ابنتى المسكينة والخادمة الأندنوسية؟؟

انزين انتي ما تقدرين تاخذين اجازة هالاسبوعين لحد ما تيجي الجديدة والله بلحظة وحدة ممكن ايسوا اشياء كيف عن اسبوعين الله يستر

ياربي .. تسوي كل هالسوايا ومخليه بنتج عندها ؟؟؟ ما تخافين عليها ؟؟؟

ما تنلام الصراحه الخدامه يوم بتسوي كل هذا ..

وبعدين من الاساس الموبايل شو يسوي عندها ؟؟؟ هي جايه تشتغل والا تسولف في الموبايل ؟؟؟؟؟

اذا انتي تشتغلين وديها عند اهلج او اهل زوجج قبل ما تروحين الشغل ؟؟

ولا تخلين بنتج طول الوقت ويا الشغاله اذا انتي مب مأمنتنها .........


ولو انا مكانج .. ما اخليها في البيت .. وافتش اغراضها قبل السفر ..

والله يعين ويحفظ بنتج .. الواحد على كثر ما يقرأ من المشاكل والبلاوي للخدامات .. يعافهن ..

انتبهي اختي انتبهي على بنتج ..


تحياتي

حبيبتي nodoo

اسمحي لي اني اكون قاسية معاك شوية ... صحيح بنتك في ايدها كونك موظفة .. بس ايش عذرك لمن تكونين في البيت انك ماتغيرين حفاظات بنتك او تأكليها غداها ؟؟؟

حتى لو كنتي تعبانة لازم تخصصين وقتك لبنتك وخلي الشغالة تسوي شغل البيت وبس

حرام تتركين بنتك في يدها اذا هي وانتي موجودة في البيت تسوي فيها كذا شلون اذا طلعتي ؟؟ ليش ما تشوفين لك حضانة خاصة تاخذ الاطفال من الصباح الى الظهر او العصر على حسب الحاجة احسن لك من القلق على هالصغيرة وانتي بالدوام

بعدين ليش خايفة منها وما تقدرين تقولين لها شي

والله اذا حابة تشتغل حياها الله مو حابة درب يسد مايرد

خذي الموبايل لانها جاية تشتغل مو جاية تسولف ايش ضمنك انها ما تسولف مع واحد من جنسيتها وتجيبه لبيتك وانتي وزوجك بالدوام ؟؟

نصيحة شوفي اذا احد يقدر ياخذ بنتك خاصة هالاسبوعين امك او عمتك ام زوجك او صديقة متفرغة هذا لو مالقيتي حضانة ....

لا تزعلين من كلامي بس هذا كله لمصحلتك

خاشة اجازاتى للصيف ان الله كتب اسافر ، وبعدين امى ملزمة الخدامة اليوم تطلع من بيتى وبنتى مسكينة كل يوم اجلسها من عز نومها واوديها بيت أمى ، حتى امى تقول تعالوا عندي البيت وناموا عندي بالبيت لكن زوجي ما بيرضى حتى ما يرضى نروح بيت اهله نام هناك .........

وبعدين والله انا صرت اخاف والله العظيم منها لأن اخاف تسوينى شي مع بنتى واحنا زوجي دائماً يتأخر وما يكون بالبيت ..........

وبعد من غير الخدامة صعب عندنا غسيل وكوي وهذا صعب لي بيكون بنفس الوقت وين اخلي البنت .........

انا لين ارجع البيت البنت تحت عينى وانا اللي اغسلها وابدل البامبرز مالها واذا انا اعمل لها الحليب اقول للخادمة روحى بدليها والباب يكون مفتوح بس ساعات الكلبة تصك الباب ........

وحضانة انا بسجلها بشهر سبتمبر الحين متأخر الوقت ، وهي تروح المسكينة بالحر بيت امي.

وبعدين اختى انا ما اخليها لين ارجع البيت لوحدها اخليها معاي بالحجرة او ان تاخذ البنت ويرحون الحديقة وانا ما اقدر اهاوشها لأن بنتى بإيدها او اسحب التلفون منها ..... وطبعاً التلفون من جابته ما اعرف من وين ...........

وهي الله يزولها كل بالتلفون خامرة تدخل الغرفة الساعة التاسعة تحت البرنوص وتخمر على التلفون ..........

