ممكن احد يرد عليي ولا تهملوني الله يحفظكم

السلام عليكم يا خواتي

عندي شوية اسئله وودي تجاوبوني وياليت اختي حبيبه تجاوبني


اني عمري 20 سنه وحامل اول حمل ليي ومن بداية الحمل وعندي وحام صعب جدا بحيث اني طول اليوم أرجع والغثيان على مدار 24 ساعه شغال وكنت اتنوم بالمستشفى كثير علشان الجفاف الي يصيدني وكنت ما اقدر آكل شيء ابدا بحيث اني الي آكله ارجعه بالوقت نفسه وصادتني حالة اكتئاب شديده وانعزلت عن الناس وكنت دايما ابكي وزوجي يصبرني ويقول ليي قولي الحمد لله في ناس يتمنون يصيرون نفسك علشان البيبي بس انا صابرة ومتحمله وللحين الغثيان والترجيع مستمر علما بأني الحين اعتقد اني دخلت الشهر السابع وكانت آخر دوره لي 7\12\2004 وموعد الولاده الي عطوني اياه 13\9\2005
واخر حدث صادني كان بتاريخ 3\6\2005 حسيت بألم شديد ببطني ورحت للمستشفى وقالوا ليي عندك التهاب شديد وتنومت في المستشفى 5 أيام وباليوم الي كنت بطلع فيه من المستشفى بعد ما قالت ليي الدكتوره اليوم بتطلعين قمت ركيض على الحمام ورجعت دم كثير ولما طلعت قلت لها بس ما قالت ليي شنوالسبب ؟؟ وعطوني دوا الحموضه الي يجي نفس الحليب لونه ابيض

وباليوم الي طلعت فيه من المستشفى ما حسيت بحركة الجنين ابدا لمدة 3 ايام وخفت فذهبت للمستشفى وعملوا ليي كشف بالموجات فوق الصوتيه وقالوا ليي الجنين اوكيه بس السائل الي حواليه قليل علشان جديه مافي حركه


والحين ابغي اسئل
1. شنو سبب الدم الي رجعته؟
2.وليش السائل قليل ؟وممكن يأثر على الجنين؟
3.في عندكم حل للترجيع؟

ياريت تجاوبوني وجزاكم الله خير الجزاء وربي يعطيكم الي في بالكم إن شاء الله



شكلي عورت راسكم بكثرة الهدره