زواج الأم ........

مرحبا ريم

صراحة الموضوع حساس جدا
طبعا من الناحية الشرعية هذا من حقها
ولكن في رأيي انا يجب يتم ردع هذه الام المتصابية لانها تقضي على حياة اولادها
وخاصة انها تتصرف بطريقة صبيانية "على قولتك متصابية في نهاية الاربعين"
كثير من الامهات جيه وانا ممكن احس باللي يمرون فيه اولادها
لازم احد من الخوال او اهل الام يكلمها ويردعها عن هذا الامر ويهددها بسحب اولادها عنها اذا تم ذلك
ادري اني متحاملة كثير على هذه الام لكن هي عاشت حياتها فليش تريد اتحطم حياة اولادها عشان ترضي رغباتها و تشبع انانيتها وغرورها!!
كثير من النساء في الاربعينات والخمسينات كذلك متمسكين في الحياة وفي انوثتهم اللي كانت وعايشين في عالم خيالي يهدمون فيه عالم عيالهم وخاصة الاولاد اللي ممكن يحسون بالعار والنقص والاذلال
الله يهديها ان شاء الله
اذا ما فاد كلام الاهل لازم اولادها يكلمونها و يفهمونها شعورهم
الله يكون في عونهم يا رب

الاولاد اختي قاعدين يقولولها و يصيحون كل نهار و لجؤلي بما اني قريبتهم

بس شسوي

هي قاعدة تقول لنها مب قاصر و محد وصي عليها

و اظن انه كل ما بنعاند نحنا أهلها هي بتعاند أكثر

مالت على الحريم أهم بعد عينهم زايغة

ادري المسأله صعبه شوي...و يتفرع منها فرعين


اولا..

الاولاد..شو ذنبهم ان امهم تتزوج و يكون لهم زوج ام...
و في الاساس شو ذنبهم ان امهم و ابوهم تطلقوا...
هذي هي بعض اثار الطلاق..عشان جذيه كان ابغض الحلال....يعني سواء ان تزوجت الام ولا ما تزوجت هم في ضياع و صراع بين الام و الاب...
اكيد الاب بيتزوج و بيصير لهم زوجه اب..يعني لو عاشوا مع الام بيعيشون في استهتار لان ما فيه اب يردعهم..ولو عاشوا مع الاب..بيعيشون مع زوجه اب..وما ادراك ما زوجه الاب!!! وحتى لو كانت طيبه فهم عايشين بعيدين عن حنان الام


ثانيا

الام...
اليست انسانه ولها الحق في الحياه؟؟؟؟ اليست امراه وتريد ان يكون لها زوج يساندها في هذي ا لحياه...خصوصا وانها لم تعش حياه مستقره مع الزوج السابق...
مثل ما الاب له الحق انه يتزوج...الام كذلك لها الحق ان تعيش و محد له الحق في لومها لان الشرع حلل لها هالشي ....
و حتى لو كانت في نهايه الاربعين فلها الحق انها تتصابى مع زوجها...و من حقه انها تتزين له و مثل ما تقولون ننصابى..
طبعا في كثير من الامهات ما يتزوجون مره ثانيه...بس اللي تتزوج ما عليها ملامه...و ياما ازواج امهات كانوا على ابناء زوجاتهم احن من ابوهم الحقيقي...

هالنوع من الامهات اعتبرهم عار على عيالهم والله
خاصة اذا كانت من النوعية اللي اتقولين عنها
اوكي وين اخوانها؟
ليش عيالها ما يهددونها انهم بيطلعون من حياتها..
ادري ان الموضوع صعب يعني من ناحية السكن والماده واذا احد من الاعمام او الاخوال ممكن يتصرف انه ياخذ عيالها عنها؟
انا اعرف عائلة خال العيال حجر على امهم لانها كانت تصرف اموال عيالها اليتامى
الموضوع كان وايد صعب بس وقفها عند حدها
الحرمة يبالها حد يوقفها عند حدها
بس لازم احد يكون فعلا مهتم بهذول الاولاد ومستعد يتحمل النتايج مهما كانت

بس يا angel eyes هذا ابوهم اتوفى مش مطلق امهم
المسأله هني وايد حساسه
والنوعية اللي تتكلم عنها ريم هي النوعية الانانية البحتة
انا عمتي اطلقت من اول سنة زواج واتقدمولها كثير بس هي آثرت انها اتربي وحيدها اللي الحين هو ابو عيال لين ما كبرته وعطته كل اهتمامها و حبها وعايتها لانها لو اتزوجت ما كانت بتقدر اتوفي بحقه لان بيكون عندها زوج وله حقوق
الاب غير بيفهم دور الام تجاه ولدها بس زوج الاب مهما كان صعب انه يكون مكان الاب
والحين ولد عمتي ساكن معاها ومع زوجته ومن اول يوم زواج قال لزوجته اتشوفين هذي الحرمه "اللي هي عمتي " هذي امي وابوي وجدام الناس كلها
سبحان الله ما جزاء المعروف الا المعروف وكم تسوى هالتضحية

عزيزتي الناس انواع...