لكن انا خاشة لها عندى رقم الحقير اللي تكلمه يوم اللي بتروح براويها الرقم وبهقول لها الحين انا بتصل بالشرطة وباقول لهم عن هذا الشخص ، وبتصل بزوجته وبقول لها عن علاقتك مع زوجها وباخذ التلفون منها وبحرق قلبها ، بس زوجي موب راضي اعمل بها كذا لأن هو عنده مكتب للخدم يقول اذا هدتيها بتعمل لي انا سالفة وبتشرد من المكتب او من البيت اللي هي فيه.

الله يهداج يانودو ، آنه أصلا من شفت هالشغالة وآنه مب مرتاحة، والله يابنات ذاك اليوم يوم زرتها تلقفتني من عند الباب وين شغالتك ليش ماجبتيها؟؟؟ ولا قاعدة تطالعنه وحنا نسولف، هاذي حالة///
سفريها اليوم قبل باجر ، والله خايفة حتى تفقد بنتك عذريتها بسببها، وديها لبيت أمك ، أكيد أمك راح تتحملها بهالأسبوعين ماراح تتركها، أو أخذي إجازة أسبوع ماراح تنقص من رصيد إجازاتك وايد.... خافي الله في بيتك وبعدي هالأنسانة بسرعة، هالمرة أنت شفتيها وهي تعمل كذا بالحمام، ماتدرين الصبح وش تسوي أكثر للبنت,,,,,

والله يانودو لو انا مكانك من اول غلطة اسفرها وفورا

احسن حل انك من اليوم تقولين لها خلاص بطلي عمل ولك الف شكر ترى بنتك أغلى يانودو لاتخسرينها علشان خدامه تخافين تقولين لها مع السلامه

وبنتك وديها عند امك كل يوم الصباح او وديها للحضانه معليش بتتعبين شوي لمده بسيطه الين ماتحصلين على وحده كويسه تنفعك

أختك,,
صباحي

واللة حرام عليج شو بتستفيدين اذا سوت شي ببنتج...واللة لا الاجازة ولا الدوام بيعوضونج عنها.
حبيبتي ردي بيتج وخذي الخدامة بيدها وعلى الباب, وما فية داعي تقوليلها اي شي....لانها ممكن اتوصي حد يسويلكم عمل ويعفسكم حتى لو هية راحت عنكم.
بس من تطلع اقلبي بيتج ونظفية يمكن حاطة رسالة للجديدة او مخربة شي, فرتبي امورج قبل ما توصل الثانية.
والبنت لو الفصل الدراسي خلص شوفيلها حضانة (ثقة) او كلمي وحدة من الجارات وقوليلها بخلي البنت مع الخدامة الجديدة عندج خلال ساعات الدوام واعرضي عليها مقابل مادي او اكرميها بالهدايا...ولا تنسين ما يخدم بخيل.
واذا رجعتي البيت عودي بنتج تعلمج عن كل شي وابتدي اساليها شو صار وانتي غايبة.
والخدامة عطيها وقت لراحتها

وما اقدر اطلع اجازة الحين لأن ما في احد بدالي بالمكتب ، وبنتى احاول انومها الساعة 7 بالليل علشان تصحى بدري وتروح مع ابوها بيت امي ..................

والبيت محتاج لغسيل الثياب والكوي والطباخ وغسيل الحمامات مش سهل البيت يتم من غير خادمة انا ما راح اخلي بنتى معاها وهي تبيها من الله علشان تجلس تخمر على التلفون بس انا براويها شغلها حزت اللي اذلفها من البيت للمكتب.

لا تقولين البيت صعب من غير خدامة، آنه من تزوجت ولما حملت وبطني جدامي، حتى قبل الولادة بيومين كنست البيت كله والحمامات والمطبخ وكويت ملابس زوجي كل شي كنت أسويه بروحي وحتى لما ولدت بقيت بدون خدامة ليما صار عمر ولدي 6 شهور، يعني عندي خدامة من 4 شهور فقط، والله كل شي أسويه بروحي بس أحنه عيبنه الكسل تعودنه عليه هلشان جذي نقول مانقدر، سفريها وتخلصي منها وتحملي التعب شوي، وزين أنك تاخذينها بيت أمك، أصلا حتى لو ماصحت الصبح صحيها بالقوة وخذيها هناك....

يماااااااااااااااااااااااااااااااااااااااااااااااااااه أنتي كيف أتخلي بنتك معاها

والله حرام عليك يا أخت ندو والله حرام هذي بنتك امانه بعنقك لين يوم القيامه أي شي يصيبها وأنتي مسؤله عنها الله بيسألك عنها كلكم راعي وكلكم مسؤل عن رعيته

تبي تعرفي عن حالتي أنا عشان تاخذي العظة والعبرة بس انا ما بطرح سالفتي غير والله أنه الهدف منها أنك أطبقي على الأقل مثلها.

