انقذوني..انا اموت كل يوم وكل لحظه

انا فعلا اموت كل يوم وكل لحظه، مشكلتي هي( الفراغ) القاتل الروتين اليومي اللي ذابحني ماعندي شي اسويه فراغ في فراغ احب الكمبيوتر نفسي الاقي شغله في هذا المجال اللي يشتغلوها في المدارس من ادخال بيانات وبرنامج معارف وغيره بس مالي نصيب، وانا بصراحه لارحت دورت ولاشي بس دايما محبطه محطمه ما اتخيل نفسي ابدا اني اشتغل واتعب واقطف ثمرة تعبي كل نهاية شهر، وعلى فكره انا هدفي من العمل معتوي اكثر من انه مادي لدرجة اني فكرت اشتغل كمتطوعه في جمعية الاطفال المعاقين بس ما ادري احس اني ما رح الاقي شغل حتى في هذا المجال، يعني بالعربي انا من النوع اللي ما اعرف اسوي شي الا لازم احد يمسكني من يدي يجيبني ويحطيني(تعبير مجازي طبعا) مليت من حياتي حتى الطلعة والتمشيه صرت اكرهها لا اشوف ناس ولا اختلط باحد من كثر ما انا مكبوده، مع اني احس نفسي اقدر اسوي شي وعندي مواهب بس..... ، وانا قرات موضوع المشاريع النسائيه التجاريه في المنتدى والموضوع جدا حمسني وشوقني ومن خلال القراة فقط حسيت اني الحمدلله ربي اعطاني كثير اشياء وفعلا ما اعرف استغلها، وعلى فكره انا كنت اشتغل في مجال الخياطة كنت احب اخيط واصمم وكانت هوايتي بس لما انقلبت الهواية لمهنه كرهتها من كل قلبي وحسيت اني تعبانه من هاذي الشغله لانها فعلا مهنه متعبه وخطيره صحيح انه دخلها حلو بس ايش فايدة الفلوس لو النفسيه ماهي مرتاحه، المشكله اني احب اخيط مفارش للسرير واطقم الالحفه ومفارش للمطبخ وستاير وغيرها بس ما تجيني الا فساتين السهره المكلفة والمتعبه وانا احمد ربي واشكر فضله انه وهبني هذه النعمه واني اعرف اخيط بس الواحد يوصل لحد ويقول خلاص .... الضغط والهم ولسان بعض الادميات كرهوني في المهنه، وناس يقولولي عين ما صلت على النبي، واتمنى انه ما يكون عين لاني احيانا احن للمهنه واحس اني ممكن ارجعلها في يوم من الايام بس دايما اقول لو الاقي شغله غير هذي رح اتركها وفعلا تركتها من دون بديل، ومؤخرا اتعرضت علي فكرة مشروع ماكينة خياطة تطرز بالكمبيوتر يعني أي رسمه او شكل في الكمبيوتر تختارونها تطرزها الماكينه حسب الالوان اللي تختارونها هي فكره حلوه ومشروع مربح باذن الله بس ما اعتقد لوحده محبطة مثلي، سعر الماكينه ثلاثين الف ريال ولازم اقدر ارد راس المال بس والله صعبه مع ان الافكار اللي تجول بخاطري من هذا المشروع افكار جدا جميله بس المشكله فيني انا كيف اسوق كيف اعمل دعايه والله صعبه انا دايما استصعب الامور وهذي مشكلتي الكبرى اتمنى اتمنى انكم تساعدوني وتنقذوني من الغرق ومن الموت كل لحظه.