المتزوجاات اللى يشتغلوون هل ازواجكم يعطوكم مصروف شخصي او لا؟؟؟ لانكم تشتغلون

انا موظفه ومعاشي نصه اصرفه على اهلي ونصه الباقي على مصروف البيت والايجار هذى كلها على زوجى ما ادفع ولا شيء اول زواجى كان يعطينى مصروف بعد سنه من الزواج بطل من هذه العاده وصار يعطيني لما اطلب بس وهذى نادرة بس اقولج بيجيب لي كروت التلفون وبيجيب لي كرت النت من فلوسه احيانا لما اتسوق ما اخذ بيزات علشان اهو يدفع بس مو وايد بس فيه شغله لما اروووح مستشفى خاص ما يدفع يقول انا وديج حكومى اذا بغيتى خاص انت تدفعين وبس بس العشرة والحياه فوق الفلوس لما يحتاج اعطيه ولما احتاج يعطينى لما رد حبيبي من الحج كان صارف كل فلوسه فرد مفلس الحمدلله قدرنى الله وسددت له فاتورة تلفونه النقال وعطيته مبلغ يخليه راهىعطيته معاشي كله وهو بعد روحى ما قصر لما تحسنت امورة الماديه اشترى لي غرفه جديده وتلفون جديد والمحبه صدقينى فوق الهدايا

بالنسبه لي راتبي مثل راتب زوجي بالضبط....

فأنا من البدايه تنازلت عن هذا المصروف... أحسها فشيله يعني هو اللي بيصرف على البيت وهو إللي بيأكلني ويشربني وعليه فاتورة التلفون والكهرباء والماي ويسفرني...

وعليه يصرف على نفسه وبنزين السياره حقته غير تصليحها إذا اختربت... فعشان كذا أنا رفضت بما إني أقدر إني أعيش حالي حال الناس وأدخر حق نفسي وهذا أهم شيء عندي لأني ما أضمن إيش إللي يصير لي في المستقبل...

وأقول الحمد لله رب العالمين على النعمه....

يعني الزبده أنا أحس إني ما أحتاج لهذا المصروف ولا أبغى أثقل على زوجي في شيء ماله داعي أبدا....

ردودكم حلوووة والله يهنيييكم

بس خواااتي في مثل يقول الطفل ربيه والريل عوديه
يعني ممكن انه يتعود على هالشئ يعني بالمستقبل ان طلبتيه تبيخل شوووي مع العلم انه يكوون مقتدر وعنده انا خايفة من هالنقطة يعني اذا تزوجت وانا اشتغل لازم يحترمني ويصرف علي ومايحط عينه على فلوسي جذيه بيكبر بعيني وانا من نفسي بقرر اذا اخذهم او لا

بس انا قصدي مو سالفة طمع سالفة اذا اهو مقتدر يصرف علي بعد وانا اكيد بشاركه بمصاريف البيت من نفسي من غير مايقوولي يعني بحترمه وبقدرره مادري هذا على حسب تربيته واخلاقه الشخص



اتمنى من الباقي يشااركوون

موضوعك كثير حلو اختي ماريتا

انا توني متخرجه وليحين ماشتغلت وانا نفسي كنت افكر بهذي السالفه يعني الحين هو يعطني مصروف يساوي راتب بعض البنات والحمدلله بس افكر انا لين بشتغل هل راح يقطع عني المصروف باعتبار ان عندي فلوس؟؟ اذا جذي بس مايحتاي اشتغل عيل اقعد بالبيت انام النهار مرتاحه وبالنهايه نفس النتيجه لكن لو اضمن انه بيعطيني مصرووفي بالاضافه الى راتبي وااااااو بصير غنيه والغني الله ههههههههه

عموما انا استحيييييييييييييي اسأله هالسؤال صج فشيله ..

