ماذا تفعل ولا تفعل العروس.. لنستفيد من الخبرات

هلا خواتي .. اسمحولي على التأخير في الرد لأني ملجت :o

الغاليه المملوحة نونو.. مشكورة على الشرح.. واسمحيلي شكلي تلخبطت.. يعني فهمت ان الفستان جاهز ولونه سكري وانتي دخلتي عليه ورد صح؟

اسمحيلنا أذيناج..

هلا اختي نوره.. العفو اختي كلنا خوات اهني.. وان شالله نقدر نفيد بعض اكثر.. تدرين وايد استانست يوم قلتي انج هونتي نتنفين حواجبج.. الحمد لله انج تغلبتي على الشيطان وقدرتي تحرينه :)..
وعن سالفة ان حواجبج متصله شوي.. انا ربيعتي نفسج.. وكلنا نقول لها ان هاي من علامات الجمال خصوصاً انها مرتبه والاتصال بسيط... وهاي ميزه يا نوره... وانا متاكده انه شكلج وايد احلى فيها.. لان ربيعتي تحب المغامرات وطلعتها مره والكل قال انها شانت عشان جيه ندمت وما طلعتها عقب..

والله يسامحج.. ليش تحرينا :( انا ماعرف شي في هالسوالف.. ووقت العرس يقترب.. تكفين علميني كيف اكويها؟ شو تحطين عليها عشان تثبت.. وشو شكل ونوعية مكواة البخار؟

اتريا ردج.. ونتيجة اجوبة هلج وصديقاتج :)

هلا خواتى الموضوع وايد حلوووووووووووووووو ومهم
الصراحه هذى اول مشاركه (f)
وحبيت اشاركم
بنسبه للغتر ما عندى اى خبره وكان اخوى الكبير يوقف ورى راسى لين ما اتعلمت اكوى الغتره عدل بس يوم اخوى اتزوج نسيت كل شى و ما لى خص بالكوى بس بعد ما قراءة هذا الموضوع بسير عند اخوى عشان يعلمنى، وان شاء الله يرضى.
وان شاء الله بخبركم بطريقه بعد ما اتعلمها من جديد.
وبنسبه للحواجب صراحه ما احب اشالها ابد لانه سمعت سالفة وحده ماتت لانها بغت اتشل شعر من حواجبها كن موب طايعه تنشال، أصرحه ما اعرف اذا كانت السالفه صدج والا لا.

ما ابا اخوفكم بس ها لى سمعته.

واسمحولى.

اختكم لؤلؤة دبى

السلام عليكم والرحمة

أول شي مبروووووووك الف الف مبروك أختي روح الأمل على الملجة(l)

وبعدين مشكورة على النصيحة وانشالله خلاص ماراح اغير في حواجبي شي :)

اما عن كوي الغتر فالسمووووووحة ماكان قصدي احر قلبكم :o اتغشمر والله

والطريقة سهلة بس كل شي يبي له ممارسة عشان تتعودين عليه :)

يعني انا مثلا اول شي اكويها كامل وبعدين ارش عليها نشاء (روبن) لونه احمر وازرق وبعدين اكويها مرة ثانية واكثر من النشا جدام

وبعدين اكفسها وازيد نشا صوب المرزام يعني صوب الكفسة واكويها وبس اخليها جذي

ومكواة البخار أسهل بس تقدرون تستغنون عنها اذا تعلمتو على المكواة العادية

اذا ابي اكوي الغترة في مكواة البخار اول شي اشغلها لين ماتحتر وبعدين احط فيها الغترة واهي مكفوسة على طولها وارش عليها اشوي ماي او نشا اذا ابيها اتصير يابسة واسكر عليها لين ماتولع اللمبة الحمرة افتحها وبس انتهى الموضوع :)

والزين فيها انها ماتخلي هوا في الغترة يعني تكويهااااااااا عدل




المهم جنه موضوعنا انتقل من خبرات المتزوجات إلى كوي الغتر :D:D



تره انه زهبت ردود صديقاتي وانشالله تستفيدون منها (g)

