لأول مره أواجه أخوي بالحقيقه المرهـ ..

السلام عليكم ورحمة الله وبركاته

ياهلا فيكم خواتي ااحب احييكم وامسي واصبح عليكم بعد وبجد اشتقت لكم كثير ..

واليوم جيت لكم من بعد غيبه طويله ولكن هالمره من بعد مواجهة اخوي بالحقيقه المره اللي كاتمتها بقلبي من زمان ماتتخيلون يابنات كيف كنت متردده مليون مره من مواجهته والاف المرات افكر بمواجهته ولكني كنت افكر بالأسلوب ولكن هالمرخ خلاص طفشت ومن كثر الملل والطفش اللي فيني طلعت الكلام من غير ماحسب لأي شي ...

اليوم جلست عند اخوي بالغرفه وقلت له انا مره طفشانه من الجلسه بالبيت خلاص مليت ابي اسافر ابي اطلع ابي اروح لأي مكان وكان جوابه لي طبعا كلالمعتاد انتي عارفه اني ماحب اطلع بره منطقتنا ولا أدل اي مكان غير شوارع منطقتنا وترى فعلا هو كلامه صحيح مايعرف مكان الا منطقتنا لانه قلبه ماليه الخوف ويحسب مليون حساب للي ممكن يحصل بالطريق يعني بالعربي يتوقع الشر قبل الخير عشان كذا مستحيل يطلع لأي مكان من غير مايكون معاه احد يدليه على المكان اللي بروح له ...


المهم طبعا انا عصبت لاني بجد كانت اعصابي منهاره تخيلو يعني حبسه بالبيت ولا عندنا طلعه لأحد من اقاربنا ولاروحه ولاجيه وشهور ونا محبوسه ولاحتى وظيفه فيه بالله انا لو حجر كان من زمان انهار ... زين مني اني تحملت الى هذا اليوم والله جالسه اكل بنفسي واقول بكره تفرج ان شاء الله وجالسه طول عمري على الأمل انتظر ...


فاطبعا انا من كثر ماعصبت قلت له يعني الى متى هالحاله اما حبسه بالبيت ولا جالسه تحت رحمة اخوانك وحريمهم متى ماتفضلو علي وقالولي تروحين معانا رحت وان رحت الف منيه يمنون فيها علي ولا الف مصلحه يبغونها مني اما لهم في سلفيات وغيرها واما لزوجاتهم عشان اقوم فيهم اذا ولدو ولابغو يروحون لمكان فقلت له انا خلاص بجد تعبت ماراح اقدر اجلس كذا على طول ..

بعدها ماشفت نفسي الا دخلت له بالموضوع وقلت له انت تعرف اني الان صرت اذا رحت لمكان ولا احد شافني دائما يقولولي انتي متزوجه واذا قلت لهم لأ قالولي وليه اقوم انا طبعا عشان ماحسسهم بكسرة نفسي فأقولهم ابد انا مابي ومتى ماجا النصيب العدل وافقنا عليه فقلت له يعني قلي وش اسوي بعمري انا اروح اجره من بيتهم واقوله تعال اخطبني انا خلاص مليت والله ودي اتزوج عشان افتك منكم وارتاح وساعتها بس اقدر اروح واجي واطلع زي ما أبغا حتى لو انه عجوز راضيه انا فقالي سمعي عاد هذا شي بيد الله احنا مالنا يد فيه وياما ناس وصلو حتى للخمسين والستين وهم ماتزوجو قولي الحمدلله بس قلت له ونا وش قاعده اقول غير الحمدلله بس خلاص انا اتمنى الله يوفقني واتزوج عشان ارتاح بس من هالهم اللي انا فيه فقالي اسمعي اذا كان قصدك كذا فلاتظنين ان كل واحد بيرضى يطلع ويسفر وودي ويجيب فقلت له انا ميخالف انا راضيه حتى لو اطلع هنا بس ماحس ان احد يمن علي ... فقالي خلاص ادعي ربك بالتوفيق وخليها على الله وقفلي هالموضوع ولا اشوفك متكلمه فيه مره ثانيه ساعتها انا طبعا خلاص سكت ولا حاولت اجادل اكثر لاني حسيت وقتها اني قلت شي من زمان ودي اقوله وارتحت مع اني والله العظيم ان الحيا طالع من كل وجهي وحرارتي ارتفعت لاني ماكنت متوقعه بكون بهالصرحه بيوم من الأيام ...


