لا تفوتكم فكرة غالية الأثمان لريلها يوم كملت شهر من ملجتها ^_^ لا يفووتكم ( فرررش)

بسم الله الرحمن الرحيم
السلام عليكم ورحمة الله وبركاته



اشحالكم خواتي شخباركم عساكم بخير
طبعا الموضوع واااضح من عنوانه

^_^

صح

انا البارحه الخميس سويـــــت مفاجأه لريلي بمناسبة انا كملنا شهر من الملجه والحمدلله واحلى شيء انه ماكان يعرف بهالمفاجئه ^_^ وناااسة كان ياي عادي عسب يجوفني لأنه مثل ما تعرفون السبت دوام وهو يداوم الصبح شغل وبالكلية المساء (( طبعا البااارحه مغمرات قبل لا يي )) كنت ابغي اسويله مفاجئه وبطقم بكل شيء ... طبعا هو كان يايني على العشاء وها اللي حلا المفاجئه اكثر و اكثر وقدرت اخذ راحتي من الصبح ... لين الساعه 6 لين ما وصل ....
طبعا قبلها بكم يوم تميت اتزهب اخطط شو البس وشو اسوي اكيد ^_^ بتتخبروني شو لبستي شو سويتي شو قدمتي .. صح ..؟!



خلوني اقولكم
طبعا زهبت هديه ... قبلها بمكن يوم .. شيء كان بخاطره .... مره طلعت وياه عقب الملجه باسبوع وسرنا المول ... وعند محل الرصاصي عيبه عطر دهن عود مخلط يديد توه نازل ... وعيبه واااايد .. قال ان يلست الريحه فيني باخذه ... وعقب سرنا وتغدينا ومر الوقت وردينا البيت .. وطبعا ما شراه ... وفكرت اني اخذه له من دون لا يعرف ... ^_^ بتتخبروني شقايل دريتي انه يباه لأني لاحظت كل ما ذكرته يقولي والله عيبني وااااايد ... المره اليايه بيي اخذه ... فرحت وشلريته له وطبعا خذيت كمن فكره من بالي تدرون شو سويت .... بحطلكم الصوره وانتو جوفوه عاد اسمحولي ان ما كانت واضحه ^_^ سويت هالفكره .....





يبت مندوس بني وسط ... وزينته روحي استخدمت قلوب صغيره ... و تل ذهبي وشوية احمر ... قلب من القماش ... ورود مجففه ... شريطة ذهبي ... وشريطه عنابيه .. ورود صغيره عنابيه ... طبعا اعتمدت ع اللون الذهبي والأحمر ودرجاته ...



خطوات العمل ....^_^..... :
يبت المندوس وزينته بالتل الذهبي مثل ما تجوفون ... وحطيت قلوب صغيره وزعتها وقلب من قماش احمر جاهز حطيته فوق وغلفته بقطعه ذهبيه



وعداله قلب صغير وحولينه مثل القش لونه احمر على شكل حلزوني ...

عقب غلفت العطر اللي شريته(دهن عود المخلط) ... وحطيت عليه اشرطه ( الذعنابي والذهبي) وحطيت وردتين صغار .. عقب هيه يبت برواز
في طرفه قلوب (ظاهر عندكم في الصوره )وبعدين كتبت فيه.... {.....ســـــــــــ^_^ـــــــــــر .....}



ولو تجوفون تحت البرواز فيه ورد مجفف و اوراق حمراعلى شكل قلب ^_^ ... يبت ورق احمر وقصيته على شكل قلوب صغار وحبيت اني أخلي في المندوس حركة.... اسويله اياهن لعبه يعني كتبت عدة جمل وحطيت كل كلمه في ورقه بحيث انه هو يركب الجمل ويفتح القلوب ويحطهن عدال بعض تتكون جمله كامله من القلوب ... قلت له اتبع الاحرف اللي في المندوس يعني لما طويت القلوب حطيت على المجموعه الأولى( اللي هي الجملة الأولى) حرفي ... والمجموعة الثانيه حرفه والمجموعه الثالثه حرفي ويا حرفه .. وكانو 3 جمل الجمل اللي اخترتها هي :



