مشاكلي بعد الولادة

السلام عليكم ورحمة الله وبركاته

مثل ما تعرفون انا طاف موعد ولادتي و قعدت اتريا اتريا ولا الم ولا شي
و في تاريخ 25 ساعه 7 الصبح بدا الالم ايني و يروح و استمر على هذا الحال لين الساعه 12
و انا قبلها بليله مب نايمه لاني اسهر باليل و انام النهار و قام الويع يتكرر كل 10 دقايق انا قلت جربت ولادتي و اتصلت حق ريلي و قلت له تعال و تريت لين العصر الساعه 3 و نص فجأة
( اختفى الويع ) :eek2:
و قعدت انتظر لين ساعه 7 رجع بس خفيف و مرة كل ساعه انقهرت و تعبت و اخر شي ريلي قرر نمشي مشيت و لين ساعه 1 الفجر قام ايني ويع اقوى و صارت حركه البيبي هيه اللي تسببلي الالم
ساعه 2 قلت له ما اقدر استحمل ودني المستشفى و رحنا
و سوالي الفحص حجم الفتحه قالت الدكتورة 3 سم انصدمت كل هذا و اخر شي 3
و بعد معاناة طويله و انا جسمي ضعيف مب قادرة استحمل الويع و يات ممرضه زيغتني و قالت انتي ابسط شي مب مستحملتنه كيف بعدين و ريلي غيض عليها و انا احاول اتذكر اللي قلتوا عنه عن التنفس و كل شي
و اسمريت لين ثاني يوم يات الدكتورة تخيلوا انا اتويع وممرضه تقول حق الثانيه لازم نسألها كيف هيه ضعيفه شو تاكل و شو تسوي ياتني صيحه من القهر
و الدكتورة كانت زينه بس ايدها ثقيله و تسبب لي الالم و بموت انا مب قادره استحمل
عطوني ابرة و ما سوت لي شي خلاص انهرت اخر شي من التعب و قالوا بيعطوني اكسجين يخفف الالم بعد عمتي ما رضت واخر شي جهزوني حق الولادة و انا اقول الحينه ؟؟ يقولون لا صبري شوي بعد
بغيت اموت ما اقدر اصبر اكثر صرت اتنفس تنفس سريع مثل الهث مثل ما قلتوا سوي اخر شي و الممرضه تنازعني قلت لها علميني شو اسوي بموت
و يوم بغيت اربي قالولي شدي و انا اشد و بعدين احاول اخذ نفس و ارجع اشد يقولون لي لا تتنفسين فالذمه اختنق يعني ؟؟؟ و الله صرت كني غرقانه ابا شوي هوا و هم ينازعوني مل ما تنفستي يعني اقعد 5 دقايق بدون اكسجين ؟؟؟

المهم اخر شي الساعه 12 ونص الظهر من تاريخ 26-5 طلعت البنت و مالي خاطر اشوفها ههههههههه


الحينه عندي مشكله في رضاعتها صدري صار فيه تشققات لدرجه ان الدم طلع منه ويألمني كل ما حاولت ترضع لان الحلمه داخله لداخل و البنت مب قادره ترضع و تكسر خاطري فيني حليب بس ما اقدر ارضع بنتي عطتني الدكتورة كريم
بس بغيت اسأل عن الحلمه الصناعيه شو هذه و كيف يستخدمونها و لو في حالتها استخدمتها بتخفف التشققات و الالم ؟؟