المهم الا دخلت وقتها امي وتخيلو انا سبق اني كنت متكلمه معاها بهالموضوع وسبق اني قلت لكم اول مره قلته لها تعاطفت معي وصارت تقول ان شاء الله اول شي تتوظفين ثم تتزوجين كني هالحين ميته عالوظيفه ابوها لابو جدها الوظيفه قدام اني ارتاح مع انسان عليه القيمه من دين واخلاق وتكون معاه سعادتي ان ربي وفقني ان شاء الله ... ثم قلت لكم طبعا اني مره قلت لأمي حاجه انصحها فيها عشان ماتنحرج قدام الناس طبعا هي عدوها اللي ينصحها وبعد ماقلت لها النصيحه قلبت علي وصارت تقولي ولابعد تبين تتزوجين انتي اصلا مين يبغاك ولا ممكن يرضى فيك انتي شوفي كيف مخفوسه ههههههههههه استغفر الله ياربي صحيح اني انقهر بس وش اسوي أمي لازم اتحمل ماعليه :)


وبعد مادخلت امي وسمعتني اتكلم مع اخوي بهالموضوع قالت له اسكت قالت لي من زمان بس انا استحيت اقولك وقامت تقولي استحي لحد يسمعك وتفشلينا هذا شي مو بيدنا يعني تخيلو بدل ماتوقف بجنبي ... كالعاده تمسك الكلمه وتجلس طول اليوم تتكلم فيها ما كأني بنتها ولا وش تقلي بعد انتبهي لاتقولين هالكلام عند احد وتفضحين نفسك بسم الله علي وش افضح نفسي فيه هالحين بنات هالأيام الصغار يا أدناها بنت اخوي عمرها 15 سنه هذاك اليوم تقول انا اذا جيت اتزوج ابي اتزوج رجال حلو مو اي رجال وامها جالسه وامي وابوها وكلنا يعني جت علي انا لما قلت كذا ياسبحان اللهم ...


المهم بعد كذا زي اللي رق قلبه علي وقالي يالله اذا كنتي تبغين تطلعين ... ينقاله يعني مايبغاني احط هالسالفه ببالي واخليها اكبر همي فازي اللي يبغا يراضيني وينسيني بنفس الوقت بس لاني كنت مزعوجه اساسا فاكنت طول الوقت ساكته وماتكلمت وانتهى الموضوع على هذا الحد ...


بس تعرفون انا وش كان قصدي من اللي سويته كان قصدي اوصله رساله اني انا بالعربي ابغا اتزوج افهموها فالو كنتو انتو اللي مانعين عني الزواج فانا ابغا اتزوج حتى لو رجال كبير لاني مدري ليه حسيت من كلامه انه فعلا يتكلم بصدق لما قالي هذا نصيب من الله والتوفيق منه وبس حسيت ساعتها اني انا اللي ماجا احد تقدم لي مو هو اللي مثلا مانع عني الزواج على اعتبار انه المسؤول عنا بالبيت وهو الكبير ...


حتى تصورو انا قبل ما افتح السالفه كنت جالسه اسولف معاه واقوله وش رايك فيني مو كنه شكلي تغير قالي ايه والله تغير كثير قلت له يعني صرت بشعه ولا حلوه قالي لاطبعا انتي من قال انك بشعه بالعكس شكلك زين بس الان بعد ماتغير شكلك عن أول صرتي احلا وصارت ملامحك احلا اكثر من أول قلت له انا ليه طيب دائما احس انك انت واخوانك تنظرون لي بنظرة كأني وحده بشعه قالي لاوالله العظيم بالعكس انتي شكلك جداً حلو بس انتي يتهيأ لك كذا انا اخوي هذا فعلا اصدقه في كلامه لانه جدا حنون معانا ويحبنا وخاصة انه هو المسؤوول عنا ..


اما اخواني المتزوجين بالعكس هم اللي دائما ينظرون لي وكأني انسانه بشعه في اي شئ اسويه بشكلي او بلبسي بعكس لو زوجاتهم يسوون نفس الشئ ينظرون لهم بجمال اما انا اذا شافوني يشتغل معاهم الهمز واللمز والضحك والنظرات لحريمهم يعني شوفي وش مسويه من جد والله العظيم خلوني احس بتحطيم نفسي بداخلي خلوني احس نفسي اني بشعه وخلق الله احسن ... بس ما اقول الا الشكوى لله الله المستعان ...


ونا بجد حبيت اشاركم بموضوعي اليوم لاني كنت سبق اني قلت لكم مشكلتي من بدايتها وبكافة تطوراتها عشان تكونون معي بالصوره من البدايه وتعرفون سالفتي من البدايه للنهايه ... وانتظر ردودكم اكيد ...


وقولو آآآآمين يجي اليوم اللي اكتب لكم فيه قصة خطبتي يااااااا رب ...

...لااله الا انت سبحانك اني كنت من الظالمين ..اللهم لاتذرني فرداً وانت خير الوارثين ..