالة - تكرمون - وما رجعت لها .. وما سوت فيني خير خلتني أوسوس و احاتي ..
لين ما قررت من سنة ونص إني أروح أفحص مرة ثانية .. و الله طيحني عند دكتورة غير الأولى .. طمنتني شوي وطلبت تسوي لي فحص بالتلفزيون للمبايض لأنها شكت ممكن يكون عليها كيس أو شي .. بس الحمدلله طلعت النتايج إيجابية ما في أي تكيس .. و قالت هذا شي طبيعي الدورة لين الحين ما انتظمت عندج و راح تنتظم لا وصل عمرك تقريبا 25 يعني بعد 3 سنوات من الآن : (
مع العلم إن عمري 22 و متملكة وكل خوفي إن هالمشكلة تأثر علي بعد الزواج ..

البعض قال لي هذا شي طبيعي لا تاخذين حبوب او شي لأنها بتنتظم بعدين << طيب متى بعدين ؟؟
و قريبتي عندها نفس المشكلة من قبل لا تعرس و ما تعالجت أو شي فلما حملت جابت بنت وحدة بس بعد ست سنوات ظلت تعالج و كان حملها الثاني صعب جداً معاناة بمعنى الكلمة بس الحمدلله جابت توائم .. و أنا هذا اللي مخوفني أبي أتفادى رحلة العلاج الطويلة قبل العرس ..

بشنو تنصحوني لأني فعلا متخوفة

و جزاكم الله خير