ساعدوني صديقتي مبتلشة بحب واحد في النت وماتعرف شتسوي؟؟؟؟؟؟؟؟؟؟

انا اقول خليها تتركه

مرحبا ........ ماريتا (اسم مرررة حلو))


بخصوص صديقتك...مافية حل غير الدعاء لانها لو تركتة راح تتضرر هى بس ما وضحتى هو كيف اسلوبة معها..زين والا لا ........ خليها تصلى بالليل وتدعى ربى والى كاتبة ربى بصير......ولا تخاف بخصوص الزواج انا اعرف وحدة تزوجت وكانت تحب شخص من زمان وصديقنى مع الايام حست انها غلطت بحق نفسها....الله ما يضيع تعب احد....

يالله بحفظ الله



نووفة

بصراحه هذي مشكلة التعرف على شاب عن طريق النت
من الافضل ان تصلي الاستخارة وتشوف ايش ربنا مقدرلها
أهم شيء ما تستعجل

[السلام] السلام عليكم ورحمة الله وبركاته[/السلام]

ردي طويل.... من الحين اقولكم... بس اتمنى انك تقرينه كله اختي الغاليه.. انتي وربيعتج..

شوفي اختي انا بقولج شيء.. ما فيه بيت من غير مشاكل.. صح والا لا.. كبيرة او صغيرة.. المشاكل دايما موجوده.. يعني تخيلي ناس تزوجت بطريقه محترمه.. ومع هذا في بينهم مشاكل...

ناس دخلت بيوت من البيبان و مع هذا فيه مشاكل بينهم..

وناس تزوجت ناس من الاهل ومع هذا فيه مشاكل بينهم..

وناس تزوجت بموافقه الاهل ومباركتهم ومع هذا فيه مشاكل بتصير..

الحين تتوقعين اذا ربيعتج هذه تزوجت الشاب هذا مع اني شاكه انه بيتقدم لها اصلا.. بس ما علينا بنفرض انه يباها.. وتقدم لها.. تعتقدين حياتهم بتكون من غير مشاكل؟؟

انا متأكده انه عند اول مشكله بيقول لها .. ترا انتي اللي جذي وجذي وجذي..

وبيتم ييعايرها لين ................



بس انا وين رحت.. افترضت انه بيتزوجها.. وانتي في كلامج قلتي
انه حاول يروح لديرتها ويشوفها.. ولا يبتي طاري الاهل..


طيب واضح يا اختي..

بيشوفها..

مرة.. مرتين.. ثلاث مرات..

وبياخذ اللي يريده منها وباي باي..

والله يابناااات مدمنه عليه وتعرفه من اكثر من ثلاث سنواااااات؟

اوكي تعرفه من اكثر من 3 سنوات وهي تحبه ومادري شو.. انزين اختي وين حبها لله والرسول .. واهلها.. ؟؟؟؟؟؟؟؟؟؟؟

اكيد بتقولون نزوة خراااابيط بس صدقوووووووووووووني ممكن الحب يجيييج بهذي الطريقة

الحب يجيييج باي شكل من الاشكااااااااااال مثل ماقال الشاعر(الاذن تعشق قبل العين احيانا)

بصراحه... هيه نعم انا بقولج نزوة خرابيط..

بس بعد بقولج.. صح كلامج.. الحب ممكن يجيني بهذه الطريقه.. ممكن ليش لا؟؟ مجرد اني انسى شيء اسمه دين وتعاليمه.. واوامر الله ورسوله.. واروح اسمع للشيطان.. الا الحب بيجيني ونص..

يعني اذا الواحد عطى لنفسه المجال .. اكيد ممكن يعصي ربه.. والنفس امارة بالسوء.. بس احنا المفروض نحاول نتغلب عالشيطان.. صح والا لا؟؟

اكبر مشكلة انه من غير جنسيتها

لا تعليق

ثانيا بصراااااااااااااحة انسااااااااان اخلااقه موزينة يعني زير نسااااااااااااااء وهي عارفة عالشئ ياحسرة بس تقوووووووووولي حبيته شسوي

الله يهداج انتي وياها..

