قصة ولادتي ...

السلام عليكم ورحمة الله وبركاته

أما بعد ( شكلها بتكتب خطاب :) )

المهم حبيت اشاركم بقصة ولادتي ببنتي البكر ..

يوم الاربعاء وبالتحديد الصبح يمكن الساعه 6 حسيت بماء يندفع مره وحده ويوقف كاني عزكم الله سويتها ...

خفت ورحت الحمام ...

ومره ثانيه على الساعه 10 الصبح وما فيه الم ولا شي ...

المهم قلت امشي تميت امشي في الحوش ...

نمت الظهر ولما قمت العصر قلت لازم اكلم الدكتوره اشوف شوه اللي حاصل ...

اتصلت فيها وقالت لي تعالي اكشف عليج عشان اشوف اذا الماي ناقص والا لاء ...

المهم دخلت الحمام عزكم الله للتبديل وشفت دم هنيه قلت بسير المستشفى لانه اول بيبي لي وخايفه افقده مثل ما فقدت اخوانه ...

المهم سرت المستشفى وكشفوا علي لقوني 2 ونص وقالت لي الدكتوره امشي في المستشفى ما تطلعين لانج كذا مره نزلتي ...

الله وكيلكم قعدت امشي من الساعه 10 لين الساعه 1 وانا كل ما احس بألم اوقف شوي اخذ نفس ومرات اكمل واستحمل ...

المهم .. ( كم مره كتبت المهم ؟؟ )

دخلت مره ثانيه وقالوا لي خلاص انتي 10 ولازم تدخلين غرفة الولادة ...

قعدت احاول ادفع ماشي فايده وانا مب عارفه شوه مستوي ...

رقدوني على جنبي اليمين مثل القرفصاء وقت الطلق ومره على الجنب اليسار ومره على ظهري ..

واقول شوه السالفه هاي تمارين والا شوه ...

و5 مرات تحط ايدها داخل والايد الثانيه تحاول تحرك الياهل من مكانه وقت الدفع وانا اقول يمكن تبا تسرع الولاده ...

اخر شي يت الدكتوره المناوبه قالت لي شوفي راس الياهل مايل ومب قادر يطلع حاولنا بكل الطرق وبنحاول بالشفط مره وحده بس وبعدها بندخلج قيصري ..

المهم :)

حاولت بس ما قدرت تقولون حد ماسك راس البيبي ...

وكل هذا من الساعه 1 لين الساعه 7 ونص الصبح ...

بعدها دخلت العمليات وتخيلوا ضربوني ابره الظهر وانا فيني الطلق وماسكيني عشان بس ما اتحرك واخرب عليهم كل شي بس استحملت ..

وبعد فتره شفت حبيبة قلبي ...

ودخلت بعدها العنايه الضغط نازل ودقات القلب ضعيفه وحالتي حالة واحس ببروده وانتفض من راسي لريولي :(

وودوني الغرفه بعدها 5 ساعات ..

ويتني حمى والتهاب في الدم وانتفخت ايدي من كثر المسكنات والمضادات الحيويه ...

حتى الناس تزورني وتتكلم معاي هم في وادي وانا في وادي ...

والحمدلله على كل حال ...

المهم شفت حبيبة قلبي وفرحنا فيها انا وزوجي .. شكلها بتدلع دلوعه اكثر عن امها :) هههههههه