الأولى

1. شو الشي الي سويتيه في مرحلة الاستعداد وندمتي عليه؟

اني ماتحنيت .. عشان اهل المعرس كان عندهم واحد متوفي بس من جم شهر (فآنه يازعم كنت ابي اراعي شعورهم) .. مارحت العرس الا كلهمممممممم متحنيييين :eek: انقهرت :confused:

2. وشو الشي الي ما سويتيه وتمنيتي انج سويتيه؟

إني مارتبت طريقة دخولي ولا حتى قلت حق الديجي الأغنية اللي ابيها .. يعني باختصار كانت زفتي (بايخة):(

3. وشو الشي الي سويتيه ومستانسه انج سويتيه وتنصحينا به؟

اني بردت حرررررررتي في التصوير .. صورت وااااااايد (فيديو وفوتوغرافي):D

*********
يتبع ..

الثانية

1. شو الشي الي سويتيه في مرحلة الاستعداد وندمتي عليه؟

اني شلت ويهي (بالشيرة!! .. كله من الكوافيرة قصت علي ) :eek:
وطول شهر العسل وانا ويهي كله حرااار :confused:

2. وشو الشي الي ما سويتيه وتمنيتي انج سويتيه؟

تمنيت لو اني سويت حفلة ولو بسييييطة عشان الذكرى بس (كل ماروح عرس الحين قلبي يتفرفت اني ماسويت حفلة .. لأن حزتها كنت مستانسة ومو هامتني الحفلة بس الحين تحسفت)

3. وشو الشي الي سويتيه ومستانسه انج سويتيه وتنصحينا به؟

اني سويت لي حمام مغربي 3 مرات قبل العرس

*********
يتبع...

الثالثة

1. شو الشي الي سويتيه في مرحلة الاستعداد وندمتي عليه؟

اني سويت عرسي بعد وفاة جدي بخمس شهور ، وجدتي ومعظم خالاتي ماحضرو العرس :(

2. وشو الشي الي ما سويتيه وتمنيتي انج سويتيه؟

تمنيت لو اني راعيت تناسق الألوان في الحفلة ( يعني مثلا لون التوزيع كان يختلف عن لون المسرح ولون المسرح يختلف عن لون البطاقات ووو )

3. وشو الشي الي سويتيه ومستانسه انج سويتيه وتنصحينا به؟

مستانسة اني ماطعت شور صديقاتي وحفيت حواجبي .. جان بتوهق الحين

*******
يتبع...

الرابعة

1. شو الشي الي سويتيه في مرحلة الاستعداد وندمتي عليه؟

اني ماكتبت في بطاقات الدعوة (ممنوع اصطحاب الاطفال!!) .. كنت اقول حرام خل الاطفال يستانسوووون لكن اخخخخخ عرسي صار جنه روضة

2. وشو الشي الي ما سويتيه وتمنيتي انج سويتيه؟

تمنيت لو اني ريحت عمري قبل العرس ( كل شي كان على راسي من الالف الى الياء .. خصوصا اني من النوع اللي مايعجبه اي شي) تعبت وما يات ليلة العرس الا انه حدي مرهقة
وتمنيت بعد لو اني جهزت حق عرسي قبله بفترة (انه جهزت حق العرس خلال شهرين بس!!)

3. وشو الشي الي سويتيه ومستانسه انج سويتيه وتنصحينا به؟

الشي اللي سويته ومستانسة اني سويته أولا اني ماشلت ظهري مثل مانصحوني وثانيا بالنسبة حق الحفلة الحمدالله عزمت الكل قريب وبعيد ماخليت احد عشان محد يزعل منا ....... بس بيني اوبينكم بعد في ناس زعلو!!!! :s
الحمدالله على كل حال ...