اي حب..

شي غريب والله.. هالايام اذا الحرمه شكت.. مجرد شك ان زوجها يعرف حرمه غيرها.. بغض النظر عن علاقته بالحرمه.. على طول تلاقينها ماخذه شنطتها ورايحه عند اهلها.. ساعات قبل ما تتأكد حتى...

وانتي تقولين علاقه محرمه----> 4 خطوط حمراء تحت الكلمه هذه لو سمحتي..واخلاقه مو زينه وزير نساء و تحبه وما تقدر تنساه..

سبحانك ربي..



صدقيني الغاليه اذا ما كانت تعرفه.. وكان متقدم لها.. كانت بترفضه.. عشان الاسباب هذه..

هذا معناته انها متعوده عليه وبس.. لأنها عطت مجال لنفسها.. وبلا حب وبلا بطيخ..

والله يابنااات هي وايد مبتلشة حاولت تنساه قطعته فترة طوووووييييلة على امل انها تنساااه

انزين كيف حاولت تنساه؟؟ يعني انا اذا قاطعت حد مش معناه خلاص بنساه.. لا أختي.. هي قاطعته بس ما حاولت تنساه.. فرق ترا..

هي بس قعدت ما تكلمه.. بس اكيد يلست تفكر فيه طول الوقت..

ما شغلت نفسها..

ما تابت.. ما رجعت لربها.. ما قعدت تدعي لنفسها بالهدايه.. والثبات..

ما حاولت تسمع شريط محاضرة.. ما سمعت لخطب.. ما حاولت تحفظ قران مثلا..
و.. و.. و..

والله هي قالتلي اللى حبتهم قبل كان حب مجرد نزوة ويرووح بعد شهر شهرين

:eek2::pain::eek2:

الله يهدينا ويهديكم.. ويستر علينا وعليكم..


والله يا الغاليه... ما اعرف شو الاسباب اللي خلت ربيعتج تتعرف على شباب.. واكثر عن واحد بعد.. وبصراحه من كلامج ما حسيت ابدا انها ندمانه.. واتمنى اكون غلطانه..

بس خواتي اتقوا الله.. انصحيها اختي .. خليها تكلمج انتي كل ما فكرت انها تكلمه هو.. خليها تبعد عن النت.. وترجع لربها.. خليها تتقرب من الله اكثر بالنوافل.. خليها تلزم الاستغفار.. وتتصدق و تقوم الليل.. خليها تسمع كل يوم شريط محاضرة .. وتحضر مجالس ذكر .. وخليها تبعد عن ربيعات السوء..

ترا يوم القيامه لا ربيعاتها بينفعنها والا الشاب اللي حبته..
وكلهم بيتخلون عنها....


مستغربه منها والله.. ما تحب نفسها ابدا هذه.. ومش مهتمه ف لا سمعه .. لا كرامه.. لهالدرجه النفس رخيصه صارت؟؟

والله اقول كلامي من خوفي عليها..

صدقوني يا بنات.. الناس ما تحترم اللي لها علاقات مع شباب.. حتى الشباب هذيل.. ما يحترمون البنات اللي يكلمونهم.. صدقوني.. لأنها هي اصلا ما احترمت نفسها.. ولا تعتقدين انه بيفيدها في الدنيا.. لا يا اختي.. لا في الدنيا ولا في الاخره.. على العكس بيضرها..
هيه.. وما بيثق فيها اساسا.. تعرفون " اللي كلمتني اكيد كلمت خمسين واحد غيري" .. واذا ما قال جي.. فبيقول : " اللي خانت اهلها بعد كل هالسنين.. اكيد بتخونني انا بعد ف يوم"..

