تجربتي الخاصة في علاج الهرمونات و التخلص من الشعر الزائد بإذن الله

بسم الله الرحمن الرحيم
السلام عليكم ورحمة الله وبركاته

بنات انا صارلي 6 شهور اعالج خلل الهرمونات و خلال هالفترة و قبلها نزلت وايد استفسارات و معلومات عن هالموضوع و الحين الحمدلله لاحظت تحسن كبير .. علما بإني غير متزوجة :shy:

لهالسبب حبيت اشارككم بتجربتي عشان تستفيدون منها و انا بعد استفيد من خبراتكم

على فكرة علاجي بعده ما خلص لكن الحمدلله الحمدلله وين كنت ووين صرت :up:



- شنو الأعراض اللي عانيت منها ؟

شعر زائد بمناطق متفرقه ( الصدر، البطن، الأفخاذ، الوجه )
ضعف الدورة الشهرية .. تنزل عندي بوقتها الصحيح لكن بكمية قليلة جدا جدا و تنقطع باليوم الثالث او الرابع
بشرة دهنية جداااا إضافة لحب الشباب

- السبب ؟

ارتفاع معدل هرمون الذكورة مع لخبطة بهرمون الحليب


- كيف حصلت هذي المشكلة ؟

حسب كلام الدكتور : في وقت البلوغ ما كان التبويض طبيعي عندي يعني الهرمونات الأنثوية نفسها كانت تعاني من خلل و مع الوقت زاد افراز الهرمونات لتغطية الخلل و هالزيادة خلت الهرمونات الذكرية ترتفع و تلخبط الدنيا


- اهم الممنوعات أثناء العلاج ؟

زيادة الوزن .. الدهون تزيد هرمون الذكورة بشكل كبيييير و عشان جذي النساء اللي وزنهم زائد عندهم مشاكل بالحمل و حتى بالدورة الشهرية

- كيف بدأت العلاج ؟

فكرت اني اسوي ليزر بالأول لكن الدكتورة قالتلي ان الشعر بيرجع مره ثانية بسبب لخبطة الهرمونات .. لازم علاج الهرمونات اولااااا ثم الليزر للشعر المتبقي بعد العلاج ( في حال عدم اختفائه تدريجيا )

- طريقة عمل الفحوصات و التحاليل ( نقلتها من مشاركة سابقة لي )

تحاليل الدم كثيره كل واحد يطلعون منه شغله ولا تسأليني شنو لاني مادري و كله من الذراع يعني تحليل دم عادي .. تحليل الهرمونات ياخذ ساعه تقريبا و هو عباره عن تحليل دم بين فتره و فتره بس لا تخافين ما يعور لان الابره اساسا مثبته بيدج

السونار اهو اشعه تسوينها و تكون مثانتج مليانه .. تشربين ماي وااااايد قبله و بعدين تسوينه عشان يشوفون المبايض و الرحم

اول شي شافوا التحاليل اللي سويتها ( تحاليل دم بأنواعها + تحاليل هرمونات + سونار ) و بعدين فحصتني الدكتوره و شافت جسمي عشان تعرف اماكن الشعر الزائد بالضبط و قالتلي نسبة الهرمون مرتفعه عندي 11 % و هي نسبة كبيره و قالت شغله استغربت منها .. ان ضمن التحاليل اللي سويتها كان في تحليل مكرر مرتين و بينهم شهرين .. نزلت نسبة الهرمون خلالها بشكل كبير بدون علاج !! وضحتلي الدكتوره ان الوقت كل ما يمر يساعد الهرمونات تتحسن اكثر بالاضافه الى العوامل النفسيه و الصحية و طبيعة الأكل
قالت ارتفاع هرمون الذكورة مو دايما يأخر الحمل .. كل حالة تختلف خصوصا اذا كانت الدورة منتظمه فمافي خوف ان شالله

و قالت تقدرون تسوون ليزر بأي وقت تبون حتى لو في بداية العلاج لكن اذا كان عندكم صبر و قوة تحمل استمروا بالعلاج بدون ليزر و شوفوا الشعر شلون يخف مع الوقت لكن للأسف ياخذ وقت طويل .. أثر العلاج يبين بعد 3 شهور تقريبا لكن النتيجه الفعليه تظهر بعد مو اقل من 6 شهور و لازم يستمر العلاج لمدة طوييييله غالبا أكثر من سنه

اي صح سألتها عن جلوكوفاج لان البنات وايد اسمعهم يتكلمون عنه و قالتلي انه يستخدم بالحالات اللي تكون نسبة الأنسولين فيها ملخبطه و الوزن يكون زايد لكن انا بحالتي الدوكتين مناسب لي

اييييي تذكرت شغله .. تقول اذا تزوجتي لازم تغيرين العلاج لأن الدوكتين راح يأثر عليج بس الصراحه ما سألتها شلون يأثر لكن اكيد له علاقه بالهرمونات بعد الزواج

- علاجي اللي بدأت فيها و ما زلت مستمرة عليه ؟

ألدوكتون .. بدأت فيه يوم 27/6/2004 .. هو عبارة عن حبوب مدرة للبول لكن لها فاعلية في علاج الهرمونات و آخذها مرتين باليوم ( الصبح و بالليل ) ما لاحظت أي آثار جانبية لها الا روحة الحمام تكرمون خصوصا بالشتا ههههههه


- علاج اضافي ؟

بالمراجعة الأخير ( 19/12/2004) قلت للدكتورة ان الدورة الشهرية حيل مضايقتني و جسمي صار منتفخ بسبب تجمع الماء و الأملاح .. فعطتني حبوب دايان ( حبوب منع حمل ) قالت هذي مفعولها راااائع و انا بنفسي الصراحة شفت تأثيرها على بنت خالي ماشالله عليها .. كان الشعر عندها اضعاف اللي اعاني منه لكن الحين سبحان الله ارجعت طبيعية


- آثار جانبية لدايان ؟

سألتها اذا كان فعلا يزيد الوزن ؟ قالت أي لكن مــو لأنه اهو نفسه يزيد الوزن لالالا لكن لأنه يفتح الشهيه .. انا بحالتي يمكن يخفف وزني لاني مثل ما قلت صاير جسمي مليااااان سوائل بسبب ضعف الدورة

- مفعول دايان ؟

مفعوله يعدل الهرمونات لأنه عبارة عن هرمونات أنثوية و يساعد في انزال الدورة بشكل منظم و صحيح .. الصراحة ما بدأت فيه لاني لازم اخذه بأول يوم دورة لمدة 21 يوم و اقطعه اسبوع ثم ارجع عليه بالدورة اللي بعدها و هكذا .. للحين انطر دورتي اللي بتكون الشهر الياي ان شالله .. على فكرة انا لي الحين مستمرة على الدوكتون يعني راح اخذ نوعين حبوب مع بعض

نتائج آخر فحوصات ؟

تحسنت نسبة الهرمونات بشكل واضح الحمدلله
انا بنفسي لاحظت ان الشعر خف بشكل كبيييير ماشالله و حتى مرات الحف قلت .. حتى الحفافة اللي بالصالون لاحظت الفرق ( متابعه الحاله معاي هههههههههه )



هذا ملخص 6 شهور من العلاج من 27/6/2004 الى 19/12/2004

ادعولي يا بنات حالتي اتحسن و انا تحت أمركم لأي استفسار و ان شالله موضوعي راح يظل موجود و اظل مستمرة عليه لنهاية العلاج بإذن الله اذا ربي عطانا عمر :smile: