رجعت لكم ومعي قصة ولادتي

السلام عليكم ورحمة الله وبركاته


كيف أحوالكم أخواتي


عساكم بخير


ولو إني أعتب عليكم لأن محد سأل عني بعد غياب أكثر من أسبوعين


لكن مو مشكلة أنا رجعت لكم بالسلامة ومعاي ولدي الحلو


أنا ولدت يوم الجمعة بتاريخ 8/7/2005


والتاريخ اللي عطوني إياه كان 27/7/2005

وفي السونار كان بتاريخ 23/7/2005


يعني ما شاء الله ولدي قدم تقريبا 20 يوم


أنا الحمد لله الله سهل علي وما طولت في الولادة

نزل علي الماي الساعة 7 الصبح


صحيت زوجي وقلت له وهو مو مصدق على باله أمزح معاه فكمل نومه

المهم أنا الماي اللي نزل معي كان مو وايد

فما كنت متأكدة إذا ولادة أو لا

فقمت سبحت قريت سورة مريم وأكلت رطب

وصحيت زوجي مرة ثانية قلت له قوم نروح المستشفى

بس بتطمن إذا فيه شي وبعدين خل نطلع ونروح نتمشى


لما رحت المستشفى كنت متصورة إنهم بيقولوا لي هذي مو ولادة


وبطلع


الساعة 9 رحت المستشفى

و لما رحت مسكوني ونادوا زوجي من برة


ولما قلت له ولادةما كان مصدق


على باله أمزح

وأنا ما كنت أحس بألأم


والدكتورة تقول لي إني متوسعة 2 سم ومعاي طلق


وأنا متعجبة ما وياي ألم

بعدين حطوا علي المغذي وعطوني ابر الطلق الصناعي


وبدا الألم الحقيقي

لكن الحمد لله أنا كنت متصبرة وأقرأ الآيات وما صارخت وايد


لكن في لحظة من الحظات حسيت نفسي ما قادرة أستحمل وحتى الممرضة تعجبت


تقول لي أنا أقول إنج متحملةو ما تصارخين الحين تلقين اللي برة المستشفى سمعوا صوتج



وأنا كنت أغفو وأحس نفسي بنام لكن لما ييني الألم أقعد وأطبق تمرينات التنفس


وفي لحظة الجد لما كنت أدفع عشان يطلع البيبي ما صارخت أبدا

وكنت مندمجة مع الدفع أبي أولد بسرعة

والممرضة تقول لي واجد زين واجد زين بعد عصري أكثر


المهم في ذيك اللحظة كانوا أهلي مطفشين الممرضات من الاتصالات

واللي معاي في المستشفى كل دقيقة يسألونهم


قالت لي وحدة من الممرضات

يالله اولدي بسرعة ترى أهلج كل شوي يتصلون

وفي ذاك الوقت ولدت معانا وحدة في الجناح

الا تقول لي الممرضة يالله ترى فيه وحدة ولدت


وأنا أسمع ان وحدة ولدت


وأدفع بكل قوة والحمد لله طلع ولدي أخيرا


وبفرق ثواني بيني وبين اللي ولدت قبلي


واثنينا يبنا أولاد

وأوزانهم نفس الشي بالضبط


كيلوين وستمائة وعشرة


وبعد الخياطة طلعوني لأهلي

كان هناك زوجي وأهله وخواته

وأمي وأبوي وأخواتي

وأمي وعمتي كانوا يصيحون


لدرجة إني وأنا تحت تأثير المخدر دمعت عيوني



اللي أتمناه منكم إن كل وحدة تدعي لي


لأن التوسيع اللي سووه لي وايد والخياطة مأذيتني


غير هذا الشي بسبب الولادة طلعت لي بواسير وقريبة من مكان الخياطة


ودمي وصل 8 بعد الولادة

وللحين أحس نفسي تعبانة



الله يسهل على الجميع يا رب ويقومكم بالسلامة


ويرزق المحرومين الذرية الصالحة