حقائق وااايد تكون غلط عندنا عن تفاصيل الولادة من تجربتي

[foq1][CENTER] بعد ما ولدت حبيت أني أوضح للبنات اللي على مشارف أول ولادة حقائق وااايد تكون غلط عندنا عن تفاصيل الولادة من تجربتي . فهذي هي تجربتي اللي كانت في مستشفى الوصل في دبي:

اللي حصل في ولادتي ببنتي أننا كنا في رمضان وبدأ عندي الطلق في البيت الصبح خفيف ونزل علي دم قبل صلاة المغرب، والطلق يكون إحساس بتوسع وإنقباضات في المهبل وإنقباضات متقطعة كأنها إنقباضات ما قبل الدورة في الرحم بس تكون مؤقتة -وإذا ما كنت تتبع توقيت معين يعني ما تجي كل دقائق معينة معناها إنتي باقي عليج وايد أو ان هذا اللي يسمونه "المنان" وهي الإنقباضات اللي تبدأ عندج من نهاية الثامن أو بداية التاسع تأهل جسمج لمرحلة الولادة-.

وسكت عن الألم ما خبرت أحد لغاية بعد الفطور خبرت زوجي إن الدم نزل وعندي طلق وقلتله إسكت لا تخبر أهلي-اللي كنت معاهم في البيت- لغاية ما يصلون التراويح دامني قادرة أتحمل الألم.وهذا اللي أفضل تسوونه دامج تقدرين تتحملين حاولي تمشين عشان يسرع لج الطلق.

بعد ما رجعت أمي من الصلاة قلتلها بروح المستشفى-كان يوم جمعة- أشوف الرحم أشكثر فاتح-كأنها كشته- وإذا أكثر من 5 بتصل فيج تجيني. وهذا شيء وااايد مهم أخواتي لا تجزعن وتجزعون أهلكم وياكم، تراها مب سهلة على الأم ان بنتها تولد خصوصا اذا كانت أول بنت تولد عندها، وبعد ما تقومين بالسلامة خصوصا اذا الله رزقج بنت بتقدرين تحسين بإحساس أمج في هذا الموقف، خليج متفائلة وحسسيهم إنج مبسوطة وقدها وقدود عشان ما توترينهم.

سرت مع زوجي المستشفى و كان الرحم فاتح 4 سم، طبعا نوموني لأن من بعد 4 ممكن الولادة تصير أي وقت، فقمت أمشي على كبر المستشفى طول الوقت وأصلاً كانت غلطتي إني ما مشيت وايد مثل ما قالولي من بداية التاسع كنت أدلع وأكسل.

و يحليلي طلق البنات البارد اللي يمللج، لغاية السبت الظهر كان توّه 5 سم، وأنا طفرت من جلسة المستشفى وانتظر في أي لحظة الولادة مع ان الطاقم واايد يراعيج ويهتم فيج وكم تسوى الإبتسامات اللي يوزعونها على الحوامل والمربيات، السبت بالليل زاد الألم وما تكلمت كنت معزمة أخليهم يرخصوني السبت -متفيجة صح؟أتحرى بعدني بطوّل- ويوم جت الدكتورة الأحد الصبح تقولي فيكي ألم قلتلها لأ خلاص خليني أروح البيت، فحصتني شافتني قريب ال6 سم، قالتلي مستحيل ما فيج ألم، وحرقت وجهي وحطتلي جهاز نبض الجنين -وهوه يبين شدة الألم عند الحرمة بعد- فبيّن كذبي وقالتلي : ليش فيج هالألم وساكتة تبغين تطلعين وتولدين في السيارة؟؟

طبعاً حابة أوضح شي وااايد مهم لا تخافين من الفحص الداخلي لعنق الرحم، أنا كل حد خوّفني منه وأنه يألم أكثر من الولادة وكل الخرابيط اللي يقولونها لكل حامل، بس كنت مصممة اني أخوض تجربتي وحطي في بالج حقيقة واضحة مثل الشمس ما أدري ليش الحريم يتناسونها "إذا هالحريم كلهم يحملون ويولدون كل يوم إنتي في شوه أقل عنهم؟؟ّّ" وخليج شجاعة واسترخي عند الفحص لأن التشنج هوه اللي يألم مب الفحص. وممكن يألم شوية إذا الرحم مغلق بس إذا كنتي 5 وأكثر ما بتحسين بشي لأن الرحم مفتوح أصلاً!!! وصدقيني على كثر ما تتعاونين مع الطبيبة والممرضات كثر ما هم يهتمون فيج ويريحونج.