شوفي حبيبتي أنا موظفة ودوامي من الصبح لحد الساعة 2:30 و عندي بنت وولد بنتي عمرها 3 سنوات الله يخليها لي ويحفضها والولد سنه من يوم ما ولدت بنتي يعني من ثلاث سنوات وانا أودي بنتي عند أمي وأمي يا طويلة العمر بيتها يبعد عن بيتي مسافه تقدري تقولي أنها بالسيارة ربع ساعة بالسرعة العادية والعاليه كنت أصحي بنتي من الساعة 6 الصبح وأشل شنطة ملابسها وشنطة أكلها وطبعا عندي شغالة تساعدني وأودي أكلي عشان ينطبخ ببيت أهلي يكون لما ارجع من الدوام نتغدى على طول ما ننتظر لحد ما نطبخ وطبعا هالفضل كله بسبب الوالدة الله يطول بعمرها وحتى لمن حملت بولدي وولدته نفس الشي سويته من دون كلل أو ملل وأتعرفي شو الدافع اللي خلاني أستمر على هالحاله هو أني ما أطمن وما أظمن الشغالة شو تسوي معاهم من الصبح لحد الظهر حبيبتي هالشغالات الأندونيسيات بعطيك 3 صفات لهن.
1- الكذب عندهن مثل شرب الماي
2-ناكرات العشرة والجميل
3 خائنات

تعرفي ليش لأنك لو كنتي تعرفيني عن قرب كنتي بتشوفي كيف كنت اعامل شغالتي أنا كنت دائما اردد لشغالتي وأقول لها شوفي هذا البيت بيتك وأنتي مثل اختي ما دام رساعدتييني بتربية بنتي والحين ولدي تعرفي أخير بشو كافئتني حصلت معاها يجي فوق ال15 رقم تلفونات لشباب ولا بعد عندها موبايل تتكلم منه وهذي بعد ما عندها وقت يعني من الصبح لحد الظهر تكون تحت عين الوالدة وبقية اليوم عندي وسوت هالفعايل كيف عاد أخت ندو أنتي تخلي حبة عيونك معاها والله حرام.

أنا اقولك خافي ايوه منها ولا تامني لبنتك لأي شغالة لو كنتي صحيح تريدي مصلحة اولادك أنتي ادرى حبيبتي بمشاكلهن صح أحنا نحتاجهن وأصبحن شي ضروري بكل بيت لكن لكل شي حدود .

من اليوم جهزي شنطة بنتك وغيري برنامجك وكل يوم ودي بنتك هي والشغالة لبيت والدتك عشان تساعد والدتك بيها وترتيب وغسيل وطبخ خليه من ترجعي للبيت ولو حبيتي أي مساعدة راسليني حبيبتي بالخاص وانا برد على كل إستفساراتك لأني حسيت أني طولت بس والله من قصتك اللي كتبتيها حسيت أنا انتي.

نسيت أكتب شي بعد نومي بنتك من وقت عشان تصحى من وقت أما بالنسبة للجو عاد لا حول ولا قوة هذا جو بلادنا أحنا الخليج بالشتا برد وبالصيف موووووووووت حر بس والله حرارة الصيف عندي اهون بمليون مرة من الشغالة

يا حبيبه قلبي حرام عليكي رجعي الشغاله و لا تكوني السبب في مكروه يصيب بنتك.

أنا عندي طفلين 4 سنوات و 2 سنتين و حامل في الشهر السادس و ما عندي شغاله و ما أدري متى بتيجي الجديده و هذا من يوم ما حملت و عايشه في بيت 3 طوابق كبير و مع ذلك كل يوم الصبح أخذ أولادي قبل ما أروح الشغل أنزلهم عند أمي و بيت أمي مو قريب من دون زحمه الشارع 30 دقيقه و لما أخلص دوامي أمر و آخذهم و لما أرجع البيت أرتاح شوي و أبدأ شغل البيت من غسيل و طبخ عشاء و أودي الملابس للكواي أو أكوي إذا كان عندي وقت و أحمي الأولاد و أعشيهم و أجهز أغراضهم لليوم الثاني و بعدين أجلس معاهم و أقرالهم قصه بعد و أوديهم ينامو بعدين أتفرغ لنفسي و أجلس مع زوجي و على فكره متعاقده مع عامل يجي كل خميس ينظف البيت تنظيف شامل .

مستعده أعمل كل هذا و لا إني أترك واحد من أولادي مع شغاله مثل شغالتك هذي ...

