ازاى اساعدها

السلام عليكم ورحمة الله وبركاته

بقالي كثير ما كتبت وترددت كثير قبل ان اكتب هذه المشكلة

الحقيقة هى مشكلة صديقة لي تكون اقرب من اخت والله

ومشكلتها انها من فترة حصلت لها مشاكل مع زوجها وتركت البيت وبعدين رجعت بعد فترة طويلة ومشاكل كثيرة كادت تنتهي بالانفصال لكن الحمد لله ربنا سلم

المهم انها فجأة ظهرت عليها اعراض غريبة

يعني تدين بافراط ، انا عارفة هتقولوا ايه المشكلة ربنا يعينا كلنا على الطاعة، المشكلة انها بقت تعمل تصرفات غريبة يعني تصدقت بملابسها كلها، وباعت ذهبها وتصدقت به – لحد هنا ممكن تقولوا ماشي ممكن تكون حاجة عادية

اللي مش عادي انها تخرج الفجر علشان تفتح المسجد بنفسها وعاوزة تنادي في النساء للصلاة وتركت امور الدنيا كلها ومش بس كده كمان علاقتها باولادها ساءت واصبحت لا تتعرف عليهم وحاولت تخنق ابنها الصغير امام ابنتها

الحمد لله ان زوجها وأهله تنبهوا للي بيحصل واخذوها لأحد دكاترة المخ والأعصاب الدكتور قال ان المشاكل الأخيرة وترددها بين رغبة اهلها في طلاقها ورغبتها في العودة لزوجها هى السبب في اللي حصل لها والمفروض انها دلوقت احسن وحالتها تحسنت.

لكن الحقيقة انها مكتئبة، الضحك ما كان بيفارق وجهها رغم المشاكل مع زوجها لكن دلوقت على طول حزينة وكل كلامها في الدين، وتقولي الشيطان ساعات يوزني اترك بيت زوجي وبيت أهلي وامشي من غير ما حد يعرف انا فين لكن انا عارفة انه الشيطان ولما بيحصل كده اقوم وأصلي

والله يا اخواتي انا احترت معها لما قالت لي كده حسيت انها لسة بعقلها يعني على الأقل قادرة تفرق بين الوسوسة والحقيقة وباقول الحمد لله انها تستعين بالصلاة والدين

لكن نفسي انها ترجع زى الأول مش عارفة اساعدها ازاى ، ازاى ازيل الاكئاب والحزن اللي عندها

ربنا يعلم انها اقرب لي من اختي ومحبتي لها هى اللي خلتني اطلب مساعدتكم مش عارفة اعمل لها ايه

يمكن تساعدوني