فيه المضحيه اللي عقب ما يتوفى زوجها خلاص ما تتزوج غيره و تربي عيالها...بس فيه حريم ما يقدرون يعيشوم من غير زواج...ما نقدر نقول انها عار....ليش شو جريمتها؟؟؟ الزواج على سنه الله و رسوله!!؟؟؟

محد له الحق انه يوقفها...وحتى لو منعوها...تعتقدون بتصبر بدون زواج؟؟؟؟ بيكون فيه ثاني و ثالث و رابع...
و بعدين مب كل الازواج اشرار...و فيه اللي يحلون مكان الاب و يربون العيال احسن عنه...

الحين إذا الزوج تزوج على زوجته وزوجته على قيد الحياه تصير سنة الله ورسوله......

وإذا المرأه المسكينه إللي لاحول لها ولا قوه إذا تزوجت بعد ما يموت زوجها أو يطلقها صارت جريمه...

هذي هم تزوجت على سنة الله ورسوله....

ولا يتعقدون أولادها ولا شيء يمكن يكون عون لهم خصوصا إذا كانت أمهم ما تشتغل مثلا من وين راح تصرف على أولادها؟؟؟؟


الصراحه هذا لا عيب ولا حرام ومن حقها إنها تعيش حياتها.....

وهذي الأشياء على حسب المرأه نفسها... فيه ناس يصير عندهم كأنه غدر لو تزوجوا على أزواجهم بس لو جينا للحق....


هذي سنة الله ورسوله ولو هذي فيها شيء كان الله ما حلل هذا الشيء!!!!


تكلموا عن موضوع إذا تزوج الرجال على زوجته ثانيه وثالثه ورابعه مو تتكلمون عن هذي الحاله إللي أحسها صراحه راح تنقذ أطفال أبرياء كانوا ما راح ياكلون ولا يشربون ولا يعيشون زي الناس والعالم لو ما صار عندهم زوج أم (لو كانت أمهم ما تشتغل)...

بصراحة لازم ننظر للمسألة بعقلانية ولا تاخذنا العاطفة و على حسب ما قلتي اختي ان عندها مراهقين وهذولا يبيلهم مراقبة لانهم في فترة حساسة وما تقدر عليها المراة لوحدها لابد من وجود الرجل واذا كان الرجال طيب فهو بيعامل اولاد زوجته بالطيب وكيف تنشغل عن عيالها كانت قبل مشغولة بابو الاولاد وانا ما اتوقع ان هذا سبب يمنع انها تتزوج وعادة اللي تتزوج مرة ثانية تكون هي الزوجة الثانية واكون معك صريحة ان الوحدة تعيش مع زوجها افضل من انها تكون عالة صحيح اخوانها واهلها مو مقصرين معها بس بتحس انها تثقل عليهم والله يكتب اللي فيه الخير.

ريم81:
الاولاد اختي قاعدين يقولولها و يصيحون كل نهار و لجؤلي بما اني قريبتهم

بس شسوي

هي قاعدة تقول لنها مب قاصر و محد وصي عليها

و اظن انه كل ما بنعاند نحنا أهلها هي بتعاند أكثر

مالت على الحريم أهم بعد عينهم زايغة

وليه العناد أختى .. حرام تمنعوها من شئ هو حقها شرعا وهى اختارت انها تتزوج .. يمكن ما تقدر تصبر على نفسها والله عليم بعباده


انتم المفروض تحاولوا تهدوا اولادها من جهتها .. بمعنى آخر كونوا فى موقف حيادى وإذا اصرت على موقفها اختاروا معها الزوج الصالح

الله يوفقها ويهدي لها اولادها

بسم الله الرحمن الرحيم

عــــدت مرة ثانية للموضوع لأن بصراحة تعاطفت معها و حسيت ان الهجوم عليها كبير وهى لم تفعل ما يستحق هذا

الهجوم سوى انها تحاول اشباع حاجتها النفسية والعاطفية بما يرضى الله

و ما أصعبها و هم يرون الأم تتصابى و هي في نهاية الأربعينات من العمر

عبارة تحمل الكثير من التجنى فلا علاقة للتصابى بالزواج بل ربما تكون حاجة الإنسان للزواج