واذا ما طلع من هذيل.. وحاب وحده متعرف عليها وفعلا يبا يتزوجها.. أكيد حد من اهله بيعارض..
شفتوا كيف.. ما بنخلص اذا قعدنا لين بكرة..

الحين اذا قلتيلي اني غلطانه في كل شيء قلته بقولج اوكي انسي اللي قلته بس جاوبي على هالاسئله..

أهل ربيعتج يعرفون انها على علاقه بواحد؟؟ والناس كلها تعرف؟؟

اذا جوابج " نعم" بقولج خلاص عيل ربيعتج اصلا ما عندها مشكله..

اذا جوابج : " لا "

بسألج ممكن تروح الحينه وتخبر اهلها؟؟؟
وبكرة تخبر كل معارفها عن علاقتها بالشاب؟؟

عادي؟؟ ممكن تسويها؟؟؟


اذا ممكن.. خلاص.. ما عندها مشكله..

اذا لا.. ليش لا؟؟؟؟؟؟؟

بعدين اختي خليها تجرب تسوي شيء..

خليها تقول للشاب هذا ان اخوها يبى يتعرف على اخته...

وشوفي ردة فعله شو بتكون..

يا بيوافق يا ما بيوافق.. وفي الحالتين المفروض هي تنساه من غير تفكير..

قوليلها ..
لأنه اذا عصب ورفض.. طبعا ما يرضى على أخته.. فكيف يرضى عليج؟؟ عاد هذه مشكله.. يشوف اخته غير.. يعني اخته غاليه.. وطبعا ما ننسى السمعه..... انزين وانتي؟؟

و اذا قال لج عادي خلهم يتعرفون على بعض.. عاد المشكله هنيه اكبر... هذا واحد ما يخاف على اخته.. اخته ما تعني له شيء.. هذرج بيخاف عليج انتي؟؟؟


_ _ _ _ _ _ _ _ _ _

مافية حل غير الدعاء لانها لو تركتة راح تتضرر هى بس ما وضحتى هو كيف اسلوبة معها..زين والا لا

كلامج غريب والله اختي.. راح تتضرر لو تركته؟؟؟؟ كيف يعني؟ وشو الضرر ممكن توضحين؟؟

من الافضل ان تصلي الاستخارة وتشوف ايش ربنا مقدرلها
أهم شيء ما تستعجل

الغاليه شكلج ما انتبهتي.. الاخ مش متقدم لها..

الاستخارة ما تكون الا في الامور المباحه..

يعني اذا انا اريد اسرق.. يصير استخير ربي فهالشيء؟؟ لا طبعا.. لأنه حرام..
نفس الشيء.. العلاقات المحرمه..



انصحج اختي تسمعين المحاضرات هذه.. انتي وربيعتج..


أخبار المحبين للشيخ نبيل العوضي

وهم الحب للشيخ سليمان الجبيلان

قصص وعبر من سورة مريم للشيخ نبيل العوضي

وكلها موجوده عالنت.. قوليلي وبحطلج الروابط اذا بتسمعوهن..

وفهمي ربيعتج انها غاليه... غاليه.. غاليه... وتستاهل واحد احسن عن هذا....

واسمحولي .. طولت عليكم.. ويمكن كنت قاسيه..

بس والله ما قلت كلامي الا لمصلحتها..
ولا تنسون.. كل بني آدم خطّاء ، وخير الخطائين التوابون

+ + + +

" من ترك شيئاً لله , عوضه الله خيراً منه "