1. . فرحتي 2. بك 3. يا حياتي 4. فوق الخيال

الجملة الثانيه..
1.المحبة في 2. قواميسي ما هي 3. مجرد حروف... 4.المحبة مفتاح 5.لقلب في هوى6. قلب موصوف

الجمله الثالثه ..
1. اللهم 2. كما جمعتنا 3. في هذه الدنيا 4. الفانيه 5. اجمعنا معا 6.في جنة قطوفها 7. دانيه



^_^ وناسة



ونفس الشيء غلفت مثل الشمعدان لونه احمر مع القاعده مالته ... وسويت مثل الخيشه على شكل محفظه وحطيت فيها 6 اوراق كتبتله فيهن كمن شيء بخاطريه اهداءات على .. ... كملمات على خواطر ....الخ ^_^ .. عقب ما خلصت حسيت بفراغ بنص الصندوق ... فكرت شو احطي عقب لقيت جمله ... يبت ورقه لونها بيج مقوى فيها خطوط مجعده وحرقتها من الأطراف فصارت مثل رسايل زمان ^_^ وعقب خيطت التل الاحمر خليته مزموووم وصمغتخ بالصمغ في النص وكتبت عليه ( مندوس قلبي دق بابك ... تفضل الهدية ياروح راعيها ..) ^_^



شكله طلع وااايد روعه عيبني ^_^ في الأخير فكرت شو احطي على المندوس من برع فكرت وقلت عسب يتذكرني 24 ساعه ... حطيت باقتي اللي مسكتها يوم ملجتي ... لونها احمر واسود ( لن فستاني كان احمر واسود ... وهي باقه صغيره انا سويتها من الشيفون والتل وحطيت فيها قلب صغير لونه احمر ... وشريطة عنابيه لأن الون العنابي كان دخل بشكل بسيط في فستاني .... في الأخير شكله طلع ..... فنتكه .....



والشكل النهائي هو مثل ما حطيته لكم .... اول صوره .....



اليوم االمنتظر ^_^ الخميس :

من الصبح جهزت الاشياء اللي بسويها له على العشاءء .... وسويت ورق عنب .... ومحاشي ..... مسخن .... سلطة ذره .... كفته ..... سمبوسه .... وحلى الكريم كاراميل ..... عصير برتقال ...



العـــــــــــــــــصر:

طلعت تجهزت .. وكنت مسويه شعري من قبله بيوم بالرول لافته ... كله ... عشان كنت اباه يكون كيرلي كله .... ولبست تنوره حمرا وعليها ورود ودرجات الاحمرفيها وعليها قميص كت لونه اسود ...



وتمكيجت طبعا ميكب شوي صارخ (عشان تكون ليله مميزه) وطبعا درجات الأحمر كله ..وقلت له يوم توصل لبيتنا قبل 10 دقايق خبرني ... وطبعا قبلها ب 5 دقايق دق وخبرني :( ومالحقت ابطل الرول اللي بشعري بطلته بسرعه وحطيت مثل المساكه لنص الشعر ونصه خليته ...ولبست اكسسوارات حمرى يعني طقمت بكل شيء وصل ع المغرب بشوي ... دخل اخوي وياه للميلس عقب ناداني وطبعا دخلت طقيت الباب وطليت بوجهي اول من ورى الباب طبعا هو انصدم دخلت وسلمت ^_^ وهو مصدوم

طبعا سولفنا وتمو خواني واميه وياي تقريبا لين اذان امغرب راح صل وصليت انا ورجع سولفنا شوي عقب عطاني هديتي طبعا هو جيه يايبنها من دون مناسبه وما كان يدري بشيء وعقب يات الصدمه الثانيه خليته يغمض عيونه ويبت الهديه وعطيته اياها طبعا انصدم بشكل وما توقع هالشيء ^_^

وتوته توه خلصت الحتوته
وكانت احلى ييه بالنسبه له


هاه شرايكم ...؟؟؟؟؟؟؟؟؟

اتريا ردودكم الحلوه

^_^


واتريوني ان شاءالله بافكاري لحفلة ملجتي
قريبا
^_^