وبحاجة لمن يؤنس وحدتها اكبر كلما كبر سنه وانهمك كل من حوله فى دنياه

أختى ادعى لها ان الله يوفقها للى فيه الخير ويرزقها بالرجل الصالح اللى يربى أطفالها تربية

صالحة

مرة سمعت فى برنامج .. أخت اتصلت على شيخ وقالت له تقريبا نفس المشكلة وكيف تقنع اولادها بزواجها وهم معارضين بشدة .. بس الفرق انه اولادها كبار ومتزوجين ومستقلين فى بيوتهم

لكن اللى لفت نظرى بشدة فى الموضوع من خلال سردها للحكاية ان والدتها لما كانت فى نفس سنها تقدم لها ايضا رجل اراد الزواج وكان جميع أولادها موافقين إلا( هالبنت فى وقتها السيدة الوحيدة الآن ) وشوفى سبحان الله لفت الأيام ودارت وانحطت السيدة فى نفس الموقف ( استجداء الموافقة ) من اولادها .. واللى كانت ترفضه فى وقت الشباب والطيش وعدم الإحساس بالآخرين اصبحت تتمناه الآن وبشدة


فافعل كما شئت كما تدين تدان

حتى لو كان عمرها 70
في تصوري من حقها والمفروض نحن الأبناء نتربى على احترام حقوق الوالدين
مثل ماهي ماقصرت في حق ابناءها وربتهم احسن تربية واحترمت حقوقهم وربتهم واهتمت فيهم
اعتقد من حقها عليهم انهم يحترمون حقها في استئناف حياتها الخاصة بعد وفاة والدهم او انفصالها عنه . . .
ليش دايما نحن الأبناء نطلع في الصورة وكأننا مظلومين

واللي اشرف منها واشرف من أمهاتنا كل ابوهن ، الصحابيات الجليلات تزوجن بعد وفاة اللي اشرف من آباءنا
باختصار .. حق من حقوقها وماله حق اللي يعترض عليه
سلام

ما شاء الله البنات ما قصرو بالرد ..

تنثر الكون عطرا ........... صح الدنيا سلف ودين

أولا لازم تفهمين أولادها ان من حق امهم انها تتزوج مرة ثانية و انهم من المفترض يفكرون فيها بايجابية وما يكونون انانيين ..
وان من حقها تعيش حياتها .. ووفاة الأب مو نهاية العالم ..
بس في نفس الوقت الأم لازم توعى .. وتهتم أكثر بأولادها ..
وتعطي حياتها .. و حياة أبنائها .. كل على حدى حقه و بالتساوي ..


كلمي الأم .. ونبهيها لهالنقطة

السلام عليكم جميع

و الله ماقصرتوا كلكم و اشكركم على صراحتكم

و بصراحة أكثر بردتوا على قلبي و الله


معاكم حق الأم من حقها تتزوج شرعا و منطقا

بس و الله الأولاد غمظوني و هم يصيحون و يقولولي

الوالد ما يفهمون أمهم إلا امهم و لا يعطونها إلا دور الأم

ما يتصورنها زوجة أبدا

الله يعافيكنا و يعافيكم جميعا ولا يتعرض أحد لهاالموقف

و اعتذر ان كان و صف متصابة جارح بعض الشيء

بس انا ما أقاوم دموع الاولاد

سلام
طبعا كلامكم صح
وممكن اكون اتحاملت كثير على هذه الام
لكن هذا من واقع تجربة شفتها في اكثر من بيت
كلمة متصابية اللي ذكرتها ريم ذكرتني بهذه الحالات اللي كانوا فيه الامهات لا يراعون لا دين ولا ابناءهم وهمهم الدنيا ومتعتها و يتصفون بقلة تحمل المسؤوليه
طبعا انتم عارفين النوع اللي اتكلم عنه
اكيد الناس اجناس ومش كلهم مثل بعض
وفعلا كلامكم عقلاني اكثر ومش متحامل مثل كلامي ولكن انا لي عذري
الله يهدي الجميع و يوفق الام مع ابناءها
واسمحولي عالاطال

انا متعاطفة معاج اختي ود الإمارات

و ترى شي حريم فعلا ما عندهم مسؤولية بالشكل الكافي

و في حالة قريبتي و الله ما ادري عنها هي كانت عاقلة ووواعية

صحيح انها من يزمها و هي عندها دلع و قلة مسؤولية

الله يهديها هي كانت ام طيبة لأولادها

و انا خبرت اولادها انهم يصبرون الحين عسى الله يهديها لهم و يكنبلهم الخير