تقديري واحترامي لكم

والله يا اختي انا اعرف وحده مرت بمثل هذي التجربه لكن صححت الغلط بغلط اكبر منه وهو انها عشان تنسى اللي تحبه مع ان موصفاته ابدا ما كانت تناسبها وهو فارق السن لانه كان عمره (دبل) عمرها وزياده بعد وكان متزوج وعنده اطفال ومع هذا يعني كانت تموت فيه وبصراحه مازالت
مع انه طلب ان يخطبها وكانت موافقه لكن اهلها رفضوه لانه مو من نفس الجنسيه وهذا غير انه متزوج وعنده 7اطفال الله يخليهم له وعشان تنساه تعرفت على واحد ثاني وهو يمووووت فيها على كلامها بس هي ما قدرت تنسى اللي كانت تحبه قبل وما قدرت تحب الثاني وانا احس انه يناسبها واللحين هي مخطوبه ومبتلشه في الثاني مو راضي يتركها مع انها حاولت بأكثر من طريقه وانا عن جد متأثره من حالها لانه هي قلبها طيب ونيتها مو لعب لانه ما تقدر ترد احد وانها ترفض احد ان كان بسبب او بدون واللي كاسر خاطري بزياده ان خطيبها اخلاقه روووووعه الله يوفقهم واتمنى انكم تدعوا لها بالهدايه ولبنات المسلمين.

وانا أقوال خليها تتركه والله انشاء الله بيعوضها بالي أخير عنه........... وخليها تدعي من قلبها وتقوال..............(( اللهم أغنني بحلالك عن حرامك )) وانشاء الله الله بيرزقها بولد الحلال الي بيقدرها وبيسعدها انشاء الله ..................

العنيــــــدة™

كلام جميل وسليم 100%

تسلمييين والله:up:

السلام عليكم ورحمة الله وبركاته

ما شاء الله...كلام أختي العنيدة ما خلّى لي شيء أقوله...

و إنتي صديقتها مفروض تنصحيها أختي...مش تيجي تقولي لنا ( الأذن تعشق قبل العين )...يعني تأيديها في اللي يصير...

كل هذا ينحسب من عمرها...و ينحسب عليها سيئات...

إنصحيها و فهميها الوضع مثل ما قالت أختنا العنيدة...

و الله يهديكم يا رب...

ما شاء الله عليج يالعنيدة كفيت وفيت وبردتي قلبي وقلتي كل الي في خاطري
والله يهدي بنات المسلمين وشباب المسلمين
ولا حول ولا قوة إلا بالله

بصراحة أختي العنيــــــدة™

كفيتي ووفيتي

عزيزتي ماريتا .. المشكلة واضحة والحل واضح

والصح واضح والغلط واضح

قدامها طريقين .. خير وشر

هي متأكدة إنه طريق شر وماشية فيه

وشايفة طريق الخير ومعرضة عنه

واضح إنها واعية لكن واضح تماما سلطان الشيطان عليها

قص عليها المسكينة

قال لها لو تركتيه ترى قلبج بينكسر

بلاش تتزوجيه خليكوا حبايب

هي توقف قدام نفسها مرة وتقول لها

وين بتروحين؟؟

وين ماخذك الشيطان؟؟

على دروب السعادة؟؟!!

وش سويتي بنفسك؟؟

قاعدة تخسرين من عمرك وشبابك وصحتك وأحاسيسك علشان مين؟؟

علشان هذا اللي قص عليكي بكلمتين قمتي وشبطتي فيه؟؟

خليها توقف شوي وتقول أنا لو مت الحين وش بيكون مصيري؟؟

جنات عدن؟؟

خنت ثقة أهلي فيني وقصيت عليهم وقلت لهم تراني قاعدة أقرأ معلومات مفيدة من على النت

ما دروا بها تتكلم مع شاب 3 سنوات

خل تسأل نفسها لو كانت أختي اللي سوت هالشي ولا بنتي شو بيكون تفكيري بقول لها يما صح اللي تسوينه الله يوفقك معاه؟؟

نقطة فاصلة .. تلحق روحها قبل ما يقبض ملك الموت روحها وتصير تقول يا ليت .. ووقتها دفترها تسكر وهو أول واحد بيشرد من وجهها يوم القيامة ولو حصل له يدوس عليها علشان ينجو بنفسه ما بيقصر

