غلبت مع زوجي

غلبت مع زوجي

ازيكم يا بنات عاملين ايه

والله مش باحب اشتكي وبالذات من الحاجات الخاصة واقولها كده على النت لكل الناس تشوفها، لكن أنا خلاص تعبت والله من زوجي

الموضوع باختصار ان زوجي انسان ما شاء الله عليه الحمد لله ربنا كرمني به ، هتسألوني ايه المشكلة

المشكلة انه معندهوش سيارة، وما نقدرش نشتري سيارة دلوقت لأننا لسة طالعين من الزواج وتكاليفه وهمه التقيل

لكن أنا الحمد لله عندي فلوس وتكفيني اشتري سيارة

مشكلة زوجي انه مش بيحبني اساعده في حاجة، وعاوز يبقى هو المسئول عن كل حاجة ، ورغم اني باشتغل مانعني اشتري أى حاجة فيها استثمار بفلوسي، يعني لا أجيب شقة في مصيف ولا أرض، ولا أدخل مشروع، ولا سيارة طبعا

يعني باختصار اصرف فلوسي على اللبان والملابس ما عندهوش مشكلة لكن اجيب حاجة تنفعني لأ

دلوقت انا هاتجنن من المشاوير للشغل ومحتاجة السيارة جدا وكل ما افتح معه الموضوع نتخانق ويزعل ومش دلوقت ، الأول كان بيقوللي خايف عليك من السواقة وانا عارفة انها حجة علشان هو لسة ما جبش عربية لنفسه وعاوز يبقى هو المسئول عن كل حاجة كالعادة، ودلوقت كل ما الموضوع ينفتح واقولله تعبانة من مشوار الشغل ومحتاجة سيارة تكون معى وترحمني يرد يقوللي خلاص بلاش شغل وهو عارف كويس اني ما اقدرش استغنى عن شغلي

تعبت والله يا بنات وفاض بي الكيل وطفح خلاص

دلوقت انا حامل والسيارة هتسهل عليا حاجات كتير بعد الولادة ان شاء الله وهتوفر لي في فلوس التاكسيات والبهدلة اللي الواحد بيشوفها

كل حاجة جربتها معاه ، وقلت له أسلفك طيب واشتري سيارتك، يقول لأ، ويقلب الموضوع بهزار ولو صممت نتناقش بجد نتخانق ويزعل وما يعطنيش فرصة حتى للكلام

والله زوجي انسان كويس لكن مش عارفة ليه بيعمل كده

وطبعا قدامي مش اقل من سنتين تلاتة قبل ما يقدر يشتري سيارة هو كمان

واحدة فيكم عندها حل لمشكلتي يا ترى؟