( اهديكم قصة ولادتي )

بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
السلام عليكم ورحمة الله وبركاته

بداية،،لا اخفيكم مدى تعلقي بهذا المنتدى رغم ندرة مشاركاتي فيه، ولهذا لا اتردد في اهداءكم اجمل لحظات عمري،،، لحظات ولادتي ،،،تفضلوا

في البيت
كان صباح يوم الجمعة، حسيت اني بللت فراشي وانا نايمة و قمت مرتبكة وسيدا على الحمام ولقيت الماي يصب مني بقوة وخفت وعرفت انها اول علامات الولادة لأني قارية عنها من قبل، كتاب الحمل يم راسي، زوجي كان صاحي وماكان في الغرفة، دقيت عليه وخبرته ونادى خالتي وشافتني وقالت لي شفيييج مخترعة خلاص ساعات ولا باجر وبتصيرين ماما، الله يبرد قلبها مثل ما بردت قلبي بكلامها وقالت لي اكلي تمر و خل ريلج يمشيج بره شوي لين يزيد الالم واذا زاد تلقوني عن الجيران، طلعت انا و زوجي نتمشى والملقوف كل شوي يسألني فيه تقلصات ولا مافيه؟!! انا كنت اوقف كل دقيقتين من الالم والمشكلة ان الالم كان منتظم بس اللي طمني ان بجرية والبجر دايمن تتاخر وهذا اللي صار، بعد نص ساعة من المشي المتقطع زاد الالم ورجعنا البيت ودقيت حق امي وقلت لها وانا اصيح يمه بروح المستشفى تعالي . . . .

في السيارة
كنت جالسة ورا وشنطتي يمّي وكرت متابعة الحمل بإيدي فرحانه فيه والألم شاد عليي في الظهر و منظقة الحوض كانت فيني رغبة اني اوقف بشكل ماتتصورنه، بس خسارة وين اوقف وانا بالسيارة، المهم وصلنا الطوارئ و زوجي راح يصلي الجمعة

في الطوارئ
دخلت ماصدقت الزحمة اللي هناك، شفيهم ماجو اللي ف يومي انا، خالتي قالت لي ماعليج بيدخلونج اذا شافو حالتج حرجة، وانا مابين جلوس و وقوف ومشي نادو عليي وسويت فحص عنق الرحم وقالت الممرضة 3 سم ، ولادة ، انا فرحت من اللقافة ودي اولد بسرعة اشتقت للبيبي ودي اشوفه خلاص، حطوا لي جهاز التخطيط وتميت انتظر الفرج من الله....

زوجي في المسجد
طبعا عرفت منه كل اللي صار بعد ماولدت، يقولي كان في المسيد منشغل بين الخطبة وبين تلفونه، يجيك يشوف وصله مسج ولا لأ عقب ما خلصت الصلاة وصله مسج من اخته تقوله انهم قرروا لي ولادة اليوم ويقولي انعفس ماعرف شيسوي وصادته ربكة،،حليله كان يحاتيني

في المستشفى
صارت الساعة 3 العصر وانا بعدني في الطوارىء تحت، بعد نص ساعة طلعوني فوق في غرفتي، كانت خالتي معاي و زوجي وجت اخت زوجي وجابت معها تمر وماي زمزم، مددوني على السرير والالم في ظهري ما يحتمل وريول البيبي كانت تضغط على ضلوعي بشكل فضيع، ماقصرت اخت زوجي كانت تقرا عليي سورة يس و زوجي كان يهمز ظهري، دقايق و زاد الالم صار مثل النار وقمت اصيح كل هذا وامي بعدها ما اوصلت مادري شللي اخرهم، لبست عباتي وتغشيت وطلعت ويا خالتي في الممر، تعرفون لازم اتمشى ما مداني مشيت مترين إلا ورجعت الغرفة ونادو السستر وسوت لي فحص عنق رحم للمرة الثانية وقالت مفتوح 7 سم وعلى طول ع الكرسي المتحرك باتجاه جناح الولادة . . .

في جناح الولادة
كانت الساعة حول 4 العصر، غيرت اهدومي وتمددت ع السرير، دقايق وجت امي وانا اصيح من الالم واهي تقولي حمدي ربج، قولي لا اله الا الله وانا حدي تعبانة وصوت نبضات حمودي واهو داخل بطني كان يرعبني، وبديت ازحم واشد غصب عني وظنوا اني خلاص بربي والممرضات ماقصرن معاي حبوبات وحدة بريطانية والثانية هندية رفعوا معنوياتي وساعدوني، من شدة الالم زعت التمر اللي كليته الولادة كانت متعسرة شوي والطلق كان يحمي ويبرد بسرعة، عطوني ابرة في الفخذ ولاحسيت فيها..زوجي يقولي عنها عقب والحمدلله تيسرت الولادة وطلع حمودي بعد جهد جهيد قبل المغرب بـ 3 دقايق، حبوبي طلع ساكت من التعب وما ارتحت إلا لما سمعت صوته حتى الدموع ماطلعت من عيوني حسيت ان قلبي يدمع من داخلي . . . خلاص ماني قادرة اوصف لكم

الحمدلله ع سلامتي والله يقوم كل حامل بالسلامة