كلمة واحد قوليها لها

في بنات يحبوا لك الخير يقولوا لك اتق الله في نفسك

يابنات صلوا على النبي

يعني انتوا شكلكم مامررتوا بقصص حب من بعيد او من قريب (عسى الله لايبلاناا )وخصوصا الحب من طرف واحد وهذا اصعب حب لانه الطرف الاول يعاني والطرف الثاني ولاهااامه مرتاااااااااااااح

الانساااان مايقدر يتحكم بمشاااااعره ابددددددد سبحاااان الله
ولوقدر جان من زمان مابنسمع عن قصص المحبييييين وعذاباتهم
ولوصديقتي قدرت تتحكم بمشاااعره وتكرهه جان ماكتبت لكم القصة من اساسهاااا

يعني هي بعقلها تقووولي هذا شخص سئ وموزييين وحتى لوكان بديرتي يمكن مااوافق عليه وحتى لووافقت عليه ماراح ينجح زوواجنا
وتقولي مادري شنو حبيت فيه يمكن من خفة دمه او سوالفه اواسلوووبه ؟؟

بس والله يابناااات هي تبي تنسااه اليوم قبل بااااجر ودايما تدعي ربهاااا الله يفرجها عليهااا تمر عليها فترات تكون عاطفتهااا عادية وماتشتاق له ولاتحبه وتمر فترات عليها يكون شوقها قوي حقه وتتالم

والحين هي مقاطعته من فترة طووييييلة على امل انها تنساه وتتخلص منه لانها عارفة نهاية هالعلاقة الفراااااااااااق ولانه هو حظرته متعود يتنقل من بنت لبنت

وهي عارفة هالشئ غلط في غلط اللى تسويييه
الشئ الوحيييييييد اللى خلاها تستمر معاااااااه حبته قلبها تعلق فيييه

ادعوووولها يابنات الله يفرجهاااا يارب

صح لسانج يالعنيدة


ما عندي اي تعليق كفيتي و وفيتي


جزاج الله خير

حب ما حب هذا بضيع عمرها


هذا الغلط راكبنه من ساسه لراسه و اذا صار ما صار هي الي بتبتلي

وياه


بعدين الطريقه مشبوهه من النت

اذا صار عن طريق الاهل ياله يصلح

كيف عن طريق النت

شكله الاخ يتسلى والاخت مصدقه نفسها لو يحبها ماكان يتنقل زي النحله
من بنت لبنت

عزيزتي ماريتا

أفهم معنى الكلام اللي تقولينه

وأعتقد كثير من البنات مروا فيه

خصوصا غير المتزوجات واللي قلبهم خالي

خالي من شيئين

من الإيمان أولا ومن الزوج ثانيا

عزيزتي لا تقولين إحنا ما نفهم ولا ما نعرف

بس خذي كلام المجربين والفاهمين لنفس تفاصيل حالتها

قوليلها أولا لازم توثقين علاقتج بالله

تشغل وقتها بالكامل .. تعمل جدول من أول النهار لآخره

تلتحق بمراكز حفظ القرآن .. وتلتزم بحضور درس ديني في الأسبوع مرتين على الأقل

تشترك في نادي رياضي .. وسباحة أو تشغل نفسها بالهواية اللي تحبها

قوليلها لا تقربين من الكمبيوتر فترة

ولا تدخلين غرفة النوم (واللي أعتقد فيها الكمبيوتر) إلا وأنتي منهكة

طالعي الكمبيوتر وطالعي السرير

لا .. السرير أولى .. والراحة أولى

تكلم نفسها وتقول بكرة عندي تسميع ولا امتحان لازم أكون فايقة له

صدقيني وخذينها مني كلمة لو استمرت راح تندم

أنا أعتقد إنها ندمانة الآن لكن ندمها ما وصلها للتوبة وكراهية هالتصرف

لكن صدقيني ومن دون يمين راح ييجي يوم إذا ربنا عطاها عمر وراح تتذكر كل هالسخافات وتقول أنا شلون بخبالتي ضيعت عمري ومشاعري مع واحد ما يسوى بيزة