يسلمووووووووووووووا ماريتا على هذا الموضوع

موضوع جدا رائئئئئئئئئئع


بالنسبة لي ؟؟؟؟؟؟؟؟؟؟؟؟؟؟


انا وكم وحدة في القبيلة متوظفين والباقين جالسين في بيوتهم لا وظيفة ولا شيء


من بداية الحياة اتفقت معاه اني مثل مثل اي وحدة مو متوظفة


واتفقت معاه طبعا بعد الحاح ونصح الكثير من زميلاتي انه يعطيني 200 ريال كل شهر مصروف للبيت هذا من باب التمويه

والكسوة مرة في العطلة ومرة في رمضاااااااااان عشان العيد

وانا بطريقتي الخاصة ادبرة وازيد احيانا من راتبي بس هو ما يدري

بس هو ما وافق الابعد ما شاف ان اغلب اقاربنا يصرفون كثير وانا شافني جنبهم اهون منهم عشان كذا وافق


بس المشكلة انه استكثر ال 200 على البيت فتقلص الي 100 ههههههههههههه بس مو مشكلة ((((شيء احسن من لاشيء ))))))))

وانا هدفي انه يحس بالمسؤلية .........

يكون بينهم اشتراك في المصروفات

وبعض الزوجات يرفضن الاخذ من الزوج مراعاة لظروفه الماليه

او لتوفير نقوده للمستقبل

السلام عليكم

في رأيي حلو يكون بينهم تفاهم بالنسبة للموضوع
يعني اذا الزوج مقتدر ويقدر يصرف على البيت لحاله على الزوجة تستحي وتتنازل عن المصروف
اما اذا كانت تشارك معاه في مصروف البيت ومعاشاها ما يكفي حاجاتها فعلى زوجها يعطيها اذا طلبت منه لان هذا كرم منها تساهم في مصروف البيت مع ان الزوج هو المسؤول عن البيت ومستلزماته
لكن من الذوق ان الزوج سواء كانت تشتغل الزوجة او لا عليه ان يعرض عليها المصروف والامر يرجع الى الزوجة تقبل تاخذه او لا

في كل الحالات على الزوجين التفاهم وتقدير ظروفهم فيما بينهما

أنا موظفة ولو حبيت أشارك بشي في البيت عادي مايقول شي لكن عمره ماجبرني أصرف على أمور هو عارف إنها
مسؤوليته ولا عمره قال وين تودين راتبك أو ليش ماتشاركيني بشؤون البيت بالعكس ساعات لما احاول اعطيه يجيب شي
مايرضى ويقول عندي بس أنا ما أطلبه أبداوساعات والله يعطيني مبلغ خاصة لو في مناسبة أو مسافره لأهلي يقول يمكن تحتاجين شي إنت وبناتك
وأنا أشوف إن لو الرجل راتبه أقل من راتب الزوجة مافيها شي لو تعاونوا مع بعض في المصاريف حتى ماتأثر ها الأمور على
نفسيته وينعكس على البيت والمفروض إن كل إنسان يعيش حسب إمكانياته ويكون في مراعاة بين الزوجين وخاصة الرجل المفروض يعرف الأشياء إلى عليه ومايكلف بها الزوجة وهذا ماوضحه الشرع لنا

مشكورة حبيبتي على الموضوع وإتاحة الفرصة للنقاش

أنا أعتقد انها مسؤلية البيت و النفاق علية هي مسؤولية الزوج اولا و أخيرا

إلا إذا كانت قد تزوجها و هي تعمل و قد اخبرها مسبقا برغبته في ان تساعده او حتى لا تاخذ من مصروف

و من وجهة النظري ان الزوجة يجب ان تأخذ مصروف البيت كالإيجار و مصروف الأكل و الشرب من الزوج و كذلك مدارس الاولاد

و لكنها إذا كانت يمكن ان تساعده في بعض الكماليات يعني السفر او الملابس الباهظة الثمن و غيره

الزوج لازم يحس بالمسؤولية بنات لا تعودنهم عالكسل

إلا طبعا إذا و ضعة المادي صعب جدا فهذا وضع آخر

من رأيي : الأفضل يكون لها مصروف خاص فيها حتى تحس إنها مع رجل متحمل للمسؤولية .. حتى لو كانت موظفة ما يمنع يعطيها ولو شيء يسير تحس فيه إنه زوجها ومسؤول عنها ..

طيب سؤال : اللي تكون في فترة الملكة هل يصرف عليها خطيبها (طبعاً عاقدين) والا مو مسؤول من هالناحية غير بعد الزواج ؟؟

انا عن نفسي راتبي ما أصرف منه ولا شئ كل شئ على زوجي لكنه إذا هو أحتاج ما أبخل علية وعلى العموم بطاقة البنك عنده وانه إذا صار خاطري في شئ غالي أشترية من راتبي

أحس لازم الوحده بتحتاج لزوجها وهو بعد بيحتاج لها

أنا بداوم يوم الاحد ان شاء الله اللي هو بعد يومييين ...
وهذا اول يوم دوام لي ، وتعرفون الوحده تحتاج ملابس وحركات كشخه للدوام فطلبت منه وقلت لها خلاص هذي اخر مره اطلب منك ، المره الجايه انا بعطيك هههههههههههههههههه من باب المزح فقط

فقال لي ، ماتقدرين لازم بتطلبين مني ، وأنا مراح اخليك لاني مسؤول عنك وبساعدك ...

عموماً أنا اشوف مصاريف البيت من جمعيه وفاتورة الجوال هو يدفعها ...
وملابسي وهدايا لصديقاتي هو موملزوم يدفع دام انا فلوسي عندي ...

السلام عليكم ورحمه الله وبركاته ..

والله الموضوع حلو .. طبعا كل وحده ولها رايها من هالناحيه انا طبعا قبل لا انخطب كنت ارفض اي شخص يتقدم لي على اساس اني اشتغل ونص الي كانو يتقدمون حاطين عينهم على اني بنت واشتغل وبساعدهم بس الحمدالله الحمدالله ربي كريم استجاب دعائي اني انخطبت حق شخص اشتغل ولا ما شتغل شي مو مهم ,, ولا مره قالي حطي من راتبج ولا شي يعطيني مصروفي وانا اذا ااحتاج اخذ واذا ما احتاج ماخذ ... حتى التليفون سجله بأسمه عشان ما دفع الفاتوره الحمدالله شنو ابي اكثر من جذي !! والشي الحلو انج تقدرين تزيدين من عندج في وقت الي هو يمكن تصيده ظروف وما يقدر ...
وانج تقدرين تتعاونين معاه ..بس اكيد هذا بيكفج مو غصب عنج ......وهو من النوع الي يحب يشيل مسؤوليه كل شي .. وهذا الي يشجعني اني اشاركه في كل شي .... عشان نحس بالمسؤوليه :)

هلا عزيزاتي...
أنا أشوف الريال حسب شخصيته يعني في منهم ما يرضى الحرمه تصرف على البيت وانه هو المسؤول عنها وعن البيت...وانا ريلي ولله الحمد من النوع هذا فهو يصرف علينا من كل النواحي..
بس قلت علشان ما يقول إني بخيله "في خاطره طبعا":mad:
شو سويت؟؟ كنت أساهم في شراء بعض أثاث البيت مثل طقم كنب ومره بعض الإكسسوارات وطبعا هو يعرف إنه من معاشي...وفي المناسبات الخاصة أو لما أروح السوق أشتري له الهدايا...بس الحين قلت له على خطه وهي اني احط نص الراتب في حساب توفير يعني تحسبا لغدر الزمن...فقال لي ""عين العقل"". جان استانس عاد :bigsmile:

انه اصرف من راتبي اشتري منه ملابسي وملابس الاولاد وبعض اغراض البيت واحتياجاتي لين يخلص الراتب وهذا طبعا قبل نص الشهر وبعدين اطلب منه وهو اذا عنده مايقصر وانه بطبيعتي صرافه مااقدر اخلي ولا ريال في رصيدي احب اصرف راتبي كله ......صج مشتطه :D2:D2

موضووووع راااااائع اختي ماريتا الصراحة انا بعد وااايد احاتي هالشي انا بعرس قريب وبعدني ما توظفت بس اخاااف يوم اشتغل ما يصرف علي وااايد اشوووف حريم يشتغلن وريايلهم ما يصرفون عليهم في شي ولا بعد تلاقين مصروف البيت والعيال بعد عليهم وانا خايفة من هالشي وياريت لو تنصحوني كيف اقول حق ريلي انك ملزووووم تصرف عليه حتى لو اشتغلت ؟
مع انه سألني مرة انه عادي عنده لو اشتغل عشان راتبه(( يالله يالله يكفيه ))على قولته وهو ماشالله راتبه واايد كبير بس من النوع اللي يحب يسافر واايد ويصرف على عمره وااايد مادري ليش قالي جيه يمكن يبا يشوف ردة فعلي :eek2: بس انا ما قصرت فيه قلتله انه حتى لو بشتغل ملزوووم انه يصرف عليه ومعاشي كله حقي ،، وانه في معاشي بيكون حق هدايا حقه او بشتريله سياره فيهم اعدل الموقف هههههههههههههههههههههههه



اصحاب الخبرات ياريت يفيدونا صح عرايسنا ما قصروا بس بعد نبا نسمع خبرات ونصايح اكثر

يوم معاه هو يدفع و يشتري لكنني اذا خلص معاشي استحي أطلب منه

الحمدلله انا زوجي ماله خص في راتبي ابدا...بالعكس..يقوللي لا تصرفين منه ولا شي اني حق شو تبينه...حطيه في حساب توفير كله لانه هو اللي يصرف عالبيت كل شي و يعطيني مصروف البيت و مصروف لي و يشتريلي كل اللي اباه..واحيانا استحي اطلع معاه اذا بغيت اشتري شي عشان ما يدفع عني ..وحتى لو عرف اني اشتريت شي غالي من راتبي يدفعلي اللي صرفته ....فديته حبيبي...

بس انا طبعا الاشياء اللي اعتبرها كماليات من مكياج و عبي و شيل احاول اشتريها من غير وجوده عشان ما يدفع عني...يقوللي اي شي تبينه انا اللي بشتريلج اياه ولا تستخدمين راتبج..وفرييه للزمن

انا عن نفسي مش موظفه حاليا لاني مع ريلي لظروف دراسته خارج البلاد
بس لي نجح وخلص اااااااااامين وردينا البلاد انا بشتغل لانه الصراحه كل شي صار غالي في الامارات والحين بعد البترول صار يقص الظهر
يعني بالمفتوح بساعده..لانه راتبه بروحه ما بيكفينا خصوصا مع زياده عدد العيال وطلبتاهم الكثيره
وبالنسبه للسؤال اذا باخذ منه مصروف ولا لا..الصراحه استحي اكون موظفه وهو اللي يصرف على البيت وعلى كل شي وفوق هذا كله اقوله عطني مصرووووف!!!!!! حرام والله شو هالفرعنه اللي عليكم!!!!!!!
صح الريال على ما تعوديه وانا اميه بلميه اتفق معاكم..بس انا متفاهمه معاه على شي انه جزء من راتبي بوفره ان شاء الله يعني ما يجيسه ابدا وجزء من راتبي بخليه لعطوري ومكياجي وملابسي وكشختي حقه وحق المناسبات والجزء الثالث بساهم في فالبيت او اي شي هو يباه
بس عاد حرام اقوله وانت عطني مصروف بعد..هالايام بدت الحياه تصعب وكل شي يغلى ونحن الحمدلله والشكر لازم نشتري ماركات وانا عن نفسي احب اكشخ وااايد واتشرى وايد وهو مش مقصر معاي ابدا الحمدلله بس باجر لي يبت عيال اكثر ما بيقدر ابدا على مصاريفي فاحسن شي اني اريحه على الاقل من مصاريفي واصرف على كشختي بنفسي
اعتقد هالاتفاق حلو واااايد
بس الانانيه مش حلوه