ونقلتني الدكتورة غرفة الولادة وكانت معايه أم زوجي من الليل بايتة معايه فديتها، ووصل زوجي وأمي وعمتي وأخواتي الإثنتين على الظهر ومساكين صيام وكلهم يقرون على راسي قرآن لغاية العصر، لما طوّلت الدكتورة قررت تعطيني طلق صناعي لأن طلقي كان وااايد بااااارد وخافت أتعب على النهاية ما يكون فيّه حيل.

وعلى فكرة الطلق الصناعي مب جهاز ولا عملية ولاشي يوضع على الجسم مثل ما سمعت الفكرة عنه عند حريم واييد والغريبة ان فيه منهم والدات قبل، الطلق الصناعي عبارة عن هرمون الولادة المركز اللي يفرزه جسمج طبيعيا يحقنونه فيج عشان اللي عندها الهرمون أقل من المفروض يسرع عندها الولادة وهذا هوه بكل بساطة!!! انا كانوا حاطينلي مغذي لأني طولت واايد فحطولي الطلق مع المغذي. وصراحة ما أذكر الحين عطوني الحقنة الشرجية قبل وإلا بعد الطلق الصناعي، بس أذكر انه الشي اللي كنت خايفة منه بس والله يريييح وهوه عبارة عن زجاجة صغيرة فيها أنبوب صغير توضع كالتحميلة الشرجية فتدفق سائل للأمعاء 10 دقائق وتذهبين للحمام تفرغين ما فيها دفعة واحدة وهي تسهل الولادة لأن الأمعاء التي يضغط عليها الرحم كثيرا وقت الولادة تكون فاضية لأنه إذا كان بها شي فوقت الولادة سيخرج -فما في داعي للأحراجات- :eek2:

وبعدني مستمرة لبعد العصر سالوني إذا أبغي أبرة مهدئة للألم وهم كانوا يسألوني إذا اباها من نقلوني الغرفة بس انا كنت قادرة اتحمل الالم وقلت بخليها لغاية الحد اللي ما أطيقه فيها-وهيه غير إبرة الظهر اللي تخدره- فعطوني إياها قبل 7 سم وريحتني صراحة. قبل المغرب سار زوجي مسكين البيت وجاب فطور حق الجميع وفطروا الجماعة وأنا بعدني بس كان هوه يسوي لي مساج حق ظهري ويقوي عزيمتي ويبوس جبهتي كل شوي كــــــــــــــــــل هذا ما خلاني أحس بأي ألم :-) ، ولحسن حظي ان الطلق ما زاد إلا على بداية صلاة التراويح كنت 9 سم وزوجي أضطر انه يروح المسجد، وهنيه لازم تستجمعين طاقتج كلها عشان تخلصين ولا تصرخين لأن هذا يزعج الطاقم الطبي وما بيزيدج إلا ألم، وولدت مع الدقيقة الي سلموا فيها من الصلاة ولله الحمد، وشفت بنتي فديتها صغيرة جدا وكان هذا سبب لطول الولادة لأن المولود الصغير ما فيه حيل يدفع معاج ،

ووصل أبوها من المسجد -وهوه كان معايه طول الوقت في الغرفة -بعد ما نظفوني أنا وهيه، وما شاف أي شي كنت خايفة منه :-) بس عموما انتي تكونين مغطاة ومحد يشوف منج شي إلا اللي تولدج بس.

بس الصراحة تيسير رب العالمين ومساندة زوجي لي وفخري بشجاعتي وتحملي ووتجربتي الحلوة مع الولادة الطويييلة اللي ما أذكر منها إلا روعة شوفتي لبنتي بعدها خلتني أتحمس أحمل مرة ثانية بسرعة وهذا اللي صار :-) [/foq1]