قصة ولادتي بالامير الغالي سعود

السلام عليكم ورحمة الله وبركاته،،،

الحمدلله رجعت لكم بالسلامة وولهت على المنتدى وعلى البنات في المنتدى وعلى كل المواضيع اللي تطرح فيه ...
ابي اقولكم قصتي مع الولادة ... انتوا كنتوا معاي من اول يوم حللت فيه وعرفت اني حامل وطيحت اول مره وبعد فتره حملت مره ثانيه والله ماكتب ان الحمل يستمر وصار اجهاض والحمدلله هالمره الله تمم عليه والفضل يعود لرب العالمين والدعاء والتوكل عليه سبحانه وعسى الله يرزق انشالله كل وحده تتمنى الذرية يارب العالمين ... وكنتوا معاي الى اليوم اللي قبل لا ادخل فيه المستشفى للولادة ..

راح اطول عليكم شويه ، انا من يوم اليوم اللي دخلت فيه شهري التاسع حسيت بحركة البيبي ضعيفه مو مثل قبل يعني مايتحرك الا مرتين ثلاث باليوم قلت لكم بالمنتدى هالشي البعض قالي مايصير والبعض الاخر قال البيبي كبر وحجمه كبر والمكان ضيق عليه مايقدر يتحرك مثل قبل .

راجعت دكتوري قالي انه مو متطمن على حركة البيبي ضعيفه وايد قام يسويلي تخطيط على قلب البيبي تقريبا يوم بعد يوم كان التخطيط للقلب زين بس البيبي مايتحرك المهم وزن البيبي في نص الثامن 2كيلو و700 جرام ومع التاسع ايضا2كيلو و800 جرام قالي مايصير البيبي مازاد وزنه في مشكله باجر دخوول المستشفى راح نعمل طلق صناعي ..... :confused::confused:

انا مت من الخرعه شنو يعني طلق صناعي يعور مايعور انا تحليل الدم اسوي حفله بالمستشفى الكل يدري اني اليوم بياخذون مني تحليل دم :eek2::shy::D2

المهم وكلت امري لرب العالمين صار الموعد يوم السبت دخلت المستشفى الساعة 8 الصبح وعطوني تحميله لفتح عنق الرحم والطلق الصناعي مرت خمس ساعات وانا اطلق طلق خفيف وعنق الرحم مافتح الا واحد سم حطوا لي تحميله ثانيه مرت خمس ساعات وانا اطلق :confused: مافتح عنق الرحم الا 2 سم :confused: بديت بقراءة الايات اللي اخذتهم من المنتدى سورة مريم والزلزلة وبقية الايات والادعية جزاها الف خير اللي كاتبتهم .

مرت خمس ساعات ثانيه حطوا لي تحميله ثالثه مافتح عنق الرحم ظل مثل ما اهو 2 سم :s2 صار من ثاني يوم الصبح حطوا لي تحميله قالولي قومي امشي بالمستشفى كله خل عنق الرحم ينفتح معاج حق الولادة فيه طلق بس مافي عنق الرحم مو راضي يفتح اكثر من 2 سم الحين ثاني يوم لي وانا اطلق قمت ومشيت ساعة وساعتين رجعت فحصوووني نفس الطريقة قعدت ابجي وابجي :confused::confused::confused:
كلمت الدكتور قلت له ابي حل قالي خلاص الحين ندخلج الولادة ونفتح ماء الرأس علشان البيبي يبدأ يدفع ويتوسع عنق الرحم الكلام هذا كان الساعة الواحده ظهرا ....

دخلت غرفة الولادة وما ادراكي ماغرفة الولادة :down::down: شي يعور القلب كل وحده في غرفة خاصه فيها بس الاصوات اللي سمعتها مرعبه:eek2: قمت ابجي وابجي وقلت ابي امي وابي زوجي يدخلون معاي حجزت غرفة v.i.p بس علشان يدخلون معاي وفتحوا الماي وقام ينزل كله وحطولي ابره طلق صناعي واشتغل الطلق الصجي مو اللي امس يدلدغ اليوم لالالالالا صج صج صج من الساعة وحده الظهر الى الساعة 10 ونص بالليل ماانفتح عنق الرحم :eek2: لاحول ولا قوة الا بالله :sad::sad::sad::cry::cry: بديت بالقراءة سورة الزلزلة مره مرتين ثلاث اربع انا وامي تقرأ علي سورة ياسين وآية الكرسي والادعية قالوا خلاص راح نعمل عملية قيصيريه انا قمت ابكي من الالم قلت افتحوا بطني خلاص ابي قيصرية لحد الوقت هذا دكتوري كان معاهم على التلفون فقط لم يحضر قال ليش احضر والبنت مانفتح معاها عنق الرحم الا 2 سم يومين لا اله الا الله الا 2 سم تعبت انهرت بكيت بعد ماقرروا العملية القيصريه حضر الدكتور وقال لا ماافتح بطنها ننطر عليها بعد شوي ماء البيبي نشف مره وحده والبيبي صعد الى المعده قعد بالجبد مره وحده البطن تكور وارتفع لي فوق باللحظه هذه بعد الدعاء سبحان الله والتوكل على رب العالمين انفتح عنق الرحم خلال الفتره هذه وصل 9 سم الحمدلله والشكر لله

بس المشكلة ان البيبي مو راضي ينزل قرروا مره ثانيه عمليه قيصريه الحاله صعبه شالوا عني الكمام وجميع المواد اللي تخليني اخدر قالوا نبيج واعيه معانا لسلامتج وسلامة البيبي عمل الدكتور لبطني مساج وتحرك البيبي ونزل للاسفل الحمدلله وحسيت بكل لحظه وحسيت بطلعة الرااااااااااااااااااااااااااااااااااااااااااااااااااااااااااااااااس
شي عظيم بس الحمدلله كله فيه الاجر انشالله من رب العالمين وطلع البيبي بس ماسمعته يبكي ... قمت اقول للدكتور ولدي مايبجي ليش ساااكت لفوووه وطلعوا بره الغرفه :cry: قمت ابكي ولدي حبيبي :cry: خدروني ماادري عن شي ولدت الساعة 11 وربع بالليل فتحت عيني الصبح الا امي وابوي وزوجي كلهم حوالي قالولي الحمدلله على السلامة يا شريفة ومبروك عليج الصغير الحلو
سميته الامير سعود :smile: حجمه صغير 2كيلو 800 جرام الحبل السري كان ملفوف على رقبته ثلاث لفات من هالشي ماكان يقدر يتحرك ولا كان يوصل له الاكل بشكل طبيعي يخلي وزنه يزيد وينمو عدل الحمدلله على سلامته دخل المستشفى 4 ايام حاشه ابو صفار والحمدلله الحين اهو عندي الله يخليه لي انشالله ويحفظه ويسلمه ويزكم انشالله الذرية الصالحة واللي على وشك ولاده الله يسهل عليها انشالله ويسهل ولادتها يارب العالمين نسيت كل الالم اللي حسيت فيه لما شفته بعيوني ...

احمدك واشكرك يارب على نعمتك ،،،،

اسفه على التأخير بس كنت ابي اقولك وافضفض لكم انتوا خواتي وعزيزاتي احبكم وااايد ....:up: