أنا جيت ومعي تجربتي مع الولادة

بسم الله

السلام عليكم ورحمة الله وبركاته

اللهم صل على النبي محمد وآل محمد..

هلا بنات..

وحشتوني ووحشني المنتدى مووووووووووووووت..

زين راح اكتب لكم اليوم عن تجربتي مع الولادة..

بصراحة الولادة تجربة حلوة وفضيعة ..

على كثر ما تتعبين وتتألمين تستمتعين بالنهاية..

الاحساس بالامومة رائع جداً..

أحمد ربي اني أنثى وله ألف شكر على النعمة اني حملت ولله الحمد ..

زين بداية القصة كانت يوم السبت تاريخ 23 يوليو 2005..

كان أول يوم إجازة عندي..

رحت موعدي بالمستشفى وبعدها مريت شريت حلاوة وباقي الاغراض وقعدت أغلف الحلاوة وأجهز الستاند اللي بحط فيه الحلاوة ..

وكملت منة ليلة الأثنين..

أهلي كانوا مسافرين الكويت .. ورجعوا يوم الأثنين.. زين كانوا جايبين لنا هدايا من الكويت وقعدت مع خواتي و شفت الهدايا..

وبعدها صليت الظهر وقعدت قرأت آيات تسهل الولادة..

مباشرة حسيت بأشياء تنزل مني .. ولمن رحت الحمام شفت مثل الأوساخ نازلة مني توقعت انها الصمامة انفتحت..


سألت امي عنها وشافتها قالت لي اي هذي أول علامة .. أنا تخبصت وماقدرت استوعب الأمر يعني خلاص راح أولد..

على طول خدت أغراضي ورحت شقتي ..

وتأكدت من شنطة المستشفى وإن مو ناقصها شي..

ونقعت لي زعفران مع ماء ورد وشربته..

جهزت لي 7 تمرات من تمر المدينة المنورة ..

وحجزت لي موعد بالصالون حق شيرة وحفاف..

كل هذا وزوجي ما يدري..

بعدها لمن تأكدت من كل شي دخلت أخذت شور ووصل زوجي..

وظل يسولف ويتكلم عن معانته من الشغل والتعب جان قلت له .. أكو علامة إن الولادة قربت ..

سكت شوي وقال لي شنو ؟؟؟؟؟ خوفتيني..

قلت لا يالله عشان توديني الصالون ..

ورحت الصالون وبدا فيه الألم خفيف يعني أوجاع مرة في بطني ومرة في ظهري مع اسهال.. وخلصت من الصالون على طول رحت مع زوجي للشيخ اللي موصينة يسوي لنا حرز ويقرا على ماي زمزم ..

والحمد لله ان الحرز جاهز.. وبعدها تمشت مع امي .. ولمن رجعت البيت رديت مع زوجي ورحت تمشيت مرة ثانية.. وشريت حليب..

رحت الشقة و شربت الحليب مع الزعفران وماي الورد.. ونمت الساعة وحدة..

بالضبط نمت ساعة وقعدني الألم الساعة 2 .. ظليت أتألم وأنا ساكتة مسكين زوجي تعبان ما حبيت أصحيه من النوم واهو وراء ه دوام.. وبدا يزيد الألم ويزيد.. لا الساعة 30و3 قعدت زوجي وقلت له ودني بيت اهلي..

ورحت البيت الا امي ترتجف وتبكي .. صليت الصبح والألم مازل مستمر .. لكن امي ظلت تحن على وتقول لازم تروحين المستشفى.. ما يصير .. انا ما اعرف لك انتي بكر واخاف يصير فيك شي..

وانا قاعدة اقرا قرآن وادعية وأشرب في الزعفران والحليب.. وشديت على ذراعي الحرز اللي كتبه لي الشيخ..

الساعة 7 رحت المستشفى ( مستشفى البحرين التخصصي) عند دكتورة ( فرح زينل) وقالت لي الدكتورة 2 سانتي ونص وعلى راحتك إذا تبين تظلين بالمستشفى او تروحين البيت ..

انا على طول قلت لها البيت .. بروح البيت أبي انام .. عاد كلش متفاءلة اني بنام ..

ورجعت البيت و الألم باستمرار..

وجت أم زوجي من جديد وسوت لي شاي دارسين ومنقوع الزعفران مع ماء الورد وسكر نبات..

وأمي بخرتني بقهوة مطحونة زاد الألم زاد.. وصارت الساعة 12 الظهر انا خلاص وصلت حدي من الألم واتصلت لزوجي قلت له خلاص احس روحي بتطلع اتصل للدكتورة قول لها تجهز الأبرة ( إبرة الظهر) وبالفعل اتصل لها قالت له خلها تجي راح اتفاهم وياكم..


وصلت المستشفى وعلى طول الطوارئ وكشفت الدكتورة علي قالت 7 سانتي .. قلت لها وين الأبرة راح اموت قالت لا يالله عن الدلع ما في ابرة ظهر و لاشي .. وفتحت كيس الماي وحسيت بسخونة..
خلو علي النرسات الأكسجين وما ادري شنو بعد شي ينشم بعد ..

ولمن قرب الراس يطلع .. حسيت كل اجهزة جسمي وقفت .. الدكتورة تقول نفس نفس وأنا مو قادرة .. كنت احس بعطش شديد وأقول ماي ماي .. بس اي ماي اي خربطة الراس بيطلع والكل على اهب الاستعداد للاستقبال...

وبالفعل الله سهل وطلع الراس وكلهم يقولون عصري عصري وانا ما عاد فيه قوة وبرحمة الله وقدرته ولدت ولله الحمد..

احساس رائع كنت احس نفسي اني نايمة واحلم ( أنا ولدت ) ووولدي يبكي وخلوه على بطني شفته وانا مو مصدقة بالمرة أبداً..

على طول فحصه طبيب الأطفال وطمن الأهل على صحتة.. امي دخلت لي وهي تبكي سألتها اقول لها امي شفتين ولدي ؟؟ قالت لي بس اهي ما رضت .. يقول لها دكتور الأطفال شوفيه تقول له لا أول أشوف بنتي..

زين الدكتورة قالت لأمي ظلي مع بنتك لين ما تشبعين عشان بعدها نخيطها .. اهني انا دريت انها شقت المنطقة والا قبل مع الطلق ما حسيت للشق..


و دخل زوجي لي و عيونه مغرقة دموع والأبتسامة شاقة وجهة.. اطمئنت نفسي وهدأت لمن شفت امي وزوجي وبعدها خلوني عشان يطلعون المشيمة ويخيطون الجرح..

وبعدها شفت المسجل قبالي جان تحسفت اني من الألم نسيت أقول لهم حطوا لي قرآن..

وكملت على خير ولله الحمد خدوني على غرفتي وكان اخوي واختي يصورني فيديو لحد الغرفة .. وبعدها جابوا علوي حبيبي وأخذه ابوي وآذن وأقام ونمت بعدها شوي وجوا لي الاهل ..

هذي تجربتي مع الولادة كاملة بالتفصيل الممل..

ونصيحتي لكل حامل ..

خلي نفسك جاهزة للولادة..

وتوكلي على الله واستعيني به في كل أمورك..

لا تصارخين بصوت عالي وتتعبين نفسك لأنك محتاجة لهذي الطاقة بعدين..

وكلما جاك الالم خذي نفس عميق بأنفك وطلعيه من فمك..

وقولي يا الله يا الله .. والله ما راح ينساك..