الحمدلله ولدت تاريخ 5/5/2005

السلام عليكم ورحمة الله وبركاته

سوري طولت عليكم ..

واليوم داخلة ابشركم بشارة ولادتي الي صارت يوم الخميس تاريخ 5/5/2005 والساعة 7 ونص يوم كان ينزل نفاف..

الحمدلله ولدت بالسلامة ويبت حمودي ....

لكن يالله لو شفتوا حالتي قبل الولادة ... ان شاء الله بخبركم عنها .. اذا ما كملتها الحين بكلمها المرة الياية يوم بدخل ..

السالفة ..

قبل لا اولد بيوم وانا فالدوام حسيت بويع فالخصر وانا اتنفس .. طلعت من الدوام على طول سرت المستشفى ..

فحصت الدكتورة وقالتلي حاولي تمشين اليوم بالليل ..

نفس اليوم كانت عدنا عزيمة في بيت قوم امي .. سرت وعلى الساعة 11 مر زوجي علي ورحنا مشينا ... لكن صدق مشينا من الساعة 12 الين الساعة 2 ونص

واليوم الثاني الصبح الساعة 10 حسيت بماي ينزل اتصلت فالدكتورة قالتلي اسربي عصير برتقال وملعقة كبيرة زبت الخروع .. وانا سويت الي قالتلي عليه .. الين الساعة 3 اشوف لا الماي مب طايع يوقف ووايد ينزل .. ربيعتي قالتلي سيري مب زين للياهل الماي بيخلص .. على طول سرت مستشفى دبي .. قالتلي الدكتورة وقبل لا تفحص على ما اعتقد ولادة ...

المهم عقب الفحص طلع صدق ولاده بس قالتلي بنتريا شوي .. اتصلي في امي وخبرتها وانا كنت اتويع .. وقب ساعتين قالتل الدكتورة ان نبض البيبي مب منتظم ووايد ضعيف لازم قيصرية ..

اتصلوا في زوجي لانه كان طالع ساير البيت اييب شوية اوراق .. قالولة تعال بسرعة وضروري .. يوم وصل ضاربهم كيف بتسولها قيصرية وهي من بداية الحمل كل شي عندها اوكي .. قالتله الدكتورة يمكن الحبل السري ملتف حولين اليااهل ..

المهم .. نفس الوقت قلت حق الدكتورةاحس الياهل بيطلع .. شافت نبض البيبي طبيعي قالتلهم بسرعة على غرفة الولاده .. والحمدلله ولدت طبيعي بس وعرفت قدر الامهات .. وسبحان الله يوم كرم الامهات وخلى الجنة تحت اقدام الامهات على كل التعب الي يتعبونه فالولاده ...

وان شاء الله الله يسهل على كل حامل ... ويهون عليها