*********
يتبع ...

الخامسة

1. شو الشي الي سويتيه في مرحلة الاستعداد وندمتي عليه؟

اني مافصلت فساتيني من وقت .. تبهدلت .. لدرجة اني لين مارجعت من شهر العسل وانا اروح الخياط عشان استلمهم أو اعدل فيهم .. والمشكلة بعد ان وقت عرسي كان وقت عيد الفطر وكانت الخياييط مليانة

2. وشو الشي الي ما سويتيه وتمنيتي انج سويتيه؟

تمنت لو ان ريلي ماشافني قبل العرس بفترة على الاقل بشهر .. بس اهو خرب علي وياني قبل العرس بيومين ... والمشكلة مره ثانية ان كان عيد فلازم اييني عشان اعييد علي :o

3. وشو الشي الي سويتيه ومستانسه انج سويتيه وتنصحينا به؟

انصحكم انكم اتسوون التوزيع بروحكم أو حتى المسرح اذا قدرتو .. تصممونه بروحكم
آنه سويت كل توزيعي بروحي وطلعت اشيا تهبللللل(بس بعد خواتي ماقصرو واشتغلو معاي)
يعني احسن لكم و أوفر بواااايد انكم تشترون الخامات وتشتغلون على توزيعكم .. واللي اتقول ماعندي افكار .. تروح المحلات واتشوف الافكار:p

*********
يتبع ...

السادسة

1. شو الشي الي سويتيه في مرحلة الاستعداد وندمتي عليه؟

اني صبغت شعري وقصيته للعرس .. تمنيت لو اني خليت هالتغيير بعد فترة من العرس

2. وشو الشي الي ما سويتيه وتمنيتي انج سويتيه؟

تمنيت لو اني انهيت آخر سنة لي في الجامعة وبعدين تزوجت .. لأني حملت وتعبت واثر على معدلي واااايد

3. وشو الشي الي سويتيه ومستانسه انج سويتيه وتنصحينا به؟

مستانسة اني ماكلفت على زوجي وراعيت ظروفه المادية وقتها ( مثلا سويت حفلة بسطية بين الاهل بس و سافرت بس مصر ورضيت اسكن في شقة صغيرونة مؤقتا والحمدالله الحين ربي فتحها علينا وعوضت في كل شي .. اهم شي اني ماسويت ديووون على زوجي )
نصيحة للمقبلات على الزواج : لا تثقلون على ازواجكم بالديوون لان بعدين كل ما بيقرب عشان ........:o بيتذكر الديون اللي عليه بسببج وبتلوع جبده منج.

ملاحظة: انا مالي شغل اهي اللي قالت هالكلام ههههههههههههههه :p

********
انتهى :)

هاه بنات اشرايكم فيني ؟؟ اصلح صحفية :cool:

ما شاء الله عليكي يانورررة ... فعلاً أفديتنا فايدة كبيرة ...

ومو تصلحين صحفية بس لا ورئيسة تحرير بعد :)

هلا اختي نوره... تسلمين والله.. الله يبارك فيج...

مشكوره على التهنئه.. واسمحيلي تاخرت في الرد بس مشاغل التجهيز..

ما شاالله عليج عيني عليج بارده.. كفيتي ووفيتي يا صحفيتنا.. نصايح وايد حلوه...

يزاج الله ألف خير الغاليه..

مرحبا خواتي كيف حالكم....
بصراحة شدني الموضوع حيل :cool: ....
ومن الاشياء اللي سويتها وندمت عليها اني خليت خواتي يختارون كل شي في تجهيزي مثل الفستان والتسريحة والمسكة والمكياج يعني خلوني على كيفهم وماعجبني شكلي بعرسي بس الناس يقولون اني كنت حلوة وماصدقتهم:confused: :confused: :confused:
والشي اللي ماسويته هو اني مادخلت الصالة مبكرة وماصوروا معاي صديقاتي وماشفت شي من العرس يعني اللي تبي تتزوج احسن لهل تدخل الصالة مبكر علشان تستانس بعرسهل;)
والشي اللي سويته ومستانسة منه هو اني ماحفيت حواجبي وماكثرت من الدراريع الفخمة:)
ونصيحة مني كثروا من البيجامات لأنها مريحة وناعمة :p
وشكرا

هلا اختي mgmg.. يزاج الله خير على المشاركه :)

عن البجايم.. زين انج ذكرتيها.. اي بجايم تقصدين؟

ومتى العروس تلبسها؟

شو احسن تكون قطعتها؟

وآخر سؤال كم بجامه احسن نييب؟

لأني اتجهز ويبت وايد بجايم وقالولي اني ما بحتاجها...