تقولين زير نساء

هي خبلة ولا اتخيبل

يعني بني آدم وضيع حقير إذا ما كلمته أصلا ولا بيهتم

ليكون على بالها مش نايم الليل على قطيعتها

يختي لو ما كلمته بيكلم غيرها

اصحوا يا ناس من هالغفلة وعودوا لله

ترى ألحين باب التوبة مفتوح

بس راح يتسكر يوم لا ينفع الندم

وأقول لك عزيزتي .. ترى إنتي عليكي جزء كبير من المسؤولية

لا تكبرين راسها وتقولين لها ترى أعرف قصص روميو وجوليت

وعنتر وعبلة

ترى أختي إنتي مشتركة معاها بالإثم لو قلتيلها الله يعينك حبيبتي وطبطبتي عليها وحسستيها إنها تتصرف صح وغصبن عنها وتفهمين مشاعرها

تراكِ مسؤولة لإنك ما قلتيلها كلمة خير تنصحينها فيها

قومي بارك الله فيج وخذيها من يدها وروحوا سجلوا بمركز حفظ

واحضروا مجالس علم

وتقربوا من ربكم

وزود عن هذا ما عندي نصايح

لا .. لحظة واحدة

بعد عندي نصيحة واحدة زيادة

لو تقدم لها شخص طيب وكويس وسألوا أهلها عنه وطلع زين

توافق عليه وراح تنشغل عن الدنيا كلها بالتجهيز للعرس

وراح تنسى ذاك الشخص خفيف الدم

اظن انه ربيعتج .. اولا صغيرة بالسن.. يعني بالمراهقة..

وثانياً: احتمال يكون فيه اهمال في البيت .. وما فيه جو محبة..

يعني شوفي هالاساس غلط..

فاللي ينبني على خطأ راح يتم على خطأ ..

هي صح مرتاحه الحين بس بعدين اذا كبرت بتندم ..

وقلتي انه من جنسية ثانية لا وبعد يعرف حريم:rolleyes: كيف اقتنعت .. هل فكرت شو راح يكون مصير عيالها؟؟ اهلها؟؟ ولا ماهمها؟؟

المهم خلها تشيل هالفكرة من راسها.. وتكثر من الصياااااااام وقراءة القرآن وتبتعد عن النت.. وتتعرف على صحبة صالحة..

ولج مني التحية
أختج في الله
عروس الجنة

وثانياً: احتمال يكون فيه اهمال في البيت .. وما فيه جو محبة..

فعلا اختى هذا اللى حاصل في بيتها
عندها شوي تفكك اسري يعني كل واحد في حاله ومش مهتم بالثاني

ليكون على بالها مش نايم الليل على قطيعتها

يختي لو ما كلمته بيكلم غيرها

وهي عارفة هالشئ لانه صارلها سنة مقاطعته ولافكر يستفسر عن سبب هذي القطيعة ولا يشووفها ليش زعلانة منه ولانه متعوود هي تصالحه وتراضيه بالاول وهو رافع خشمه مادري على شنووو ؟؟؟

وانا ادري انها تتركه احسن خيااااار لانه انساان مايستاااهل حبها له وتفكيرها فييييه

صدق الحب أعمى
بيكووون صعب عليييها وااايد بالبداية بس بخلييها تحاول ولا تنهاان كرامته لانساان مايستاااهل


خوااتي اللى عندها اي مداخلة او حجي ماتبخل علينا لانكم قاعدين تساهمون في الخير والنصييحة وعشان نستفيد من خبرتكم

الله يعينها
دايم البنات هم الي يروحون فيها بسبب طيش الرجل
ربي يزلزل الاض من تحت رجول الرجال الي يستحقر بنت