بالله عليكي خلي عنك الحجج و إلحقي بنتك قبل ما تندمي .

ياربي متى بنخلص من هم الشغالات حسبي الله عليهم ياكثر ما نعاني منهم ......أطرديها وإذا ماعندك إلا بنت وحده بالبيت وديها

حضانه افضل من القلق ومادام شفتي منها شي ما عجبك أكيد تسوي أشياء من وراك....صدقيني أنا ما أخوفك لأني عانيت منهم

كثير وشفت إلي اسوأمن كذا ......وانا عن نفسي كنت أطردها إذا شفت شي مريب ولايهمني إذا أخسر فلوسي المهم عيالي

وما اقول إلا حسبي الله عليهم .

لأن كل ساعة تنزل وتروح وين تروح تقول انها رايحة الحمام هي كذابة تروح تتكلم مع الحقير اللي تعرفه بس امى ما تريدها وتقول جيبي بنتك كل يوم الصباح وانا اوديها كل يوم بس من يوم ما عرفت امي عن سوالفها قالت هاذي ما تم مع الخادمة بروحها ،،،،،،،،، فمن الليلة انومها من وقت علشان تصحى شبعانة واوديها بيت امي .................. عاد لا تعورون قلبي على بنتى ترى انا ما عندي خبرة بالحياة ومن اجي البيت بنتى تحت عينى انا اراقبهم ..

من اليوم بغير برنامج البنت ...........

بارك الله فيكي يا أختي ...رجعي البلوه المكتب و الله يكتبلنا و يكتبلك إللي فيها الخير لنا يا رب و هو أجر كمان ..تؤجرين على كل إللي تعملينه لبنتك فقولي الحمد لله.

عليكي نوووور يانودو

لاتخسرين البنت علشان خدامة , استحملي التعب شوي لين تلاقين وحده احسن منها

الله يفرجها عليكي يارب,,
أختك صباحي

تصدقون بالله آني صافنه وفاكه حلجي ومستغربه من كلام بعض الاخوات ؟؟؟

ليش الا خدامه في البيت ؟

امهاتنا وجداتنا وين كان عندهم خدامات الحين تقولون ما كانوا يشتغلوا موظفات خارج البيت صح ؟

صح يكن ما كانو موظفات بس كانو يربون 6 و7 و8 واحيانا 10 اطفال واحنا مو قادرين نربي واحد ولا اثنين وحجتنه هي احنا موظفات خارج البيت

خواتي العزيزات نسائنا العربيات ينضرب فيهم المثل في تربية الاولاد والنظافه والاخلاق بس مع الاسف تغيرنا وصرنا نتكاسل ونتهاون في واجباتنا الاسريه والعذر هو تحسين الحاله الماديه واحساس المرأه بمكانتها ومساوتها بلرجل والضحيه هم فلذات اكبادنا

تعالو شوفو الاوربيات عمل 8 ساعات يوميا خارج البيت ترتيب البيت طبخ لعب مع الاطفال غسل كوي كل هذه الاعمال تقوم بها بنفسها حتى لو كانت مليونيره وما شفت وحده عندها خدامه

سامحوني اذا كنت قاسيه شويه لأن والله قلبي احترق على الطفله المسكينه وعلى موضة الخدامات الدارجه في بلداننا العربيه

مع حبي واحترامي لكل الاخوات

سامحينا أختي ندو صح كنا شوي قاسين عليك بس والله العظيم أنا حاسبة كل وحده من البنات هنية بحسبة اختي وبناتكن واولادكن مثل أولادي فلما أشوف وحده تشتكي من خدامتها او لآي سبب والله انه يعورني قلبي وبما اني بعيده عنك وما أقدر اقدم يد المساعده غير عن طريق الكتابة فهذي كتاباتك وصلتك وعدتي عاد شوفي اللي يناسبك .

بالنسبة لوالدتك كلميها بالطيب وقولي لها أنك بتجيبي الشغالة على الأقل بتساعدك بالبنت عشان تكون تحت عيونك وخلها تولي عساها تكلم مية ولد أنتي شو تقدري تسوي لها تراها مؤقته وبتزلف بس عدتي ديري بالك على الشغاله الجديده وبنتك وتعودي تودي الشغالة وبنتك لبيت امك .

وأنتي يا أخت ناردينة كلامك صحيح بس صدقيني الحين حتى ربة البيت تحتاج لشغالة زمان أمهاتنا غير عن زماننا وزمان أولادنا هم بعد بيكون غير عنا والدنيا ماشية