وتسلمين الغاليه..

الغاليه نوره..

نسيت اشكرج على شرح طريقة كوي الغتره.. وبغيت اتأكد اول شي يوم تكوينها تكون الغتره مفتوحه؟ يعني مربعه.. وعقب تكفسينها وتكوينها مره ثانيه ولا انا غلطانه؟

وشو نوعية مكواة البخار اللي تستخدمينها؟

وتسلمين :)

السلام عليكم ورحمة الله وبركاته

Mrs.Cute ، روح الأمل .. العفو :)

أختي روح الأمل صح الفكرة اللي فهمتيها عن الكواي واسم المكواة اللي عندنا singer

امنتكم الله (l)

أول شيء السلام عليكم خواتي..هذي أول مشاركة لي وياكم وأتمنى أفيدكم..
الشيء اللي ما سويته وندمت عليه..إني استعجلت وما جربت أكثر من صالون في المكياج والتسريحة..وإني ما شقرت حواجبي..لأني سألت عن تشقيرهم وقالوا لي يجوز..والله أعلم..بس أنا ما لحقت أشقر..وبعدين للأسف تأخرت على المعازيم..وما لحقت أتصور قبل لا أنزل..وكانت كل الصور بعد العرس..يعني بعد ما بدت الكشخة تروح..وإني ما تعلمت الطبخ قبل العرس:(:(..الشيء اللي سويته وندمت..أني ما تمهلت في اختيار مكان لشقتي والنتيجة..مليت من الشقة وكرهتها..وحسيت بالأخطاء اللي فيها بعد فوات الأوان..
الشيء اللي ما سويته وما ندمت إني الحمد لله ما خسرت على البطاقات والكوشة لأنها أشياء ما يبقى منها شيء بعد حفلة العرس..

عفوا اخواتي كلهم تتكلمون عن عدم حف الحواجب يعني ماتؤيدوون هذا الشئ ممكن اعرف ليش لاانني مشتغربه واالله:rolleyes: يعني مااعرف القصد من وراء كلامكم؟!!!!!!!

حبيبتي blomma
تدرين ليش كلنا نعارضن فكرة حف الحواجب

لأانها نمص وهو اللي نهانا عنه رسولنا الكريم حيث قال في حديثه الشريف ::::

.....لعن الله النامصة والمتنمصة .....

اللعن هو الطرد من رحمة الله
هل ترضين ان تكوني مطرودة من رحمةالله في اول يوم من ايام زواجك
وانت بحاجة لرحمة الله ان يوفقك في زواجك ؟

والنامصة هي المرأة اللي تحف الحواجب
والمتنمصة هي المراة الي تحف حواجبها


لذلك كلنا نجمع على عدم الحف ونرفع شعارنا


لا لمغريات الصالونات


تمام


يالله مع السلامة

غاليتي شهد هل انتي متاكده من هذا الكلالالام؟
ولماذا اغلبيت البنات يحفوون حواجبهم؟
وقسم منهن على خلق ودين:rolleyes:
ربما رسولنا (ص)قصده بالمتنمصه هي تلك الفتاة التي تقووم بحذف حواجبها نهائيا وبعدها تقووم برسم حواجبها رسم وانا شايفه كتير من هذا النووع وحتى انتي غاليتي ربما شايفه ايضا:)

فربما تحليلي صحيح
لاانو مش معقوووله كل البنات الي يحفوون حواجبهم ملعونين اي مطرودين من رحمة المولى عز وجل.

تقبلي خالص تحياتي اختك بلوما
اي ورده في اللغه السووويديه:)