السلام عليكم ورحمة الله وبركاته
مرحبا بالجميع
في البداية يا بنات مابي اطول عليكم بحكايتي مع الهالات السوداء
لكن حبيت الخصها لكم في كم نقطه
الهالات السوداء مشكلتي من سنوات طويله
وجربت العلاج من الماركات العالميه
والماركات الطبيه
ومن اكثر من دوله
وكلها ما كان لها اي تأثير
لكن في نهاية سن المراهقه الدكتور شافني وقال لي
كل اللي تسوينه ما راح يفيد لأن الهالات عندي وراثيه
وفعلاً كلامه صحيح لأن الوالد و اخواني الشباب عندهم نفس المشكله
وانا اعاني منها من صغر سني
فأستمريت فقط على كمادات الشاي والخيار ،، وطبعاً اخذ فترات راحه من مشاهده التي في والنت
هالأشياء كانت توقف زيادة المشكله لكن ما تحلها اوتقللها
توقفت عند هالمرحله وكنت مستمره في العناية ببشرتي
والهالات السوداء صارت جزء مني وبالعكس ماتعطيني منظر بشع لأن ولله الحمد عيوني غائره
لكن في هالفتره و مع زيادة العناية ببشرتي
قلت حرام اخلي منطقة العيون بدون اهتمام وخصوصاً انها منطقة حساسه
اول شي لو تلاحطون من خلال ردودي اني مانصح بأي خلطة طبيعيه احنا نسويها بنفسنا
والله الشاهد اني ما جربتها ،، لكني متخوفه لأن بالنهايه منطقة الجفون رقيقه وحساسه واكثر ما يتأثر في بشرتنا
و مو مستعده اسوي تجارب لا على نفسي ولا عليكم
بداية العلاج وهذه هي الخطوة المهمه اني قررت ارجع واعتني واحاول اعلاج الهالات
واذا ما لقيت نتيجه خلاص ما بحاول مره ثانيه
جربت اول علاج وشفت النتائج حلوه
وهذا اللي خلاني اسوي برنامج متكامل للعنايه بهذه المنطقه
وفعلاً الخطوات بسيطه و نتائجها ملاحظه
خلاص ملينا من السوالف وخلونا ندخل بالمفيد
*·~-.¸¸,.-~*البرنامج اليومي *·~-.¸¸,.-~*
في النهار لك الحريه في استخدام مرطبك ولا تنسين مرطب العيون الخاص فيهم
كذلك لا تنسين واقي الشمس الخاص بالعيون ،، لأن هالمنطقه لها واقيات شمس مخصصه لها
غير اللي نستخدمها للوجه و الجسم
الحين يا بنوتات اكيد كلنا نفس الحاله نقعد على النت ساعات طويله
لازم كل ربع ساعه تريحين عيونك و تغمضينها لمدة خمس دقايق
وانا كنت اطلع هذا الماسك المثلج من الفريزر والبسه وانا اشتغل على النت

نفسه بس اللي يكون فيه فتحتين للنظر :cool2:
مريح جداً و يحل مشاكل الأنتفاخ ،، بالرغم اني ما اعاني منها
الى الآن الخطوات بسيطه و سهله
جاء الليل و بتستعدين للنوم ،، شوفي معاي هالخطوات لأنها الأكثر اهميه في البرنامج
وانا مخليه هالمنتجات جنب السرير عشان ما انسى او اكسل
لأن النتائج ما راح تبين الا مع الاستمرار وبعد مدة شهر
غسلتي وجهك واسنانك وحطيتي كريم الليل
لالالالالا لحظه لا تحطينه حول الهالات ،، لأنه مو مخصص لهذه المنطقه
عندي لك شي يرطب ويغذي ،، ويبيض روووووووووووعه
وهذا المنتج الاول اللي خلاني ابتدي رحلة العلاج من جديد
وهو اهم منتج في البرنامج

whitening eye serum
من جيرلان
تحطين نقطه على صبعك و توزعينها بنفس طريقة الأسهم حول العين الموضحه في الصوره

ولازم يكون التوزيع على كامل الجفن من فوق ومن تحت
لا تكثرين ترى نقطه وحده تكفي ،، ونقطه ثانيه للعين الثانيه
الحين خلاص سكرتي الأضاءه و قريتي المعوذات وبتحطين راسك تنامين نوم العوافي
جيبي شرائح الخيار وحطيهم على عيونك
لالالالالا ما بتروحين المطبخ تجيبينهم ولا بيطيحون وانتي نايمه
شوفي انا شنو استخدم

وصدقيني مفعولهم احلى من شرائح الخيار ،، لأنهم مخرسين بعصير خيار
اول شي انا جربت اللي من ماركس آند سبنسر وسعرهم حوالي الـ 75ريال

بعدها شريت من دايسو بـ 6 ريالات
شفتوا الفرق في السعر ونفس النتيجه
تحطينها بهذا الشكل وتنامين

في منها اكثر من نوع


انتوا شوفوا الانواع المتوفره عندكم وكلها بأذن الله نفس النتيجه
ابحثوا عنها تحت اسم :: cucumber eye pads
هذا هو جدولي البسيط
ومابي اي وحده تستخدمه يومين وبعدها تكسل في اتباعه
و تقول ما بانت النتيجه ،، او مشكله الهالات ما تروح
يبيلها استمرار على الاقل شهر
واعتقد سهله ان الواحد يتبعها
عني انا تقريباً صار لي شهرين على هذا الجدول والنتائج تستحق التجربه
بحاجة لدعواتكم .. لا تحرموني منها
اختكم / ام خالد



