قصة ولادتي الثانيه إللي وعدتكم فيها

بسم الله الرحمن الرحيم......

في البدايه احمد رب العالمين اني ولدت وهون الله علي ....

وثاني شي اطلب رب العالمين يتمم علي فرحة الولاده بسلامة بنتي وخروجها من العنايه لأن قلبي كل ما اشوفها يتقطع عليها........

ثالث شي نبدي القصه...

يوم الجمعه 18\3 الساعه 10,30 الصبح قعدت من النوم ومافيني اي شي ومو حاسه بشي بعد دقايق بس حسيت ان شي نزل مني مثل الماي وخفت مو عارفه شنو بس طنشت ورحت الحمام وتوضيت عشان صلاة الجمعه وكنت ابي اقرأ سورة الكهف ولما طلعت من الحمام ولبست لبس الصلاة وكبرت ماحسيت الا ماي كثير نزل وانا الصراحه مت من الخوف عبالي سويتها على نفسي بدون لا أحس ورحت اركض الحمام وانا اصارخ ابي زوجي يطلع من الحمام والمسكين طلع يركض ونص وضوء وتسبحت وطلعت وزوجي تطمن علي وراح المسجد يصلي الجمعه وبعد ما رجع قعد يتغدى مع اهله في الدور الاول وانا في الدور الثالث ونطرت ليما صارت الساعه 1,30 ونزل علي ماي كثير مع افرازات دمويه فاتصلت على زوجي وقلتله بروح المستشفى وجهزت اغراضي وخذيت معاي تمر ولبن ورحنا المستشفى وكانت بعيده شوي عن منطقتنا..
ولما وصلت دخلت الفحص وانا وجهي يقلب الوان واترجى الدكتوره انها ما تعورني بالفحص وكانت تضحك على شكلي اني خايفه حدي بس كنت اشجع نفسي ولما افحصتني قالت الرحم مفتوح 3 سم ولازم تدخلين المستشفى....
لبسوني ملابس الولاده وودوني لزوجي عشان اعطيه ملابسي واغراضي وكل هذا وانا متماسكه ومشجعه نفسي ودعت زوجي بس بالنظرات بدون لا انطق اي كلمه...
ولما صارت الساعه 2,40 بدا الطلق الاول واستمر كل نص ساعه وانا صمت رهيب وبعدها لما بدا يتقارب كل عشر دقايق بؤديت اتألم بصمت وبلغت الممرضه ولما صارت الساعه 6 صار الطلق كل 3 دقايق وبهاللحظه ماقدرت اتحمل وكل همي وتفكيري كان بولدي اللي خليته بالبيت مع الخادمه ومن الألم صرت اصارخ وابكي وانادي الممرضات ومحد معطيني وجه اهمال مو طبيعي وانهرت من الالم والتعب والصراخ ولما شافوني الممرضات بهالحال دقوا تلفوني على الدكتوره وجت بسرعه ولما فحصتني قالت ان الرحم مفتوح 6 سم مع ان الطلق كان حامي والظاهر اني كسرت خاطر الدكتوره وعطتني كمام عشان انام شوي وارتاح لكن ماكو فايده الالم كل ماله يزيد وانا انهد حيلي من كثر ما اشد بس بدون فايده وكل هالوقت وانا ادعي ربي انه ييسر ولادتي وتنولد بنتي بصحه وتطلع عكس كلام الدكاتره لانهم قالولي ان اللي في بطني فيه تشوهات بالقلب ويحتاج عمليات بعد الولاده على طول...
ولما صارت الساعه 7 قمت ابوس ايد الدكتوره عشان تعطيني مخدر او اي شي يخفف علي لاني مو قاده اتحمل اكثر والبيبي بدى راسه يطلع وانا مو قادره ادفع او اشد لكن لا حياة لمن تنادي راحت كل توسلاتي هباءا منثورا ورفضت تعطيني اي شي لان البيبي اساسا مريض قلب ومو من صالحه اني آخذ اي نوع مخدر لانه راح يتأثر فيه ولما سمعت كلامها تحاملت على نفسي وتشجعت عشان البيبي ما ابيه يتأذى ولما صارت 7,30 طلعت الغاليه وسمعت صوتها تصارخ نسيت كل اللي صارلي وكنت اتمنى اني ابوسها بس الله يسامحهم خذوها مني قبل لا اشوفها لان دكاترة الاطفال والقلب ينتظرونها برى... وبسبتها وصلت الغرز الى 7 عكس ولادتي بولدي كانت غرزتين بس..
وتميت بالمستشفى خمس ايام اعاني من مشاكل بالرحم ونزيف والم مو طبيعي كله بسبب عدم اهتمامهم وولادتهم الخايسه وكانو شاكين ان نص المشيمه تم داخل وسويت سونارين وبيالنهايه قالو انه دم متجمع وملتصق بجدار الرحم لان الممرضه ما نظفت الرحم عدل (( الله يسامحها ))

واللي ضايقني وتعب نفسيتي اهم منعوني اشوف بنتي او اروحلها بسبة اجراءات المستشفى وتشددهم بمسألة الخروج من الجناح ...وماشفتها الا بعد خمس ايام وكانت بالعنايه..
والحين هي بالعنايه المشدده لانها سوت عمليه توسيع شرايين وحالتها لليوم \ما استقرت ...

ادعولها ان الله يشفيها وتقر عيني بشوفتها سالمه....


على فكره سميتها (((( مسك ))))



وهذي قصة ولادتي مثل ما وعدتكم والحمدلله على كل حال والله يهون على كل حامل ويشفي كل مريض قولوا آآآآآآآمين....